الموضوع: الحل النهائى لتابلوة السيفيا

الادوات

طبعا الكميات هتختلف على حسب حالة التابلوة

انا استخدمت كميات كبيرة عشان التبالوة بتاعى كان ضايع
نيجى للمهم

1-عدد 4 امير مصرى (على الاقل متوسط الجودة مش زى الصينى فى مة قوى و فى منة ضعيف و انت و حظك )
2- عدد 3 سرنجات انسولين امو سن رفيع جدا جدا و قصير
3- حجات لزوم الزنق عشان الحتت بتاعت الهوايات الى الى ورا فى التابلوة (انا استخدمت زجاجات مياة الحجم الصغير الى هى .75 ملم تقريبا و استخدمت كمان الاسفنجة بتاعت تلميع الجزم امو وشين )
و كل فرد لية حرية اختيار ادوات الزنق بتاعتة ..

طريقة العمل

طبعا و انت بتشتغل ب الامير و السرنجات لازم تلبس جوانتى عشان متتبهدلش زى ما حصل معايا
و لازم تاخد بالك عشان متتعورش من السرنجات

و خد بالك و انت بتسحب الامير عشان ميبهدلكش و بردو خد بالك و انت بترشق السرنجة فى بتاعت الامير عشان متعوركش
و طبعا بعد كل استخدام للسرنجة تغطيها تانى عسان الامير مينشفش فى السن (عشان كدة انا استخدمت 3 سرنجات )
و طبعا تبدا ب اسم الله
و تتوكل على الله على الشغل
حاول و انت بتشتغل انك تكون راكل العربية فى الشمس عشان يكون جل التابلوة طرى
و بعد كدة
هتشوف المنطقة المصابة و تظبطها ب ايدك و ب ايدك التانية ترشق فيها السرنجة و تصب فيها امير يا معلم من السرنجة

و هكذا مع كل حتة مصابة
و طبعا الاماكن الى ممكن تستخدم فيها ادوات الزنق استخدمها انا عن نفسى الحمد لله ظبطت التابلوة بعد ما كان عار على السيفيا الحمد لله بقدر الامكان رجع زى الجديد


ملاحظة مهمة جدا
خد بالك
التابلوة مكون من 3 طبقات كا التالى 1- جلد (طبقة خارجية)
2-اسفنج مضغوط
3- خشب (و فى اجزاء فبر )
ف خد بالك اوى و انت بتحقن الامير اوعة تحقنة بين الجلد و الاسفنج عشان بيروح مقبب الجلد زى الهرم كدة و بينشف
و بردو خد بالك اوعى الامير ييجى على الطبقة الخارجية عشان الجلد الخارجى مينشفش و يتشقق

ف لازم لما تحقن نحقن الامير بين الخشب و الاسفنج و تمسكهم على بعض مدة تضمن ان الامير ينشف
و لو الامير وقع على الطبقة الخارجية حاول تمسحة بسرعة جدا قبل ما ينشف
او لو وقع بقى و خلاص بيقى سيبة و متلمسوش لحد الجفاف التام و هو اصلا بيبقى شفاف ف مش هيبان اصلا هيعمل بس حتة قبة لفوق
و كدة يبقى تمام و ميت فل و عشرة و متنسوش تدعولى