تقرير نيسان صني مانيوال بعد شهر استخدام
أولا احب اقول للجميع كل سنة وانتم طيبين ورمضان كريم على الجميع
نبدأ ساعة الاستلام أنا استلمت العربية يوم 16/7 اللي فات طبعا انا عارف اني أتاخرت على التقرير ده بس أنا حابب أني أجرب كل حاجة في العربية قبل ما اعمل التقرير
العربية نيسان صني 2010 مانيوال لونها نبيتي بصراحة اللون ده تحفة وماشي جدا مع لون الصالون البيج
أنا حابب بس أني اقول أن كان معايا قبل كدة 128 مو84 وكانت تعبانة جدا جدا وبعتها وجبت byd flyer كانت 1100 سي سي وكانت تعتبر أول عربية حديثة ركبتها وبعدين بعتها قبل سفري من سنتين ولما رجعت من السفر جبت النيسان صني وكان شرأي ليها بالصدفة البحتة والحمد لله وحاسس أنها أختيار ربنا ليا أنا حبيتا اقول على العربيات اللي كانت معايا لأن اكيد رأيي هايتأثر بالتجربة السابقة
الشكل يعتبر كلاسيك شوية ومش شبابية قوي وغالبا بتبين أن اللي راكبها شخص محترم وهاديء الطباع يعني مش كل الناس هاتحب شكلها وخاصة الشباب والالوان جميلة جدا خاصة النبيتي وكمان الفيراني اللون د هانا ماشفتوش غير بعد ما اشتريت لو كنت شفته قبل كدة كنت جبته لون شيك جدا وراقي جدا ولايق عليها قوي بس عيبه بالنسبة ليا الصالون بتاعه أسود وانا بحب الصالون البيج.
أول حاجة بعد ما تشوف العربية تبدأ تستخدم المفتاح عشان تفتح العربية وتدورها الريموت مداه يعتبر قصير شوية وقلتلهم عليه في الصيانة بس تقريبا هو كدة ولقيت ناس كتير بتشتكي من نفس الموضوع المهم العربية محتاجة جهاز انذار بريموت غير ده لأن شكله تقليدي قوي كمان
فتح الباب وغلقة بيتم بسهولة وبدون صوت مزعج تقعد تحس انك كاشف الدنيا قدامك وشايف آخر الكبوت بس المشكلة في الشنطة مش شايف منها حاجة خالص والحمد لله خدت خبطة صغيرة كدة على الكلمة بتاعة ex salone وعملتها الحمد لله على البارد بس عايزة شوية بوية صغيرين
زرار المرايات الكهرباء وفتح الشنطة مكانهم غريب شوية بالنسبة للمرايات أما فتح الشنطة يعتبر مكان حلو جدا احسن من الذراع اللي تحت الكرسي في بعض العربيات ممكن أي حد راكب جنبك يفتح الشنطة وانت برة العربية لو المفتاح في العربية انما لو تحت الكرسي ماحدش هايفتحه غيرك عموما كل حاجة في التابلوة في متناول أيدك وسهل الوصول ليها
دورت العربية الصوت هادي بس مسموع لغاية ما العربية تسخن وبعد كدة لو مش مشغل التكييف مش هاتسمعه خالص وانت واقف بس في الحركة صوتها بيعلى قوي بعد 2.5 ار بي ام وملاحظة كمان بعد ما دورت لقيت عصاية الفتيس فيها رعشة كدة وقالولي في التوكيل برضو ان ده طبيعي بدأت اتحرك بالعربية وطبعا اخدت وقت على ما اتعودت على الدواسات وسمعت شكوى من بعض الاعضاء ان الدبرياج عالي انا بصراحة مش فاهم يعني ايه عالي بس انا حاسس ان في حاجة في دواسة الدبرياج وانا ماشي بسرهة واجي ادي غيار بحس كدة ان في رعشة في الدبرياج وانا بدوس مش وانا رجلي عليهم بس وحاسس ان نقطة الفصل اللي بغير عندها قريبة قوي بس لو العربية واقفة لازم اكون دايس على الأخر مش عارف ده طبيعي ولا لأ
