الموضوع: تركيب تيربو لسيارتك

ربنا يوفقكم

شوفوا يا جماعه
نتكلم كلام العقل والهندسة
الكيت بتاع التيربو لازم يكون فيه انتركولر
ليه لان الجو فى مصر اعتقد خلاص بقى زى الخليج الصيف حر بصفة مستمرة
يبقى انا محتاج ابرد الهوا اللى من ضغط التيربو سخن طبعا بالاضافه انه سخن اصلا لو دخلته على المحرك من غير ما يبرد تبريد جيد اكيد هيسخن المحرك جامد
ده معناه ارتفاع درجه حرارة سائل التبريد
تسلخات بالبستم والشميز
حسر فى اطراف الصبابات
و و و و و و و حجات كتير
طيب ليه ادخل فى المتاهه دى بالاضافه الى ان السيارة التى يركب بها تيربوا لازم تزيد سعه سائل التبريد فيها على الاقل 2 لتر وكمان يزيد السطح المبرد اللى هوا الرادياتير على الاقل 20%
ده الكلام اللى يخلى اى عمليه تربنه لمحرك تنجح
منغير الكلام ده ومش عايز اقول انجين مانجمنت كمان علشان نعرف الكمبيوتر ان المحرك ده ركب له تيربو
وهنزود قدرة الفرامل علشان نعرف نوقف العربية دى على السرعات اللى هيوصلها التيربو
المنظومة لازم تبقى متكامله او هتلاقى شكاوى زى العربية بتسخن وبتغلى او وش السلندر ساح
البساتم انشرخت
الصبابات علقت او انكسرت العربية فراملها ضعيفه علبة الشكمان انفجرت
فا اللى عايز يركب تيربوا لازم يبقى مسستم نفسة على كيت كامل
والكيت الكامل بيتكون طبعا من التيربوا وفالفاته وخراطيمه ومواسيرة كامل وكمان هيدر اللى بيركب عليه التيربوا وده ليه وظيفه تانية انه بيوسع مجارى خروج العادم اللى هيستقبل من 40% الى 60% زيادة عن الطبيعى وده اللى بيسخن العربية كمان وبيفجر علب الشكمان العادى
وبيبقى فى كيت فرامل امامى عبارة عن اسطوانه مهواه سمك وقطر اكبر مع كاليبر فرامل بمساحه تيل اكبر علشان توقف الغول اللى هينطلق بتيربو
وكمان مموعه فلتر هواء كالمه بمواسيرها ووصلاتها اللى هتغذى التيربوا بهوا تقريبا 3 اضعاف التغزية الطبيعيه للمحرك العادى علشان يعرف يملى ويضغط حيز الاسطوانات
يبقى اللى عايز يركب تيربوا صح يجيب كيت صح
وعلى فكرة يفضل وجود مروحه تبريد للانتركولر لان احسن درجه حرارة لملاء الاسطوانات بين 60 الى 80 درجة مئوية
اتمنى اكون افدتكم
ومستعد لاى استشارة او عملية تركيب بس انا مش هاركب غير كيت كامل صح علشان ما حدش يزعل
وما فيش زى الاخوه اللى بيقولوا مثلا انا عايز ارفع قوة العربية ل 150 حصان يعنى ايه الكلام ده هو عداد ببتظبط؟ لا يا ساده التيربوا بيرفع قدرة العربية بنسبة
وعلشان تعرفوا انا ساعات باركب 2 تيربو خاصى فى عربيات الصحرا ليه لانى باظبط البوست بتاع واحد فى الغالب بيكون اقل فى القطر من التانى علشان يبدأ فاعليته من عدد لفات محرك قليل من 1000 لفه مثلا لانى فى الصحرا باحتاج عزم عالى على سرعات واطية
والتانى بيشتغل مثلا بعد 3000 لفه
الموضوع بيدرس تماما وايه اللى انت عايزة من التيربو
فى ناس كتير قابلونى علشان اركب لهم تيربو واقنعتهم انهم مش محتاجين تيربو فى حاجات كتير غير التيربو تديهم اللى هما عايزينه
صدقونى الموضوع مش مراية حلوه هتركبها
لان التربو بيقصف عمر المحرك للنص فالموضوع محتاج تأنى مش موضه يعنى
عارفين جالى واحد مره ب 128 عايز يركب تيربو 5 بوصة وجايبه معاه كيت كامله خليته راح رجعه وجبت له محرك ريجاتا 1500 16 صباب بربع سعر الكيت ده وركبناه فى ال 128 واداه اللى اكتر من اللى كان بيحلم بيه وللنهاردة كل ما يكلمنى يشكرنى انى ما دفعتهوش كل الفلوس دى
تعالوا نتكلم بموضوعيه شوية وكل واحد عايز يركب تيربو يقولى بيتوقع ايه من التيربو ده ولو فعلا يستاهل يعمل كده هاقولو تمام واركبوه له انا طبعا احب كلكم تركبوه مكسب ليا لكن حرام ما دام فى طريق اخر
اتمنى اكون افدتكم بجد
ومش ناسى اشكر محمد ممدوح على كل ده وياريت يرجع تانى للموضوع ده معايا

