الموضوع: على وشك شراء tiida

فعلا فى موضوعات كتيرة عنها فى القسم وفى موضوع مثبت فى موضوعات هامة كتير عنها اقرئها
وبقولك اقرئها ليه ؟!

لان ملاك التيدا مش بيدخلوا كتير , ولما تقراء المواضيع اللى شاركوا فيها اكيد حتستفاد بالاراء القديمة جدااا , فعشان كدا ضرورى تقراء لان دول 127 الف جنيه

بالنسبة الى راى وانا من ملاك السيارة

هى معايا بقالها 9000 كيلو وكنت شاريها مستعملة وكانت عاملة 19 الف كيلو , يعنى مش كسر زيرو

فحسردلك تجربتى وراى فيها

من حيث الراحة

ممتازة فوق الوصف , القعدة جواها مريحة جداا قدام وخصوصا فى الخلف
ومهما قعدوا تلاتة جنب بعض قعدين مرتحين لان كفاية رجليهم مش مزنوقة فى الكراسى

من حيث الخامات الداخلية

الخامات المستخدمة الداخلية فى التيدا بلس , جلد طبيعى ومحترمة جدااااااااا للصبح , والتقفيل روعة جدا مفيش فيه اى ثغرات او مشاكل

من حيث عوامل الامان

فيها فرامل ,abs,ebd,brake assit وفراملها بسم الله ماشاء الله عليها استجابتها رائعة واسعفتنى فى مواقف كتير اوى ,
وكمان فيها 2 airbags

من حيث العزل

عزل الصوت اللى طالع من الماتور محترم جدا ومش حتسمعه الا بعد 120 , ومش مزعج
بالنسبة الى عزل الصوت اللى بره العربية جيد, مش حتسمع حد

من حيث الاشاعات

الحمد لله لايوجد عليها اشاعات , مثل باقى السيارات الاخرى ,

من حيث الثبات

ثبات العربية فى الملفات على سرعة 80-90-100 فل جدااااا.

الثبات على الطريق 100 -120-130-140-150 تمام بس بعد كدا حتكون يقظ فى السرعات اللى بعد كدا 160 -170 -180- حتشد معاك وحتجيبهم عادى بس تكون ييقظ زى ما قولتلك عشان السرعات العالية وعشان ارتفاع سقف العربية ,

فى ناس بتحس ان العربية وهى ماشية على 140 ان لو حاجة عدت منها بيحسوا ان العربية بتتحدف ,وده عادى جدا عشان زى ما قولتلك سقف العربية عالى , وحدفة خفيفة جدااااااااااااا ولكن بتقلق الناس الحساسين , حتقولى ايوة لازم يخافوا من الحدفة دى وهما كدا مش حساسين , حرد واقولك يبقا مش لازم يجيبوا 140 او 150 ويمشوا فى الامان
وتانى دى حدفة خفيفة مش تعويم او حاجة تقلق ابدا
انا جبت بيها سرعات عالية وكنت بشد مع افيو ومرسيدس 200 القديمة وكانت اسد على الطريق العربية

بخصوص اعادة البيع

اللى بيركب يابانى وبيفكر فيه مفروض انه مش بيغيره مش اقل من بعد 10 سنين ,
وبعدين مفيش عربية على وجه الارض بتخسر فى اعادة البيع

وصدقنى العربية دى بقا ليها سمعة محترمة جدا وبقة مطلوبة جدا لان الناس عرفوا قيمة العربية ده اللى ماشية بدون حس ومشاكل ووجع دماغ والحمد لله

بخصوص قطع الغيار والميكانيكا

مش بتعمل للعربية غير الصيانات العادية من تغير فلاتر وتيل فرامل وزيت
وباقى قطع الغيار معمرة جدا بمعنى:
عندك البوجيهات بلاتنيوم , بتتغير عند 100 الف كيلو , وطبعا البوجيهات البلاتنيوم بتوفر فى استهلاك البنزين ,
وبعدين اذا كان البوجيهات غالية فشوف بتتغير كل قد ايه, واذا كان معاك عربية عادية وبتغير بوجيهات فيها كل 30 الف او 40 الف يعنى بتغيرها مثلا حوالى 3 مرات فى ال100 الف كيلوا وشوف غيرتها بكام دخلت فى حوالى 150 جنية غير مصنيعة التركيب ومتنساش انك كمان وفرة فى استهلاك البنزين فشوف فى الاخر حتكون وفرة مبلغ قد ايه
يعنى من الاخر البوجيهات البلاتنيوم مهما كانت غالية بس موفرة فى حاجات كتير
واسال الشعب كله وكل الناس اللى نفسها تغير البوجيهات عندهم ويركبوها بلاتنيومومش عارفين

