الموضوع: تسعير لانسر 2008 سوببر أكشن

المشاركة الأصلية كتبت بواسطة khaledmekawy2008

حضرتك ممكن تتاكد من كلامي كله عن طريق الباشمهندس طارق تبع توكيل مصرية وكمان حاجة انا عربيتي لما اشترتها انا اتاكدت قبل ما اشتريها انها سوبر اكشن الفرش الجلد بتاع الكراسي والفوانيس الغامقة الامااامية والخلفية الشفافة حضرتك ممكن تسال في معلومة الفوانيس فالخليجي وحضرتك هتعرف ان الخليجي السوبر اكشن بيبقي فيها الفوانيس الامامية غاااااامقة مش شفافة واللانسر السوبر اكشن المصري مع واحد صحبي معايا فالكلية ولما ساق العربية قال في فرق في السحب عندي اكتر من عنده ومش هوا بس والله كام واحد معاه مصري سوبر اكشن يركب عربيتي ويحس بالفرق انا مش بشكر فالعربية بس بتكلم علي مبدا القدرة الحصانية للخليجي اكتر من المصري ...

وزكرت لحضرتك ان الفرق حضرتك ممكن تعرفه افتح كبوت اللانسر المصري وشوف كام ماسورة انجكشن وافتح كبوت اي عربية خليجي وشوف كام ماسورة وده لوحدة بيأثر علي سحب العربية واستهلاك البنزين واركب عربية خليجي وواحدة مصري وشوف استجابة دواسة البنزين وعزم العربيتين ......واختلاف الراي لا يفسد للود قضية وفانتظار راي حضرتك

بص يا فندم هقولك على سر صغير اوي فى اللانسر بالذات
الخليج عموما كمالياته بتختلف عن مصر تماما
طيب خد ده انا منزل عربيه من دبي مره 1300 موديل 2008 فيها كاسيت ماتسوبيشي سي دي مش كين وود
و شفت لانسر كويتى 1600 كلاسيك فيها وحدتين رفع زجاج متسوبيشي
و ده كانت مع واحد صدبقى جدا
و لما سألت ازاى ؟ قالى بكل بساطه انك و انت فى الخليج ممكن تطلب ميزه معينه فى العربيه او اوبشن زياده
و لما كنت انا فى الدوحه كنت عايز لانسر فوق ال1600 الراجل قالى للاسف انا اغيرك اى حاجه فى العربيه او احطلك الكامليات اللى انت عايزها بس مقدرش اغير ماكنه
و ده وجهه نظرى ان الكماليات مش مقياس للعربيه السوبر اكشن او لا
اما بالنسبه لعربيتك ربنا يباركلك فيها يارب و يكفيك شرها ممكن تكون مكنتها اعفى و لكن مش اعلى
لان ببساطه الرخصه هتعكس الافراج الجمركى و الافراج هيعكس مواصفات ملف العربيه اللى هو طالع من متسوبيشي اساسا
و المكنه العفيه هى المكنه اللى مصانه تمام
و بالنسبه للعزم ده بيختلف من الباور هورس و ممكن ده بيختلف فى الكويتى الله اعلى و اعلم
لكن انا ركبت الاماراتى و القطرى و المصري و السعودي
و انا اؤكدلك ان فى لانسر مصري بتتباع على انها سوبر اكشن و هى فى الواقع سبورت و مغيرين الفوانيس و الفرش
و بعدين يا سيدي المهم ان العربيه تكون عاجباك مش اكتر و انت مبسوط و انت فيها
و للاسف اللى بيعمل كل النقاشات ده هى عدم الشفافيه بين البياعين فى مصر و كله بيمشي و السلام
صح و لا ايه ؟
و عموما بقى مابتبعش عربيتك و لا ايه ؟
عايز انا حته سوبر اكشن فابريكه 2008 او 2009
لو بياع قولى و انا هازودلك سعرها ب 75 قرش لو عايز
فكر كويس العرض مغري

المشاركة الأصلية كتبت بواسطة khaledmekawy2008

انا سعيد باالحوار ده مع حضرتك صراحة وهدفنا ان احنا نقدم معلومات لاي حد ناوي علي شراء اي عربية مستعملة لان الناس اللي بتيبع الايام دي بتكبرلك فالعربية بتاعتها ولا كانها عربية ملهاش مثيل والناس بتصدق ويضحك عليها وهي متعرفش للاسف......:oc_sun1[1]:
هدي مثال لحضرتك : واحد صاحبي كان ناوي يشتري عربية مستعمله ومكنش ليه اوي فالعربيات فلما رحنا لواحد معرفة تخيل بيقولك علي عربيته كاملة كله من مجاميعه والعربية مافيهاش اي حاجة اساسا لا كماليات ولا اي حاجة وقعدت اضحك علي كلامة وقلت لصحبي بلاش يشتريها لانه اتخدع بس بمنظرها من بره لانه كان مفيم وموطيها واشتراها غصب عني وده براحته طبعا لانها عربيته بس مكنتش راضيهاله تماما ودلوقتي بيضرب كف علي كف انه مسمعش كلامي فانا ليا تجارب كتير جدا مع التجار ومحدش يقدر يضحك عليا واللي بيفكر يحور عليا ويقولي العربية فيها وفيها واكتشف انه مفيهاش حاجة بكسفه في ساعتها ومبيقدرش يتكلم لانه مبيكلمش افندي :oc_sun1[1]:

تخيل حضرتك واحد قريبي من كام يوم كان هيلبس لانسر موديل 2006 هاف سبورت سودا مخبوطة فالاكصدام والكبوت وعاملة 60 الف وكان هيشيلها ب 85 الف شفت النصب بتاع التجار وصل لغاية فيييييييين؟؟؟؟؟؟؟ بس الحمد لله انا لحقته وعدلته عن قراره وجبتله عربية كورولا 2007 1300 سي سي عاملة 20 الف بس ب 95 الف فابريقة جوه وبره و2 ايرباج واتوماتيك وفيها زينون كانها زيرو بالظبط والله........

