واضح من المشاركات كلها في الموضوع ان الناس فعلا عندها خوف لا نهائي من دكاتره الاسنان
يا جماعه الموضوع مش بيكون صعب الا لما انتو تصعبوه علي نفسكم
في الاول بنبدء نقول غسيل الاسنان يوميا 3 مرات بعد كل وجبه مره
و ببناشد بتقليل الاسناكس -الوجبات الخفيفه - و اللي غالبا بتكون شيبسي و شوكلاتات و حلويات بأنواعها!!!
و اللي مش بيقدر بنبه علي غسيل الاسنان قبل النوم علي الاقل
و غير ده و ده زياره دوريه كل 6 اشهر لدكتور الاسنان
يعني مرتين في السنه
زيارتين بس لدكتور الاسنان كل سنه كافيه جدا جدا
المشكله ان مشاكل الاسنان عاده بتبدء بتسويس بسيط جدا جدا او بمشاكل تراكم الجير
و لو السنه او الضرس اتلحق بدري بيكون الحل في حشوه صغيره و بدون الم و بتكلفه منخفضه جدا
انما الحل عند الغالبيه العظمي من الناس بتكون في قرص او قرصين مسكن
فعلا الوجع بيروح في ساعتها
لكن الاساءه الموجوده لمينا الاسنان بتستمر في التواجد
و ده بيؤدي الي تأكل طبقه العاج و مع مرور الزمن بتتكسر السنه او الضرس
ده غير التهاب العصب اللي بينتج عن تقدم التسويس و انحسار طبقه المينا عن السنه
و ده ممكن يتم بدون الم علي فتره طويله
و ساعات خصوصا لما العصب بيكون لسه محاط بطبقه العاج بيلتهب العصب و بيسبب الم رهيب غير محتمل
و في الحالات المتقدمه دي بيكون الحل للحفاظ علي السنه هو ما يعرف ب تمويت العصب-حشو عصب
و الطريقه المتبعه بتختلف علي حسب اختلاف الحاله انما بالاساس بتكون هي نفس الخطوات الموجوده بالفيديو المرفق بالمشاركات
و فعلا بعد حشو العصب و بالذات للضروس الخلفيه يتم عمل طربوش حفاظا علي السنه او الضرس بس بعد مرور فتره اسبوعين الي تلاته للاطمئنان علي حشو العصب نفسه
لأن في حاله اجراء حشو العصب السنه بتفقد الجزء الحي فيها - و هو العصب- و ده بيتبعه ان العاج بينشف و مش بيكون طري زي الاول و ده ممكن يشبه ان طبقه العاج بتكون اقرب ما يكون لطبقه زجاجيه
و في حالات اخري بنلجأ لازاله العصب لسنه او ضرس سليم و ده بيكون علي حسب الحاله
و نصيحتي للاعضاء
اغسل سنانك 3 مرات يوميا
و بالذات قبل النوم
زياره دوريه كل 6 اشهر لطبيب اسنانك لأزاله طبقات الجير المتراكمه و مراجعه علي الاسنان عموما
لو عندك السكر ارجوك اهتم بيه و في الحاله دي ممكن تزور طبيب اسنانك كل 3 شهور كنوع من انواع الوقايه لا اكتر
الخلع مش هو الحل
يمكن يكون الاسرع و الارخص حاليا
بس مقدمه سخيفه لمشاكل كتير جدا و مكلفه جدا جدا فبرجاء محاوله الحفاظ علي الاسنان الطبيعيه قدر الامكان
و بالنسبه للاعضاء الاباء و الامهات :
في سن ال 6 سنوات يبدء ظهور اول ضرس دائم للطفل و ده ناس كتير من الاباء و الامهات بيفتكروه من الضروس اللبنيه
الضرس ده اكتر ضرس بيتعرض للتسوس في الاطفال نظرا للاهمال فبرجاء المحافظه عليه بالذات
و حاجه كمان
اسنان الاطفال اللبنيه مش بسيطه قوي ان لما تسوس نخلعها
الاسنان دي بتكون تحتها بذور الاسنان الدائمه (ان صح التعبير بالعربي) و اي خراج او التهاب ممكن يؤدي لفقدان السنه الدائمه
و محاوله خلع اسنان الاطفال قبل اوانها (و دون استخدام اجهزه حفظ المكان) بتسبب في لخبطه و اعوجاج الاسنان الدائمه و الطفل ده بيحتاج تقويم للاسنان بعد كده علشان نرجع الاسنان لمكانها الطبيعي (و التقويم لمن لا يعلم بيتكلف كتير و بيحتاج متابعه طويله)
فبرجاء الاهتمام بغسيل اسنان الاطفال و متابعتهم عند دكتور الاسنان (و مش لازم تخوفوهم و تقولولهم بس للدكتور يديك حقنه -- بلاش ارهاب في الاطفال الله يكرمكم بلاش تعقدوهم -- احنا بنعرف نتعامل معاهم و عموما الاطفال اكتر استجابه لدكتور الاسنان عن البالغين او يمكن ده اللي لاحظته انا)
و معاتبه لبعض الناس
رائحه الفم الكريهه بتكون بنسبه كبيره جدا ناتجه من تسوس و تلف الاسنان و التهابات اللثه و لو عندك المشكله دي ارجوك اهتم باسنانك اكتر من كده
و انا موجود لو حد عنده استفسار بخصوص اي مشاكل بالفم و الاسنان