المشاركة الأصلية كتبت بواسطة taotao
بما إن سيرة عفاف راضي جات في الموضوع التوأم "الحاجات اللي كنا بنسمعها غلط" أنا عاوز اتكلم من زمان عن مطربة باحبها جداً .. عايدة الشاعر .. كانت مصنفة "مطربة شعبية" والمطربة الشعبية زمان كانت "خضرة محمد خضر" أو "فاطمة عيد" مثلاً إنما الظاهرة الجديدة كانت بنات لابسين ع الموضة ويغنوا شعبي زي "شهرزاد" و "ليلى نظمي" و"أماني جادو" و ...... "عايدة الشاعر"
عايدة الشاعر تميزت عنهن بأنها كانت -حرفياً- هانم، لبس آخر موضة وماكياج كامل والميزة الكبيرة إنها ماكانتش بتحب تغني كتير، تحس إنها مش عاوزة تتعب نفسها أو بتتنك ع الناس :)
بدأت مشوارها الفني بأغنية "التشت قاللي" كسرت الدنيا .. وبدأ مشوار التناكة، فما بعد هذه الأغنية قررت أن تكتفي بكلمتين في الأغنية والكورال وراها يقوموا بالواجب، فمثلاً أغنية "كايدة العزال" تسير على النهج التالي:
الكورال: كايدة العزال أنا من يومي
عايدة: إيوا أه
الكورال: يا بت يا أم التوب الاخضر
عايدة: إيوة أه
الكورال: والطرحة من شاره الازهر
عايدة: إيوة أه
الكورال: طب سيبتي ايه لاهل البندر؟
عايدة: ده انا من يومي
ويبدو أنها استكترت المجهود اللي بتبذله في الأغنية فقررت توفر صوتها أكتر ففي أغنية "غالية" مثلاً:
الكورال: تحرم عليّا إيدي لو لمست إيديك
عايدة: لو
الكورال: تحرم عليّا عيني لو طلت عليك
عايدة: لو
وهكذا في أغلب أغانيها يقوم الكورال بالمجهود الأكبر وفي الآخر ناخد المقلب ومانسمعش من عايدة الشاعر غير كلمتين :)
بجد عايدة الشاعر مطربة فريدة من نوعها وكان لها قبول .. أنا كتبت الموضوع ده عنها للهزار بس أنا فعلاً باحب أغانيها