الموضوع: ندمت علشان جبت فيات جديد (جراند - برافو - لينيا )

المشاركة الأصلية كتبت بواسطة Ghamrawy

بصوا انا حاتكلم بصراحة

الحمد لله الموضوع ما وصلش لندم و ضرب جزم و الكلام ده و الحمد لله ان انا اليومين اللى فاتوا كنت بافكر ابيع العربية و اجيب جولف 5 موديل 2009 و لقيت ناس كتيير عايزه العربية بتاعتى منهم من جوه اوماترا و منهم ناس تانية و الخسارة كانت حاتبقى اقل بكتيير من خسارة عربية بتتباع كسر زيرو و بعد 3 شهور من الاستعمال.
يعنى اعادة البيع ممتازة و يوم ما حاتقول يا بيع حاتلاقى و بالسعر اللى انت عايزه مش سعر سوق الطباخيين

الاسباب اللى خلتنى عايز ابيع هى وجود كام حاجة كده مش منطقية سواء فى تصميم العربية او فى تقفيلها و على فكرة انا متأكد ان 99 % من الناس اللى راكبة عربية زيها مش حتاخد بالها من الاساس من الحاجات دى ....بس حاعمل ايه فى احساسى الزيادة ..مش عارف ...المهم

التقفيل :

لما باغسل العربية كلها الميه بتنزل من الشنطة و تقع على البوردة اللى عليها موكيت اللى هيا بتبقى ورا الكنبة على طول و الحمد لله ان السماعات فى الابواب مش عليها

الاقفال بتاعت ضهر الكنبة بتعمل اصوات فى المطبات مع ان ضهر الكنبة مقفول كويس جدا

الطابلوه بيصفر فى المطبات المستمرة يعنى لو ماشى فى سكة مش مستوية و متسفلتة كويس حاتسمع صوته

طبلة باب السواق بتخبط فى المطبات و بتعمل اصوات فعلا قذرة بصراحة

باب السواق بيدخل صوت هوا بعد سرعة 90 و الباب نفسه باحسه انه مش راكب مظبوط يعنى فيه فراغ بينه و بين جسم العربية

التصميم :

العربية فعلا محتاجة تكون اوطى من كده من 2 ل 3 سم

الماسورة الصلب السوده اللى طالعه من الانتركولر لغاية المنافولد !!!!
ازاى تبقى الماسورة دى صلب من الاساس ؟؟ ليه مش خرطوم او ماسورة سيليكون علشان ما تمتصش السخونية ؟؟
20 دقيقة سواقة فى درجة حرارة اكتر من 32 و 33 درجة و تلاقى العربية بقت غريبة ...ابطئ اتقل و تاخد بنزين بشع لو قرصت عليها علشان تجرى و تفتح الكابوت تمسك الماسورة دى ايدك تتحرق ..يعنى التربو بيكبس للعربية هوا بدرجة حرارة مش اقل من 50 درجة

حجم الانتركولر مش كفاية بالنسبة لعربية نازلة فى الشرق الاوسط

الاير بوكس او صندوق الفلتر بتاع الهوا :حجمه صغير جدا و مأخذ الهوا بتاع البوكس ده صغير و من حتة غريبة (من فوق الردياتير و الفتحة فى الشنب بتاع العربية) و ده مقارنة بالاير بوكس بتاع البرافو اللى بنفس الموتور يبقى علامة استفهام سخيفة.

انا عارف ان العربية مش فيرارى او عربية سوبر سبور بس الحاجات دى من وجهة نظرى محتاجة اعادة نظر و ان شاء الله لو العربية فضلت معايا حاغيركل الكلام ده و اشوفله حلول .


الندم بقى و ضرب الجزم و الشلاليت كمان لو التوكيل ما عرفش يحل مشاكل التقفيل دى من غير ما يبوظ حاجة تانية

و فى الاخر ربنا يكفينا شر الحسد

اييييييييه ده كله اييييييييييييه ده كله

يا خبر ابيض

وحضرتك ساكت ازاى على كل ده

ومقلتليش على الحاجات دى ليه