المشكلة في الجراج إن السايس بفتح التكييف وينام في العربية فترات طويلة ومافيش حل معاه نظرا لعدم وجود اماكن أخري لذلك هل يعلم أحد طريقة غلق التكييف بحيث لا يفتحه أحد غيري
وهل طريقة نزع فيوز التكييف تصلح أم لا وما هي عيوبها ورقمه كام الفيوز الخاص بالتكييفي في النيو أكسنت إن وجد
رجاء شديد البحث في هذا الأمر نظرا لمشاكل كتييييير هتحصل من هذا الإسلوب في التعامل مع السيارة
وحسبي الله ونعم الوكيل
شكرا
ايه ده ؟! شيء غريب فعلاً .. خذ منه المفاتيح .
طبعا صح ازاى تسيب له المفاتيح استحالة اسيب للسايس مفتاح عربيتي ولا هو ولا لاى حد غيره في اى مكان العربية زى البيت بالظبط بالنسبة لفصل التكييف مش عارف انا لو مكانك هاكهرب العربية بس حاول تاخد منه المفاتيح ومش تسيبهالوا ولو ما نفعش علشان الجراج صف عربيات قدام بعض حاول تشوف جراج تاني علشان كدة حرام استهلاك بنزين والبطارية احتمال تناماقتباس:
المشاركة الأصلية كتبت بواسطة د.محمود صلاح
خد منه المفتاح طبعا
دا احسن حل
ياعم انا كنت دوسته بالعربيه - دا لو فكر يفتحها مش ينام فيها وبشغل التكييف
انا دمى غلى ياراجل حرام عليك - الله ماانى صائم
طبعا خد منه المفاتيح وكسر دماغه
انت الغلطان مش السايس
انت تفكر تغير مكان العربيه مش تلاقى حل تتحايل بيه على السايس علشان ميشغلش تكييف العربيه
اقتباس:
المشاركة الأصلية كتبت بواسطة ckamelo
اعمل تصفير لعداد الكيلومترات العادي من الزرار
لانة اكيد ها يدور العربية ويشغل التكييف .. بمعني انه مش ها يشغل التكييف علي البطارية طبعا
وتتفق مع السايس انه العداد متصفر ولو انتا لاقيتة متغيير درجة (( ها تمسكة تبهدلة ))
ولكن ماتتنازلش عن مكان الجراج وتسيبهوله
بالادب والزوق يعني وبدون صوت عالي فهمة القصة واستفيد بمكانك وماتسيبهوش لحد
وشكرا
اخوك
أشكر النصائح المفيدة التي تفضلتم بها
ولكن كما تعلمون أن أصعب شيء بعد ما تشتري الغربية إنك ماتلقيش مكان تركينها فيه ودي مصيبة المصايب في القاهرة ولما تلاقي مكان في جراج بتكون هدية من عند ربنا والسيد القائد الأعلي للجراج الساسي باشا له حقوق كتير منها قبولك او رفضك ولو تدخل أي فرد حتي لو صاحب الجراج ببساطة ومن غير مايعمل حاجة بإيدة ممكن يتسبب في مشاكل للعربية والكل عارف علشان كده لازم تحلها سلمي أو تقبل البحث لساعات علي ركنة وترجع تلاقيها يوميا فيها مصيبة وممكن ماتروحشي شغلك لإن فيه واحد بذكاء وقف أمامك وغيرة من الأخر ده أفضل حل ويجب التعامل مهاه سلمي وبذكاء
شكرا جزيلا
وليه تدوسه اربطه في العربية واجرى بالعربية واتوصي بالحفر والمطبات :049::khd: الحل فعلا ما تسيبش المفاتيح له تانياقتباس:
المشاركة الأصلية كتبت بواسطة memo823000
لو انت متاكد انه بيعمل كده او شفته او سمعت من حد من السياس التانيين.
يبقى فى حلول بسيطة:
-صاحب الجراج او شفلك زبون من الزباين اللى معاك وقولهم اللى بيحصل معاك واكيد مع غيرك.
-لو تعرف تنزل وقت ما بتكون شاكك انه بينام فى التكييف وتفتح عليه الباب وتمسح بكرامته الارض.
-اتاكد كويس انه بينام فى التكييف وصحيه براحة خالص وقوله كده مينفعش ومتعملش كدة تانى وانت مش طايق نفسك.وبعدها بيوم او اتنين تقوله حضرلى العربية عشان رايح التوكيل اعمل صيانة.وترجع متنرفز وتقوله كلملى صاحب الجراج على التيلفون او لو موجود تكلمه وتقوله اروح اعمل الصيانة النهاردة الاقى البيه السايس بتاعك مشغل التكييف وحارق الموبينة او اى حاجة بقى ومخلص الفريون وده هيتكلف 600-700 جنيه.شوفوا بقى مين هيدفعهم.ولو ادفعوا قوله خلاص انا حتحمل الموبينة وانتوا ادفعوا الفريون وخلى التوكيل يملهولك تانى.
