رايح أشتري بروتون ساجا مانيوال إن شاء الله؟؟ هل من نصيحة؟؟

**zegazi** · 14-08-2010 04:00 PM

السلام عليكم

أولاً أحب أعرفكم بنفسي
أنا مصطفى من إسكندرية

أنا بقالي أكتر من إسبوع محتار بين الإسبيرانزا واللوجان
عرفت إن الإسبيرانزا صيني (ومحدش يستغرب

)

عادي يا جماعة لسه خاااااااام ومعرفش حاجه عن العربيات

قلت اللوجان كويسة بس وأنا بشوف التعليقات في المنتدى
لقيت الناس بتشتكي من قطع الغيار والتوكيل

المهم وأنا بدور وأسأل عرفت
إن في حاجه إسمها بروتون

وقلتلكم عادي يا جماعة أنا لسه جديد طاااااازه

المهم بصيت على الموقع بتاع ساجا وقريت عنها كتير
ومستريح لها والحمد لله
وناوي أنزل أتفرج عليها النهارده بعد الفطار

قلت أبص عليها وأفتش فيها وهي على الأرض قدامي

بس عاوز أعرف من أصحاب الساجا المانيوال رأيهم إيه بصراحه

وإيه العيوب والمشاكل إللي ممكن تقابلني

عادي يا جماعه بدل ما أتفاجئ بحاجه مش عارفها

وأشكركم ولو في نصيب ح أكون
بروتوني ساجاوي معاكم

**abdoumahros** · 14-08-2010 11:03 PM

الملخص : الساجا عربيه جيده جدا في فئتها
وعموما يا صديقي مافيش عربيه بالسعر ده ومافيهاش مشاكل بس المشاكل نوعين
النوع الاول وده ربنا يكفيك شره وهوا انه يكون عيب جامد في تصميم العربيه مثلا عربيه بتسخن وده بيبقا صعب
اوي علاجه لانه في تصميم العربيه والحمد الله الساجا مافيهاش عيوب في التصميم
ثانيا عيوب تقفيل او بعض الاجزاء المساعده في العربيه زي ماكينه الزجاج مثلا والعيوب دي سهل علاجها
عن طريق استبدال القطعه التالفه باخري جديده وده بيكون في الضمان
بالنسبه للساجا ظهرت بعض العيوب الفرديه الخفيفهزي زجاج الباب او صوت زنه في التابلوه وايضا عيب في علبه الدريكسيون واكرر موش كل العربيات انا عربيتي مثلا ماظهرش فيها والحمد لله حاجه من دي وكذلك اصدقاء كتير
وعموما التوكيل بيحل كل المشاكل دي بسهوله وبخصوص علبه الدركسيون اذا كانت تالفه بيغيرها في الضمان او لما توصل رساله جديده
بخصوص اداء العربيه فهوا رائع سحبها ناعم وثابته والتكييف جيد جدا
ومعدل استهلاك البنزين في الاول كبير وبعد الالف الاولي بيقل تدريجيا حاليا عربيتي عامله 2000 كيلو ومعدل
استهلاكها 12كيلو لكل 1لتر بنزين داخل البلد وبالتكييف
رايي الشخصي العربيه تعتبر احسن حاجه بالسعر ده
وارجوا ان اكون افدتك