بخصوص الاستجابة لقوة الماتور

العربية ماتورها رائع ومحترم جدا ليه اصدقاء كتير فى مراكز الخدمة وكمان مراكز الخدمة المختلفة وليس مركز خدمة واحد , كلهم بيقولوا ان العربية محترمة جداا جدا , وبيقولولنا اننا معانا نعمة فلابد من المحافظة عليها

الماتور اسد , بمعنى اسد , ولما تدوس على الكيك دون بتعها بتحس اكنك شغلت تربو وبتلاقى العربية طارت بجد
ولمسة الدواسة وانت بتدوس تحس ان ليها دوستين , دوسة ممكن تشد فيها على الخفيف وتحرق لغاية ال4000 اربى ام , وفى كيك دون قوى بيحرق الغاية 6000 اربى ام , وامسك روحك
تقفيل الماتور محترم جدا , وكل الدنيا متقفلة بنظافة وكل سلك فيها يابانى

المنظر والشكل الخارجى

العربية فخمة من الخلف تحس انك شايف ظهر مرسيدس بس مرتفع شوية من الخلف
ومن الجنب لما تنظر اليها تحس بفخامة وبرستيج
ومن الامام شكلها مقبول نظرا لكبر حجم الفوانيس مع ارتفاع السيارة , بس مش وحش اوى للدرجة
وممكن ب500 جنية تقدر تغير فى معالم العربية من قدام ومن الخلف فى الخرفين وتركبلها كساحات شكلها تحفة وبتعطى شكل رياضى تحفة عليها مع الاسبويلر لو حتحيبه اصلى , وده اللى ناوى اعمله باذن الله

بخصوص اماكن التخزين

كتيرة جدا فى العربية , والاجمل ان حامل الاكواب اللى فى المنتصف عن الفتيس فى لمبة فحاجة محترمة بجد , وكمان درج الطابلوه واسع وفيه لمبه داخلية

بالنسبة الى التكيف

قوى قوى قوى , ولو جدع بحق شغل التكيف على اعلى درجة مش حتقدر حتتجمد , فى الجو الحر الفظيع اخر حاجة بشغله على 3 فقط , بس طبعا اول ما بدخل العربية بشغله على اعلى درجة عشان الهواء السحن وبعد كدا بجيبه على 3
وفى الايام العادية بجيبه على 2 او واحد كمان
وبتقدر تظبطه اتوماتيك لما يوصل على درجة حرارة معينة يفصل ويهدى , واحلى حاجة موضوع درجات الحرارة دى وتقدر تظبط الدرجة اللى انت عايزها

بالنسبة الى العيوب

امممممممممممممممممممممممم ممم اللى اقدر اقولك عليه بس وشايف مهم الاكصدام الخلفى الكلبسات اللى ماسكاه مش عاوزة عنف فى التعامل يعنى لو خبط فيك عربية فبر زيك عادى , بس لو خبطك لقدر الله عربية اكصدامها محترم حيتفك , بس لو اتفك امره سهل لانك بتركبه بايدك , بس المهم ان الكلبسات دى مش تتقطم عشان لو اتقطمت مشكلة , بس بردوا كل مشكلة وليها حل عند بتوع الفبر
وعلى فكرة اغلب العربيات الحديثة كلها الاكصدامات بتعتها ورق , يعنى على الكل

والحاجة التانية اللى شايفها عيب زرار مرايا الكهرباء بعيد شوية عن متناول اليد بس حتتعود عليه

بصراحة مش شايف عيب اخر عشان اقوله سامحنى

وفى النهاية

ربنا يوفقك
وحاول تقراء كل الموضوعات عشان تستفاد ,وميكنش فى راى منحاز للعربية او ضدها
فالافضل تشوف براحتك وتقراء براحتك
وكل سنة وانت طيب
ورمضان كريم