اهم حاجة اتاكد انه بيعمل كدة مش السياس بيضربوا فى بعض
بصراحة انت طيب جداً
انسخله ع المفتاح من غير تشفير يعنى انسخله مفتاح عادى عايز يحرك العربيه يحركها زق لانها مش ممكن تدور بالمفتاح الى بدون تشفير
هه هه هه هه (ضحكه شريره)
سيبك من كل الردود دى
ما دام المشكلة قائمة و لازم تسيب مفتاح معاه
الحل تعمل مفتاح لتشغيل التكييف او فصله و يكون تحت التابلوه و دا انا شوفت واحده عملاه فى عربية فيرنا
عن طريق المفتاح دا هو لما يشغل مروحة التكييف و يترزع فى العربية مش هيلاقى اى حاجه شغاله علشان الزرار انت فاصله
انا مهندس ميكانيكا و كنت شغال فى الصيانة عدت عليا عربية فيرنا طلعت عينى و اتأخرت ساعه عن ميعاد خروجها و كل دا علشان احل مشكلة التكييف لانه مكنش بيشتغل و فى الاخر صاحبة العربية قالتلى انت بتحاول تشغل التكييف؟ قلتلها اه دا مغلبنى و فيه مشكلة
قعدت تضحك نص ساعه و فى الاخر قالتلى اصل انا عامله مفتاح مخصوص للتكييف و كمان تحت التابلوه
اعتقد هى فى نفس موقفك دا
خلي بالك، حضرتك، إنت حنى لو وصلت لحل في تشغيل و فصل الكمبريسور، هتفضل مشكلة التكييف الدافئ في الشتاء لأن التكييف الدافئ لا يحتاج الكمبريسور. إذا كنت مصمم إنك تحلها عن طريق العربية مش السايس، يبقى ركز على تحكم خاص في المروحة لأن هي اللي مشتركة بين التكييفين البارد و الساخن و ضرورية للإتنين. و أنا أختلف مع فكرة عمل كنترول تحت التابلوه عشان كده التوكيل هيقوللك لعبت في الكهربا و تتطلع الكهربا من الضمان. أعتقد الحل في إنك تشيل فيوز المروحة حل بسيط، و مش مؤذي للعربية.
اقتباس:
المشاركة الأصلية كتبت بواسطة m_mekkawy
:S_thum1[1]: الراجل ده بيقول كلام زى الفل
No immobilizer in the accentاقتباس:
المشاركة الأصلية كتبت بواسطة haroun707
يا جدعان اية الى انتوا بتقولوة دا فيوز مروحة اية و صفر عداد اية ؟؟
فيوز المروحة هيمنع المورحة من انها تشتغل مش التكييف
العداد دا عداد كيلو متر مش عداد موتور
انت اصلا لية بتسيبلو المفتاح ؟؟؟ يا عم اصلا انت بتتكلم بمنطق غريب
دا اركنها فى خرابة و لا اسيبش العربية لواحد يستهلكلى البنزين و الزيت و المكيف
ام الجراج لام السايس لام الى عاوز يركن لو هى دى النتيجة
يعم طب تلاتة بالله العظيم انا لو سمعت ان عربيتى بتتفتح بس
انا اقل حاجة اعملها انا كنت سايب فلوس فى العربية و لاب توب فى الشنطة و اعمل محضر اثبات حالة فى القسم
او اطلع تلاتة ام السايس على صاحب الجراج علشان يتسحلوا هما الاتنين فى القسم
و يا يدفعوا يا يتظبطوا و كدا كدا السايس هيتظبط و صاحب الجراج هيمشى الكلب الى عامل بلطجى و يجيب واحد غيرة يبقى زى الى فى رجلة لانة عارف ان الى قبلة اتظبط
ولو حتى مشيش السايس تروح عاملة محضر عدم تعرض و بكدا لو حتى راكن عربيتك فى المقطم و انت ساكن فى القناطر و اتجرحت ممكن تقول ان السايس اليى عمل كدا او مسلط حد
بمعنى اصح حتى لو السايس فضل موجود هيبقى بودى جارد على عربيتك انما اية ............................
...................................
.................................
يا اخى دا انت فطرتنى يا اخى حرام عليك
لقد حصلت على انذار ووقف اسبوع لمخالفتك القاعدة 13 من قواعد المنتدى
يرجى مراجعة قواعد المنتدى
1:30pm 22/8/2010
المشرف العام 5
انت راجل محترم ومسالم اوى والله
ده انا لو مكانك مشكلتى انى معنديش صبر كنت خليته يقول انام فى جوه فى فرن البوتجاز احسن ليا
دى ناس باردة واحسن حل معاها تديها فوق دماغها صح ولما يخاف منك هيعمل كل اللى انت عاوزه وانت حاطط رجل على رجل ويخاف يدخل العربية حتى
طبعا زى ما كل الاخوه قالوا.. انت اساسا سايبه يتصرف فى عربيتك ليه