**mo7hamedemad** · 14-08-2010 11:04 PM

- (اهــم المواضيـع عن -Proton SAGA- , مالا تعرفونـه عن الساجــا) -

دة فى كل ما تريد معرفتة وزيادة عن الساجا

**zegazi** · 15-08-2010 01:19 AM

المشاركة الأصلية كتبت بواسطة abdoumahros

الملخص : الساجا عربيه جيده جدا في فئتها
وعموما يا صديقي مافيش عربيه بالسعر ده ومافيهاش مشاكل بس المشاكل نوعين
النوع الاول وده ربنا يكفيك شره وهوا انه يكون عيب جامد في تصميم العربيه مثلا عربيه بتسخن وده بيبقا صعب
اوي علاجه لانه في تصميم العربيه والحمد الله الساجا مافيهاش عيوب في التصميم
ثانيا عيوب تقفيل او بعض الاجزاء المساعده في العربيه زي ماكينه الزجاج مثلا والعيوب دي سهل علاجها
عن طريق استبدال القطعه التالفه باخري جديده وده بيكون في الضمان
بالنسبه للساجا ظهرت بعض العيوب الفرديه الخفيفهزي زجاج الباب او صوت زنه في التابلوه وايضا عيب في علبه الدريكسيون واكرر موش كل العربيات انا عربيتي مثلا ماظهرش فيها والحمد لله حاجه من دي وكذلك اصدقاء كتير
وعموما التوكيل بيحل كل المشاكل دي بسهوله وبخصوص علبه الدركسيون اذا كانت تالفه بيغيرها في الضمان او لما توصل رساله جديده
بخصوص اداء العربيه فهوا رائع سحبها ناعم وثابته والتكييف جيد جدا
ومعدل استهلاك البنزين في الاول كبير وبعد الالف الاولي بيقل تدريجيا حاليا عربيتي عامله 2000 كيلو ومعدل
استهلاكها 12كيلو لكل 1لتر بنزين داخل البلد وبالتكييف
رايي الشخصي العربيه تعتبر احسن حاجه بالسعر ده
وارجوا ان اكون افدتك

وإنت بالصحه والسلامه

أنا متشكر على المعلومات الهايله دي
بس أنا سمعت كمان إن التوكيل مش كويس
ياترى عندك معلومات عن التوكيل وقطع الغيار متوفره ولا لأ

**spiderloking** · 15-08-2010 04:37 AM

حضرتك انا اول عربيه اشتريتها في حياتي هيه حبيبتي الساجا بس انا اللي معايا اوتوماتيك فول اوبشن و الحمد لله بجد عربيه محترمه جدا و احسن كتييييير من اللوجان و الفيرنا و اللانوس مع احترامي لكل هذه الانواع بس بجد بروتون عربيه جامده بجد كفايا الثبات بتاعك و انت بتجري بيها علي 170 و 180 والله ثابته جدا و التكيف فوق الجيد جدا تكيف ممتاز بجد و كمان معدل استهلاك البنزين حلو جدا مش بتسحب بنزين كتير نيجي بقي للعيوب طبعا مفيش حاجه ملهاش عيوب بس انا الحمد لله عربيتي لحد دلوقتي مشوفتش منها حاجه وحشه انا عامل تقريبا لحد دلوقتي 2300 كيلوا بيها بس طبعا زي ما قال الاستاذ عبده انو في عربيات بيبقي فيها عيوب خفيفه و كل ده بيتصلح في التوكيل و بسهوله اما بالنسبه للتوكيل فهو جيد و قطع الغيار متوفره اينعم غاليه حبتين بس الغالي تمنوا فيه و ان شاء الله انا سمعت انو هيرخصوا قطع الغيار شويه لعلي و عسي يكون كلامهم صح

**marroo** · 15-08-2010 10:08 AM

ربنا معاك ياباشا ويوفقك أنِا الله أنا برده هشتريها أنشا الله بس أوتوماتيك علشان طبعا الشوارع بتاعيتنا فى القاهره الفاضية الواسعه الجميلة اللى مش مكسرة ولا بلاعتها مفتوحا
عموما أنا سألت عليها كتير برده وشوفتها على الطبيعه وناس كتير بيشكروا فيها وبيقولوا عليها جميلة جدا
والعيب الوحيد الشائع بين الناس هوا موضوع علبة الدريكسيون ده بس عموما هما كانوا بيغيروه فى التوكيل على طول وكمان دلوقتى لائوله حل عملى وكويس
وفى النهاية ربنا يوفقك ويديك خيرها ويكفيك شرها

**x512** · 16-08-2010 07:25 PM

http://www.nilemotors.net/Nile/101524-a.html
http://www.nilemotors.net/Nile/166731-2.html
بص علي الموضوعين دول يا باشا...دي الحاجات اللي لازم تشيك عليها و انت بتستلم و لو لقيت مشكله في حاجه و خصوصا الدهان متستلمش...بس ان شاء الله مفيش مشاكل و تشتري و تستلم علي خير و ربنا يباركلك فيها و يكفيك شر الحسد