اما بالنسبة لعربيتي فهي متغلاش علي حضرتك .....والحمد لله انا عامل صيانات العربية كلها فالتوكيل من اول الالف كيلو لغاية دلوقتي بس انا مبفكرش فالبيع لانها معايا بحالة الزيرو الحمد لله والمكنة زي ما هي زيرو واي حد بيسوقها مقولش لحضرتك بيستغرب والله من نعومة المكنة وعزمها ومن غير مجاملة والله انا كسرت حاجز ال 200 بعربيتي كام مره وبعدي اي عربية 1600 في فئتها عدا السيفيك(رحم الله امرئ عرف قدر نفسه):b4_611:
واسف علي الاطالة

يا باشا اطاله ايه بس و لا يهمك
انا اللى سعيد ان الناس و الله تحب تتناقش و تفهم ده حاجه بقت نادره النهارده
و بالمناسبه ده احكيلك على موقف ظريف اوي
رحت لتاجر عنده عربيه المفروض انه قالى فى التليفون 2008 سوبر اكشن و الكلام ده كان من جوالى اسبوعه تقريبا
المهم رحت ببص على العربيه قلتله هى سوبر اكشن و لا اسبورت
قالى لا سوبر اكشن
قلتله اشوف الرخصه
قلتله يا حج العربيه ده سبورت مش اكشن ده اولا
ثانتيا مغيره جوز فوانيس ادام
و ملونه فوانيس ورا
فيها بويه يا حج ؟
قالى لا زي الفل الكماليات ده ترويش بس لكن الحاج 000000 مايشتريش عربيه فيها بويه ابدا
قلتله خلاص بسم الله توكلنا على الله و نتفرج
هما 10 دقايق بالظبط و قلتله بقول ايه يا حج العربيه ده ما تلزمنيش اصلا هى مطلوب فيها كام قالى 93 الف جنيه
قلتله و لا 3 الاف جنيه
قالى ليه بس و الحكايه و الروايه طب ده حتى فى زبون فى المكتب عايزها على 92 لو انت مش شاري
قلتله فين ده يا حج قالى اللى قاعد جوه ده
دخلت المكتب قلتله انت عايز تشتري اللانسر ده قالى اه
قلتله على كام قالك قالى على 93 و هى ماشاء الله شكلها تحفه
قلتله اه فعلا تحفه بس مغيره فانوسين قدام و بيقول عليها اكشن و هي اسبورت و فيها خبطه فى الشنطه ورا جايبه نص الشنطه يمين و الاكصدام
و الشنطه مشدوده بزرجينه واضحه اوي من الحوض و باينه فى الفلتو بتاع الشنطه من تحت النمر
و الاكصدام ورا مرشوش كله و للاسف اللى رشه غرقه معجون عشان كده البويا عاليه اوي
و فى الرفرف الامامي بقى شمال ده متغير تماما و اللى راكب ده التيوانى مش اليابانى
بس هى كبوت سليمه لكن السربنتينه من قدام واخده خابطه بس ربنا تقريبا ستر فيها
عموما الف مبروك عليك
و سلامو عليكم
ده الشعب المصرى اجدع شعب يلبس الزبون
و عموما فكر فى عربيتك هازودك جنيه وربع ههههههههههههه
انا بهزر على فكره و عموما لو لقيتلى حته اكشن ابقى قولى انت من الزقازيق يعني جنبي لانى انا من طنطا

المشاركة الأصلية كتبت بواسطة khaledmekawy2008

تشرفت بمعرفة حضرتك واهلا بحضرتك وبكل اهل طنطا وان شاء الله لو لقيتلك حته سوبر اكشن هقولك علطول بس انت هل هيفرق معاك عدد الكيلوهات وهل يفرق معاك وكيل او خليجي ؟؟؟عشان ابقي عارف لو لقتلك حاجة؟؟؟

يا فندم انا اللى تشرفت بيك جدا
بص انا عايز حاجه 2008 او 2009 يستحسن لون فاتح فضي او شامبين و ده يستحسن يعني مش شرط اكيد
و طبعا كيلوات معقوله يعني مش هاقولك 1000 كيلو و لا هاقولك 80 الف كيلو مثلا بس فى الوسط اللى هو يعني تكون عربيه جديده لسه من الاخر عايز عربيه كسر زيرو اما بقى وكيل او خليجي فايهما مش فارقه المهم اكشن كسر زيرو و بس على كده

المشاركة الأصلية كتبت بواسطة khaledmekawy2008

تمام حضرتك كده وان شاء الله هدورلك واشوفلك عربية تكون تمام وصاحبها يكون محافظ عليها واي جديد هقول لحضرتك علطول ان شاء الله

تسلم يا فندم جدا و اى سؤال برده انا موجود