فيات 128 هل صحيح انها ما بتستحملش؟

**derfo** · 05-03-2008 05:18 PM

امبارح واحد صاحبي قالي ان فيات 128 ممكن وانت بتاخد ملف جامد نكسر الكبالن ولا يمكن عودتها لحالة جيدة. بصراحة بعد تعب ومقارنات واستشارات كنت بافكر اني اشتريها مستعمل في حدود الميزانية اللي معايا بس بعد ما بسمع كلام زي ده ارجع افكر تاني. قالوا ان اللادا كويسة لكن خشنة انما انا برضه لسه ميال للفيات. هل كلامه صحيح؟ مع شكري وامتناني.

**فادى** · 05-03-2008 05:28 PM

مفيش حاجة اسمها كده, و ال128 أنا كنت باخد بيها ملفات ما يعلم بيها الا ربنا و مبيحصلش أى حاجة, الموضوع و ما فيه انو ال128 عربية دفع أمامى , حالها زى حال كل عربيات الدفع الأمامى بتعانى من مشاكل الكبالن, و لما بتاخد ملف و أنت دايس على بدال الوقود و معشق, الكبالن "بتتعصر", و مع الوقت, (لاحظ مع الوقت ده عطل تدريجى), بتقصر عمر الكبالن و يبتدى الكاوتش بتاعها يتقطع, و الشحم يبوظ و تبتدى تطقطق, هتسمع صوت طقطقة و أنت بتلف, الكلام ده بيحصل فى ال128 و الهيونداى و الفولكس (بولو, باسات), و أى عربية دفع أمامى ممكن تتخيلها, و لو مرسيدس عملت عربية دفع أمامى هتلاقى الكلام بيحصل فيها برضه, و ساعتها بتصلح الكبالن(تحشيها) أو بتغيرها و الموضوع مش مكلف, لكن عمر كبالن ال128 أقصر من العربيات الأخرى, لأنها كانت احدى أوائل سيارات الدفع الأمامى, و عمرها ما بين 10 ألاف الى 20 ألف حسب الاستعمال, لكن عطلها الفجائى ده غير وارد مادامت بحالة جيدة و مفيش "طقطقة"

**derfo** · 05-03-2008 05:54 PM

تسلم استاذ فادي على الرد الوافي الجميل...ألف شكر

**thegoodhacker** · 05-03-2008 06:06 PM

السؤال ده انا كنت سالته قبل كده والناس ردوا عليا مشكورين بانك لو قمت بتركيب كبالن اصلية الماني او ايطالي حتلاقي الكبالن تعمر معاك 4 او خمس سنين .....
لو لقيت الكبالن مش بتعمر معاك كتير و انت مش من الشباب اللي بيخمس بالعربية في الشارع يبقي لازم تراجع مقاسات الشاسيه

واليك وصلة الموضوع :
http://www.nilemotors.net/Nile/showthread.php?t=11806

**fahd_628** · 05-03-2008 06:07 PM

العربية دية عانت معانا كتييييييير اوى و بتستحمل والله جامد

**ahmedsrs** · 05-03-2008 06:15 PM

العربية دى حمار شغل بس قطع غيارها عمرها قصير

**derfo** · 05-03-2008 07:19 PM

شكرا يا جماعة على تعليقاتكم المفيدة
كده يعني اتوكل على الله واشتريها
هل تنصحو بموديل سابق على سنة معينة او بعد سنة معينة؟
ولكم الشكر

**SEATLOVER** · 05-03-2008 07:54 PM

اية يا defro انت غيرت رأيك من ماروتى ل 28 ولا اية ..

بص يا سيدى ال28 عربية ممتازة ومش هانعيد و نزيد فى حاجة اثبتت نفسها على عمر السنين ... كفاية ان اى عربية من بتوع اليومين دول مش هايعدى عليها اجيال ذى ال 28 ...بس سبب الى بيتقال عليها دة انها عمرها طول اوى و العربيات الموجودة منها حالياً استهلكت جامد و جابت اخرها .. ودة مش عيب فيها ..لكن كتر خيرها اوى على كدة .

الموضوع باختصار لو بتفكر فى ال 28 :
اول حاجة : تشترى عربية حالتها ممتازة مش جيدة حتى ..تمام ودة هتلاقية اكتر فى موديلات 90 وانت طالع .
تانى حاجة : لازم يكون لك فى العربيات و الميكانيكية واللى عايز يتغير تغيرة ب المانى او اسبانى ..مع مرور الوقت العربية هاتتظبط معاك و هاتبقى فايقة جداً و مش هتحتاج تعمل الشغل اللى عملتة مرة تانية .

**thegoodhacker** · 05-03-2008 10:08 PM

انا اسف علي مقاطعة الحوار بس عندي استفسار بالنسبة لمشكلة الشاسيه في الفيات 128 ....... هل كل العربيات ال128 بيفتح الشاسيه بتاعها ؟ انا سمعت انها بتفتح شاسيه لو اخدت مطبات جامدة ......... طب ما شوارع المحروسة ماليانة بالمطبات و الحفر اللي الواحد ممكن بيلبس فيها غصب عنه نتيجة الزحام ........ انا كان عندي نصر 127 لمدة 4 سنوات و لبست بيها في حفر و مطبات جامدة جدا و عمرها ما الشاسيه بتاعها فتح...... ارجو التوضيح

**SEATLOVER** · 05-03-2008 10:41 PM

المشاركة الأصلية كتبت بواسطة thegoodhacker

هل كل العربيات ال128 بيفتح الشاسيه بتاعها

لا طبعاً بس دة بيحصل نتيجة طول عمر العربية و بهدلتها فى المطبات المشهورة او نتيجة حوادث قديمة تم الشغل عليها . و استعدال الشاسية انا مش شايفة عيب فى عربيات بالعمر و السعر دة ..اعتقد انة طبيعى

المشاركة الأصلية كتبت بواسطة thegoodhacker

انا كان عندي نصر 127 لمدة 4 سنوات و لبست بيها في حفر و مطبات جامدة جدا و عمرها ما الشاسيه بتاعها فتح...... ارجو التوضيح

ما دى ميزة من ميزات ال 127 انها ملمومة و حجمها متناسب جداً مع الشاسية بتاعها (مش مفرود و طويل يعنى ) دة غير انها ممكن كانت بحالة كويسة و محصلش فيها شغل قبل ما تجيبها .