الموضوع: زيارة تكنو وان و مشكلة تكة الفتيس و إستهلاك البنزين

السلام عليكم و رمضان كريم عليكو يا جماعة :))

معلش أنا اتأخرت عليكم في موضوع زيارة تكنو وان بتاعة يوم الأربع بس انتو عارفين أول كم يوم رمضان بقى و كدة :)

المهم أنا رحت قابلت الباشمهندس أحمد الشحات .. كنت مكلمو من أبلها على موضوع تكة الفتيس و إستهلاك البنزين ..

بالنسبة ل- تكة الفتيس، هو قالي إن دي طبعية جداً .. و فك الكونسل مخصوص علشاني عشان يشحمو .. ونا بصراحه و هو بيفك الكونسل كان قلبي بيتقطع أصلاً ونا شيفو بيشيلو .. الكونسل دة ممتد من بلاستيك الفتيس لحد مسند اليد بتاع التخزين إلي مبين الكرسيين، شالو كلو و شحم شوية ال حديدة بتاعت ال لوك.. والتكة مرحتش بس أنا اقتنعت إن د عادي و أمري لله، كفاية احساسي ونا بشوف الكونسول و هو بيتفك، كأن ابنك الصغير بيشرحوه

بالنسبة لإستهلاك البنزين ، إلي حصل بالظبط كالأتي.. الباشمهندس أحمد قالي العداد بتاع إستهلاك البنزين إلي فالعربية د مش Accurate أوي، و إن عشان أعرف الإستهلاك صح لازم أحسب كم كلو فالتفويلة .. التل بس أنا متأكد إن علي جامد.. المهم قالي طيب هنكشف عل بوجهات.. فتح العربية، و طلع البوجهات.. و بعدن و هو ماسك بوجيه في ايدو قالي كدة بالظبط : "هو حضرتك معك الفاتورة بتاعة الصيانة إلي حضرتك عملتها هنا ؟" ألت اه، قالي ممكن أبص عليها ؟ أنا ساعتها مفهمتش أوي أصدو.. بس بعدها جمعت حاجة والله أعلم

المهم جبتها و شافها.. بعدين قالي البوجهات شكلها سليمة ومفيش مشكلة.. طب تعالى ناخد لفة نشوف .. طلعنا بالعربية عملنا ريست للتيمر قام جايب الإستهلاك 15 لتر لكل 100 كيلو.. فاستغرب الرقم لما لقاه كتير كدا بعد شوية لف .. قومنا رجعنا المركز، و دخل العربية المركز و قالي اطلع استريح..

بعدها بشوية نزلت، لقيتو بيقولي غيرنا البوجهات.. قلتلو معقول ؟ طب هي كان فيها حاجة ؟ قالي لأ خالص هي سليمة بس احنا غيرناها عشان نريحك بس عشان منسبش حاجة معملنهش..
قلتلو طيب كتر خيرك، طيب حسابنا كم ؟ قالي لأ ولا حاجة خلص إنت إتكل على الله .. و مخدش مني ولا مليم


والإستهلاك ملحقتش أجرب كويس لأن أول رحلة ليا بعد الموضوع دة كانت لاسكندرية، متوسط السرعة 140 عملت إستهلاك 9.7 لتر لل-100 كيلو .. بس لسة مجربتش أي سواقة وسط البلد فهوافيكو أول مجرب إن شاء الله

و مستني ارائكم بقى في موضوع البوجهات دة

المشاركة الأصلية كتبت بواسطة alzwawy

البوجيهات انا حاسس انها كانت مضروبه و هو غيرهالك لما عرف انها كانت مضروبه
و موضوع اسكندريه استهلاك 9.7 ده افتري انا سافرت من شهر متوسط 140 : 160
و الاستهلاك كان 6.5 و في اوقات كان 6 انما 9.7 دي انا شايفها افتري

أنا حسيت كدة برد .. بالنسبة للإستهلاك، أنا 6.5 دي مجبتهش أبل كدا غير على سرعة 100

المشاركة الأصلية كتبت بواسطة hosamenter

حاسس ان مفيش جديد الاستهلاك كدة عالى فى الطوالى امال جوه البلد هيبقى ازاى

هو لسة عالي بس أرحم مل أول شوية :(

المشاركة الأصلية كتبت بواسطة amr a.salam

موضوع الكونسول دة حصل معايا والسروجي بيركب فرش جلد لأرضية العربية

كان قلبي بيتقطع

بس كتير 9.7 في السفر فعلاً يا محمد (مع اني بيجيلي اكتر من كدة) :)

وتيجي بالسلامة يا باشا من اسكندرية

ربنا يخليك يا عمر باشا الله يسلمك :)

المشاركة الأصلية كتبت بواسطة mohamedaghali

بس يا باشا احسب مع التفويل متعدمتش على الكميوتر بتاع العربيه

منا بعمل كدة والله بس هو فعلاً عالي !

المشاركة الأصلية كتبت بواسطة aaet1

لأ طبعا 9.7 على سرعة 140 كتير، أنا لسه راجع من اسكندرية وأنا رايح كنت على 120 والمتوسط عمل 6.8 وفى الرجوع مابين 150-170 والمتوسط 8.5

بس سؤال حضرتك صفرت العداد قبل ما تتحرك ويفضل عند البوابات

اه والله صفرتو

المشاركة الأصلية كتبت بواسطة donzi

واضح فعلا ان البوجيهات كانت مضروبة

طب انت خدت منهم القديمة ولا لأ عشان تتاكد اذا كانو مضروبين ولا لا ؟؟

لحسن لو طلعو بيركبو مضروب لازم الناس تعرف و تاخد بالها !!!

لأ والله مخدتش القديمة لأن هو عأيرهملي ببلاش يعني مخدش فلوس، فخد القديمة..



عامةً إنهردة إستهلاك بسواقة براحة وسط البلد 10 لتر فال-100 كيلو.. و دة أرحم مل أول بكتير .. مع إن أزيد من زمان بردو