م. عاطف عبد السميع .. شكرا جزيلا

**ezzatfox** · 13-08-2010 08:14 PM

بالامس حصلت معى مشكلة فى عربيتى .. نيواكسنت 2009 .. الازاز الكهرباء مش شغال .. و المشكلة انة كان مفتوح و حصلت المشكلة و اضطريت انى اسيب العربية لتانى يوم و هى مفتوحة .
طبعا اتصلت ب 16101 و الكلام دة كان فى الواحدة بعد منصف الليل و متوقع طبعا انى هاسمع جرس و محدش هيرد
فوجئت بخدمة العملاء بترد عليا .. حكيت المشكلة .. قالتلى للاسف يا فندم مفيش حجز لغاية يوم الاتنين .. حاولت افهمها ان دى حالة طارئة و انى مش بتصل عشان احجز ميعاد صيانة .. بردة مفيش فايدة .. قالتلى ممكن تروح مركز خدمة معتمد و هيحل المشكلة .
و قد كان قفلت معاها و اتصلت بمركز حورس اللى فى الزمالك و حددت معاد الساعة 10 صباحا .
وصلت المركز الساعة 10.15 قابلتنى موظفة فى المركز و اول حاجة طلبت منى 50 جنية للكشف .. بتوع اية هو انتوا مش مركز معتمد و انا عربيتى فى الضمان .. لا يا فندم الازاز مش فى الضمان .. ازاى مش فى الضمان .. اصلة فى بعض الموديلات بيطلع من الضمان بعد ال 20000 كم ... و اساسا الكهربائى لسة مجاش .. طبعا حسيت انى فى مركز تعبان محدش فاهم فية حاجة و هضيع وقتى على الفاضى .. سيبتهم و مشيت و طلعت على ابو رواش .
طبعا فى رمضان الموظفين و العمال بيمشوا الساعة 3 و كمان يوم جمعة و الصلاة هتاخد ساعة كمان و انا اصلا واصل الساعة 11 فطبيعى ان يدوب التوكيل بيعمل الصيانات و بس حتى اللى عندة ملحوظة بيثبتها و تتعمل بعدين .
قابلنى المهندس فى التوكيل و شرحلى الموقف و طلب منى يا اما اسيبها تبات فى التوكيل او احاول احجز رسمى فى اى يوم تانى .
اتصلت بالمهندس عاطف عبد السميع و شرحتلة الموقف قالى ادينى المهندس اللى معاك و هما كلمتين لقيت المهندس بيقلى اتفضل و استلمت العربية بعد حوالى ساعتين و نصف شغالة و كلة تمام .
انا حكيت الموقف دة عشان ابين اد اية الراجل دة خدوم حتى يوم اجازتة بتصل بية و مصحية بدرى فى الصيام و مع ذلك و لا قفل تليفونة و لا اتأخر .. بجد راجل قمة فى الاحترام .. و شكرا م. عاطف .