خلاص السولار هيغلى ومن بعده البنزين ؟؟

**M_HaFeZ** · 05-03-2008 10:32 AM

النهارده من الصبح تظاهرات على معظم بنزينات اللى فيها سولار ومفيش سولار واللى عايز يمون والكلام من سواق ميكروباص اقصى حاجه 20 ليتر فقط وفعلا فى الطريق البنزينات اللى على الاوتوستراد زحام شديد من ميكروباصات وعربيات نقل ومفيش سولار

اظن خلاص السيناريو اللى اتسرب هيتنفذ تقليل حجم المطروح من السولار حتى ينتهى كل المخزون فى البنزينات ليتم نزوله بالسعر الجديد .. وطبعا عدم جنى ارباح من بيع القديم بالسعر الجديد .

حد عنده اخبار تانيه ياراجله . ده السيناريو اللى متوقعه فى الكام يوم دول

**sherif80** · 05-03-2008 11:01 AM

ده فعلا فيه حاجة لأن السولار قليل بقاله كام يوم و النهاردة شفت طابور طويل من الميكروباصات و عربيات النقل على محطة بنزين فى الاتوستراد
ده البنزين لو غلى تانى حتبقى مصيبة

**M_HaFeZ** · 05-03-2008 11:04 AM

يبقى متبقاش متفائل واستعد للغلاء
التوقعات ان سعر الليتر 92 هيكون 175 قرش وفى كلام ان ال 90 هو اللى هيكون ب 170- 175 قرش

**sherif80** · 05-03-2008 11:07 AM

المشاركة الأصلية كتبت بواسطة M_HaFeZ

يبقى متبقاش متفائل واستعد للغلاء

اسمها متبقاش متفائل و استعد للهجرة

**M_HaFeZ** · 05-03-2008 11:13 AM

ياريت العمليه بالسهوله دى ياشريف
فى حسابات كتير اوى منها البلد اللى هتروحها ومدى تأقلمك فيها ومنها لو متجوز او لا ولو عندك اطفال ولا لأ
ومهما كان هتبقى فى البلد دى اجنبى لان كرامه المصرى مهانه داخل وخارج بلده
يوم ماهتحصل لك مصيبه محدش هيعترف بيك ولو روحت سفارة بلدك محدش هيعبرك

صدقنى انا من اشد مؤيدى فكره الهجره بس زى ماقولتلك حسابات كتير اوى

**ahmedsamir79** · 05-03-2008 12:25 PM

كتا كتييير أوووووووي

الرحمه

**sherif80** · 05-03-2008 01:45 PM

ده لو البنزين او السولار غلى حتبقى كارثة - ده الناس يدوبك مستحملة الاسعار دلوقتى بالعافية

**TaoTao** · 05-03-2008 01:54 PM

أيوة أنا رايح الشغل مشي لأن مافيش ميكروباصات في الطريق، والبنزينز اللي في شارع السودان عليها طابور طويل سادد الشارع، مشيت من محطة المطار لغاية ميدان لبنان عشان الاقي حاجة أركبها (ده غير إن الطريق من المطار للبنان واقف بسبب التزاحم على البنزينة) والميكروباصات ابتدت تنادي نص المسافة، يعني بالعربي الأجرة اتضاعفت من قبل ما السولار يغلى
ربنا يرحمنا

**fady.bekatcho** · 05-03-2008 03:29 PM

فعلا يا غالى انا كنت مسافر يوم الجمعة والمكروباص الى سافرت فية ما كنش عارف يمون سولار نهائى كل بنزينة نروحها ما فهاش لغاية ما وصلت مصر ما كنش مون وطبعا ستر ربنا ان العربية كان فيها الى يكفى الطريق

شكل السيناريو هيتنفذ فعلا

**Ghamrawy** · 05-03-2008 04:56 PM

المشكلة مش فى الغلاء لان الغلاء نسبى يعنى كل ما دخلك يزيد كل ما شعورك بالغلاء حايقل يبقى المشكلة الحقيقية فى الدخل علشان دخول الناس فى البلد دى ضايعة فاى حاجة حاتبقى غالية علشان بتقص نسبة محترمة من دخلك و على راى صديق فرنسى لما جه بعثة فى مصر لمدة سنتان احتياجاتنا فى فرنسا تمثل جزء من دخلنا اما فى مصر فادخلك يمثل جزء من احتياجاتك
our needs is part of our money in egypt your money is part of your needs
الفقر الفقر الفقر هى دى المصيبة و حكومة رجال الاعمال مش واخدا بالها او على الاقل عاملا كدا