نبدا بقة نتحرك بالعربية ونغير أنا عامة سواقتي هادية وبغير عند عدد لفات قليل بالكتير 2.5 وانا عايز اقول شوية ارقام والناس اصحاب الصني المانيوال يراجعو معايا الأرقام دي انا بنقل على 2.5 ار بي ام وبتكون السرعة كالاتي الأول15 والثاني 35 والثالث 55 والرابع 75 والخامس 100 على نفس الار بي ام وعلى السلانسية بيكون الار بي ام عند الشرطة الكبيرة اللي بعد الصفر لو العربية سخنة بدون تكييف وبتزيد حاجات بسيطة مع التكييف المهم طول ما انا ممور الار بي ام مابيزدش عن 1
بالنسبة للعفشة هي بتدب شوية بس مش مزعجة والعربية ثابتة جدا لغاية 120 دي أكتر حاجة جبتها ومابحبش ازود عن كدة والمرة اللي جبت فيها 120 اخدت مخالفة - نحس بقى - بس حاسس ان العربية محتاجة جنوط ونيتروجين هايحسنوا اداء العفشة جدا
الفرامل حلوة قوي وتقدر تعتمد عليها وكمان ال abs ده ممتاز جرتة مرة واحدة والعربية كانت ثابتة جدا في الفرملة بس خفت أول ما العربية عملت الصوت ده بس افتكرت في ثواني ان نظام الفرامل ده بيعمل الاصوات دي طبيعي جدا
استهلاك البنزين حاسس انه عالي شويتين ثلاثة بس هو مظبوط جدا في السفر يعني رحت مشوار لمرسى مطروح وانا رايح فولت من عند كارفور طريق اسكندرية وقطعت حوالي 235 كيلو لغاية مارينا وفولت من هناك لقيتها استهلكت فيهم 15 لتر فقط بدون تكييف وبعدين وانا راجع فولت من مطروح من اول الطريق وقطعت 440 كيلو لغاية الطريق الدائري وفولت من على الدائري أخدت حوال28 لتر تقريبا بالتكييف بس في وسط المدينة بتاكل بنزين كتير قوي لدرجة أني فكرت في الغاز الطبيعي بس بصراحة خايف – ايه رأيكم؟؟؟؟
بالنسبة للحاجات اللي عملتها للعربية ركبت فرش جلد لونين تفصيل من جينز كار وبصراحة شغل 10 على 10 مافيش بعد كدة أحلى من الأصلي بتاعها وخامته ممتازة وتقفيلهم وشغلهم ممتاز وعملت أرضية عندهم برضو اتكلفوا كلهم 1000 جنية والناس مقابلتها حلوة قوي روحت هناك 3 مرات كل مرة اطلع من هناك بهدية اه هي حاجات بسيطة بس بتسيب انطباع حلو عن المكان حاجت زي شماسة فضي وكام واحدة معطر وكام فوطة ناعمة للعربية ناس محترمة بصراحة واشتريت من عندهم طارة جلد طبيعي ب 45 جنية وهما ركبوهالي
وبعدين رحت ركبت وحدات رفع اتكلفوا 150 جنية الاول اشتغلت يوم وفصلت ورجعت للراجل تاني ظبطهم وشغالين لغاية دلوقتي تمام الحمد لله
شوية حاجات كدة تقييم سريع
- نور العربية قوي جدا
- الكاسيت متوسط كان ناقصة usb وريموت
- نور التابلوة ضعيف ولونه قديم شويتين
- التكييف قوي جدا بشغلى على 3 في الحر لمدة 10 دقايق وبعدين 1 أو 2 بالكتير
- فتح الشنطة من الريموت ده حاجة جميلة جدا ومش موجود في عربيات كتير في نفس الفئة السعرية
- الخامات الداخلية متوسطة يعني مثلا مش فاكر كنت باعمل ايه وظافر من ايدي خبط في الباب من جوة راح عامل علامة كدة وخربشة في البلاستيك اللي في الباب من جوة
- مساحة الشنطة حلوة قوي بالنسبة ليا
- نور الصالون اللي بيفضل شغال لغاية لما تدور الكونتاكت ده حلو قوي واول ما تبطل العربية وتشي المفتاح ينور لغاية لما تقفل بالريموت
- مافيش لمبة ولا صوت مع السرعة بعد 120 ودي حاجة بايخة بصراحة
المرة الجاية إن شاء الله هايكون في موضوع مصور بس لما اروح البلد في العيد واغسل العربية غسلة كويسة واقدر اصورها كويس
