أروح لمين عشان أعمل فحص شامل لانوس 2 مو 2005

**azakareya** · 15-08-2010 05:03 PM

السلام عليكم
عندنا عربية لانوس 2 مو 2005 و واحد صاحبي عايز يشتريها, بس مش عارفين نروح نفحصها فين .. يا ريت مساعدة بمكان يكون في مدينة نصر أو مصر الجديدة.

**محمد الشامي** · 15-08-2010 07:23 PM

للاسف المكان الوحيد اللي بثق فيه في الهرم , وده بعيد عنك , بس هقولك عليه لغايه لما حد يقولنا على مكان تاني قريب ليك

في بدايه شارع الهرم وانت طالع من النفق وبعدها بخمس دقايق بالظبط , هتلاقي بنزينه شيل على اليمين و واحده تانيه ادامها على الشمال

ادخل اللي على اليمين وقولهم عايز اعمل كشف عام على العربيه

هيكشفولك على العربيه حته حته (عفشه , صاج , موتور , كل شئ) وهتاخد منهم تقرير مطبوع بحاله العربيه , ولو في اي عيوب هتلاقيها مكتوبه في التقرير وكمان المهندس المسئول هيقعد يتكلم مع اللي هيشتري ويقوله على اللي فيها بمنتهى الامانه واحيانا بيقوله على تكلفه اصلاح العيوب دي

والكلام ده كله بـ 100 جنيه , بس بأمانه مش بيسيبوا فتفوته في العربيه

مواعيد العمل من 9 الصبح , لـ 9 بالليل , وانا شخصيا مجرب البنزينه دي كتيييييييييييير والحمد لله انقذت الواحد اكتر من مره ورفعت راسه اكتر من مليون مره :-)

اتمنالك التوفيق بإذن الله

**azakareya** · 16-08-2010 08:31 PM

جزاك الله خيراً يا أخ محمد .. الظاهر كده أنا هاضرب المشوار ده لو ما حدش تاني قال على مكان أقرب .. كل سنة و أنت طيب

**محمد الشامي** · 16-08-2010 08:34 PM

المشاركة الأصلية كتبت بواسطة azakareya

جزاك الله خيراً يا أخ محمد .. الظاهر كده أنا هاضرب المشوار ده لو ما حدش تاني قال على مكان أقرب .. كل سنة و أنت طيب

وانت طيب يا استاذي :-)

وان شاء الله حد يفيدك بمكان قريب منك
لو فرضنا ان مفيش حد افادنا , فـ راحه البال اللي هتحسها بعد ما تضرب المشوار ده هتنسيك بُعد المسافه بينك وبين الهرم :-)

**azakareya** · 24-08-2010 02:28 PM

المشاركة الأصلية كتبت بواسطة mcit

فى واحد فى المريوطية اسمة ناصر وكان شغال فى توكيل دايو واشتغل مع الكوريين وصنعتة نضيفة ومريح فى تعاملة

وبقالى 7سنين معاه ومريحنى جامد لانةامين

ورقم تليفونه0107544406

سبحان الله وبحمدة
سبحان الله العظيم

جزاك الله خيراً و كل سنة و انت طيب

**tarek_2005** · 24-08-2010 03:22 PM

علي ما اتذكر فيه محطة بنزين وانتا خارج من سوق سيارات العاشر بمدينة نصر وانتا رايح في اتجاه الدائري حتكون علي شمالك بتعمل الكشف ده بس ماتروحش يوم جمعة او حد لانها بتبقي زحمة اوي وبيبقي الشغل سلق بيض