كلامك فعلا مظبوط و مفيد
بس انا مش فاهم الحتة بتاعت ان احسن درجة حرارة لملئ الاسطوانات هى بين 60 و 80 درجة (بالنسبة للمحركات البنزين)
حضرتك تقصد درجة حرارة الهوا بعد ما يطلع من الانتركولر ؟؟
و لا درجة حرارة الجو المحيط بالانتركولر ؟

فيه حاجة كمان

بالنسبة لفلتر الهوا للعربيات اللى فيها تربو
هل شرط اساسى انه ياخد هوا بارد ؟ و لا مش لازم طالما انه حايعدى على جحيم تربينة التربو و حايسخن تانى و بكده تكون العبرة هى بقدرة الفلتر على تسهيل تدخيل هوا اكتر للتربو

و شكرا

المشاركة الأصلية كتبت بواسطة Ghamrawy

كلامك فعلا مظبوط و مفيد
بس انا مش فاهم الحتة بتاعت ان احسن درجة حرارة لملئ الاسطوانات هى بين 60 و 80 درجة (بالنسبة للمحركات البنزين)
حضرتك تقصد درجة حرارة الهوا بعد ما يطلع من الانتركولر ؟؟
و لا درجة حرارة الجو المحيط بالانتركولر ؟
أقصد درجه الحرارة بعد ما يخرج من الانتر كولر

فيه حاجة كمان

بالنسبة لفلتر الهوا للعربيات اللى فيها تربو
هل شرط اساسى انه ياخد هوا بارد ؟ و لا مش لازم طالما انه حايعدى على جحيم تربينة التربو و حايسخن تانى و بكده تكون العبرة هى بقدرة الفلتر على تسهيل تدخيل هوا اكتر للتربو
طبعا مش شرط لانى اصلا هادخله يتبرد فى الانتركولر لكن انا باسام فى تزويد م الهوا بانى باكبر مجموعه دخول الهواء من اول الفلتر لحد الجزء البارد من تربينه التربو
فى حاجه كمان عايز افهمهالكم
التربو عبارة عن توربينتين واحده ساخنه جدا دى بتاعه غاز العادم والتناية بارده دى اللى بتشفط الهوا وتضغطة
والتربو على فكرة انواع كتير لكن فى منها المبرد ومنها المزيت لان البليه اللى بيدور عليها محور التربينات لازم تتزيت وسعات كمان ان سرعتها عاليه جدا بالاضافه لدرجه الحرارة العاليه اللى بتتعرض ليها

و شكرا

شكرا يا باشا

المشاركة الأصلية كتبت بواسطة moko_2004

مطلوب معرفة كيفية التعاقد و العنوان
السيارة نوبيرا ون 1997
موتور 1500 سي سي
والتكلفة ان امكن

الاول نتكلم عن عربيتك بتشتكى من ايه وعايز ايه من التيربو
لانى ممكن اركب لك تيربو 2 بوصة وممكن اركب لك تيربو 9 بوصة
فاهمنى
وبعدين ازاى عربيتك نوبيرا ومحركها 1500
تانى حاجه المحرك ده كامه واحده ولا اتنين
لازم تجوبنى الاول عن الاسئله دى علشان اعرف اقولك التكلفة اتفقنا

اشكرك علي سرعة اهتمامك و اجابتك
الشكوي هي
السحب مش قد كدة مع اني مراعي كل ظروف السحب الممتاز زي
الفلاتر بغيرها شهريا
البوجيهات ngk و بغيرها كل 3 شهور
الزيت قبل الميعاد
البنزين 92 و لو طلت احط 95 مع اوكتان بعملها ومع ذلك
السرعة لا يمكن ان تزيد عن 185 مع اتجاة الريح
165 عكس اتجاة الريح
راعي ان دة في طريق مفتوح وومكن اكون بقالي اكتر من ربع ساعة بدادي في العربية علشان تسحب
طبعا مع القرص اللي بقرصة علي المكنة استهلاك البنزين عالي
البوجيهات بتطلع سودا بعد التغيير و دة معناه ان نسبة الهواء اللي داخل قليلة وعاوز ازودها
المحرك Etec 2 كامة ومقاس المحرك بالضبط 1497 سي سي
و علشان متستغربش من المقاس النوبيرا ون الشكل القديم نزل منها الفئات التالية
1 موتور 1500
2 موتور 1600
3 موتور 1800
4 موتور 2000
دة اللي اعرفة و موجود علي موسوعة ويكيبيديا