يا جماعة دي أول عربية ليا... سيراتو؟
يا جماعة أنا عامل موضوع تاني ف ركن الشيفروليه عشان بفكر ف كروز، ولكن بعد ما سمعت عن صراخ الناس من منصور قلت أدور بقيت الأوبشنز ايه؟
أنا من الاّخر كان أخري 110 ألف وكنت هتصرف عشان أجيب أول كروز أوتو بـ116، ودلوقتي خايف برضه.
السيراتو نظامها ايه؟ انا بفكر ف تاني اوتوماتيك أم 116 برضه، هل ده اختيار كويس؟ العربية كويسة؟ أنا تربية خليجي وبعامل العربيات وحش شوية ودي هتبقى أول عربية أشتريها من حر مالي. ومش هتتخيلوا أنا مرعوب قد ايه، والله ما نمت بقالي 3 أيام بلف ع المعارض والتوكيلات.
حد يقوللي بأمانة السيراتو عيوبها ايه؟ بيطلع فيها عيوب صناعة؟ الدبدبة اللي ف العفشة محسوسة قوي؟ واحد ف المهندسين النهاردة قاللي خد الجنط الـ16 وهترتاح، الكلام ده فعلا؟ نمرة في الجنط تفرق ده كله؟ االهوا بيصفر فيها فعلا بعد الـ100كم؟ صوت موتورها مزعج فعلا بعد الـ120كم؟ أخبار الوكيل ايه؟ هو مين أصلا (جاهل معلش)؟ قطع الغيار مبالغ يها؟
واحد زميلي راكب كارينز وعمال يغني بجمالها ونعومتها، ايه النظام؟
والله ما هحكم على حد، ابعتولي ع الخاص لو مش عايزين تسييح لعيوب العربية، والله ممكن اروح فيها لو دفعت كل اللي حيلتي ف عربية معيوبة، انا فعلا مش بنام.
أختي لسه مستلمة فيات بونتو ايفو الجديدة، والعربية ما شاء الله تحفة، أول فئة اوتوماتيك بــ99 ألف و حتة سكرة بس أنا طماع وعايز عربية كبيرة بصراحة، وكمان خايف من صيانة وقطع غيار الأوروبي.
الفلوانس بعيدة عن شواربي عشان المانوال بـ 120 ألف.
معلش طولت عليكم ومستني الردود.