السلام عليكم ورحمة الله وبركاته

طبعا انتم عارفين حوار 780 جنيه بتاع تكاليف صيانة العشرين الف ....
المهم وانا باتمشى كده في التجمع الخامس عندنا من كام يوم دخلت وراء شارع التسعين من وراء وكنت رايح عند مبنى سيتي بنك لقيت بنزينة اسمها اوي ليبيا وكمية عربيات جديدة فيها امثال اوبترا والنترا وشيروكي وتويوتا ومازدا ....الله ايه ده كله وبيعملوا ايه طبعا اشتغلت شغل المصريين بقى ده اكيد في لحمة بتتوزع رحت داخل لقيت في مركز خدمة غبور من هيونداي ايه ياشباب طب اوبترا وتويوتا بيعملوا قالوا هنا الشغل في كله ماشي طيران على الجندي في مدينة نصر واشتريت
فلتر زيت = 35
فلتر هواء =90
بوجيهات = 80
ومن بنزينة شل جركن زيت هيلكس الترا ب 250 جنيه 10 الاف كيلو
ويوم السبت الصبح رحت عندهم ودخلت الناس محترمة نسبيا
وتم عمل صيانة شاملة
زيت وفلتر = 10 جنيه
تربيط عفشة امام وخلف = 20
تغيير بوجيهات =20
مراجعة سوائل وزيوت وتغيير فلتر الهواء ونفخ الكبوت والموتور بهواء الكمبروسور = جدعنة يعني لله وللوطن
والللي عمل كل ده هناك واحد بس وفاهم وكويس
وتعالى للدفع يا معلم 50 جنيه بس ماشي مش خسارة فيكوا
و15 جنيه بقاشيش للاخ اللي شقي وتعب معانا
والحمد لله وكده زي الفل