الموضوع: و مازال نزيف الاسفلت مستمر - قتيل تاني علي الاتوستراد

المكان : الاتوستراد اشاره رابعه العدويه
الزمان : 7:45 صباحا

النهاردة كعادة كل المصريين صاحي متأخر لاني نايم متاخر و حجتي اننا رمضان و سحور و كدة و نازل اجري علشان اروح الشغل لقيت بعد اشاره رابعه العدوه في اتجاة كوبري اكتوبر الطريق زحمه شوية اكن في حادثة بس الدنيا ماشية بالراحه و اخاجيء ان سبب الزحمه واحد ست اتخبطت و واضح انها الله يرحمها لان كان بقها في دم كتير نازل منه و مش حاطة منطق و ولاد الحلال عملين دايرة حواليها علشان مفيش عربيه تانيه تعدي عليها طبعا المشهد دة بقي عادي في مصر و متكرر بشكل سخيف ان ارواح الناس بقت رخيصة و سهله اوي حتي الناس مبقتشي تتفرج بقت حاجة عاديه العربيات ماشية حواليها عادي خالص
بس

الانسانه دي اكيد ليها عائله و اهل و عيال او ام و اب او زوج يعني عائله كامله فجأة كدة فقدت واحد منها وصفي للمكان انه بعد اشارة رابعه بحوالي 50 متر كدة يعني حتي لو الست دي بتعدي غلط مفيش عربيه تلحق تاخد سرعتها علشان تخبطها الخبطة اللي شوفتها دي حتي لو واحد جاي جري من شارع الطيران المفروض ان ابسط القواعد بتقول انه يهدي لانه مش شايف ايه اللي بعد الملف يعني في حوادث الدائري بنصبر نفسنا و نبرأ نفسنا كسائقي سيارات انه طريق سريع و محدش يعدي منه طب في موقف زي دة ممكن طبعا ان واحد يخبط حد لكن مش خبطة تموت و تدهس بالطريقه دي

طبعا انا ملقتش السياره واقفه جنبها و لا حاجة معرفشي بقي ركن علي جنب و لا طلع يجري

انا صاحي متأخر و نايم قليل و دة حال 90 % مننا في الايام العاديه و اساسي في رمضان بحجه اننا بنتسحر و نصلي الفجر و ننام ساعتين كدة و بعدين نقوم مش شايفيين قدامنا نركب عربياتنا و نطلع نطير في الشارع علشان نلحق اشغالنا معرفشي طبعا دة سبب الحادث و لا لأ بس دة تخمين

المنظر صعب جدا يمكن لاني اول مرة اشوف حد قتيل في حادثه سيارة يعني انسان زي و زيكم حياته بتنتهي بمنتهي البساطة لانه بيعدي الشارع ممكن تكون غلطانه بس هي كان شكلها فلاحه و شايله حاجات يعني ياريت نحط في اعتبارنا ان في ناس بتبقي جايه من الارياف معدتشي شارع قبل كدة

اعذروني يمكن الموضوع ملخبط شوية بس فعلا المشهد هزني جدااااااااااا و نفسي سلوكياتي و سلوكيات غيري تتعدل شوية