الموضوع: ذكريات تهم مواليد السبعينات

بصراحة انا مذهول ، وجبت أمي فرجتها على كل الصور دي ، وفعلا كل الحاجات دي انا فاكرها زي ماتكون كانت موجوده إمبارح ، واللي انا ملاحظه إن كل إللي كانوا اطفال في فترة السبعينات زي حالاتي يعني كان تقريبا هواياتهم واحدة وميولهم قريبة جدا ده حتى الاهل في الفترة دي كانوا بيوجهوا اطفالهم نفس التوجيه تقريبا ، ربنا يجازيكي خير فكرتينا بايام جميلة مش هاترجع تاني.

pcegypt.. صح.. كلنا كنا تلاقينا كده نفس الاهتمامات. سلامي إلى الوالدة :)

وفين

بيمبو

وشيكولاته إيكــــــا

وسر شويبس حسن عابدين

وكاراتيه

ومخمخ ومشمش ثنائي مدهش

والدتي بتقولي ساعة حادث المنصة كانت بتتفرج وانا عمال العب فا لاقيت الدبابات فقلتلها
هيا الدبابات مش هتضرب نار ودييييييييييب لاقيت الضرب اشتغل فا أمي قالتي اوعي تقول كده تاني

سرك بااااااااااتع يا هشام :D
الليستة اللي فوق دي جاي منها في الطريق ان شاء الله :)

موضوع جميل يا علا
بالرغم انى من الثمانينات - لكن فاكره حاجات كتير
بس حد يقولى مين دى اللى فى الصوره ؟
مش قادره افتكرها خالص

دي ماما عفاف الهلاوي يا سندريلا :)

جريندايزر
عالي عالي بطل فليد
هيا طر يا جريندايزر
كان جامد جدا الكارتون ده ومن حبي فيه جبت كل الحلقات كلها (74 حلقة) على الكميوتر
بس الواد احمد ماحبوش

ياااااااااااااااااااااااا اااااااااااااااااااااه

هوا احنا كبرنا قوي كده

يالله حسن الختام

رامي (ابو احمد)

واضح ان كل جيل و ليه تفكيره الخاص بيه يا ابو احمد

موضوع ممتاز يا علا شكرا ليكي :)
بس فين صور ال Bee Gees
اشهر فرق الموسيقي في السبعينات و صورهم مع جون ترافولتا في فيلم حمي ليله السبت

لأ دول ما عدوش علية للأسف يا حازم

ييييييييااااااااااااااااا اااه جامد جدا الموضوع ده

شكرا جزيلا يا ecybrarian

بجد موضوع جميل جدا يااااااااااااا ايام انا من مواليد 83 و فاكر ان زجاجة الحاجة الساقعة بيبسي او كوكا بــ 15 قرش الصغيرة و اول ما الكبيرة بدات تنزل كانت بــ ريال 20 قرش انا علي اد ما افتكر و بعد كده بدات في الغو 20 و 25 ... 25 و 30 .... 30 و 35 .... 40 و 50 الخ الخ و مش عارف الخ دي لغاية امتي اكيد في غيري يفتكرها ارخص من كده

انا كنت باشتريها ب 10 صاااااااغ :p

فى كمان البومات الصور بتاعة كاس العالم والبومات العربيات...كنا بنقعد نجمعها ونبدلالصور ونديلها اسعار... البادج بصورتين .. وبادج البرازيل كان البريمو بـ 5 صور

و دي كمان في الطريق ;)
أخويا كان مهووس بيها و مجنن ماما معاه :D

ياااااااا يا علا فكرتينى با أيام جميلة ولاهى - انا من مواليد السبعينات وبحس بحنين للفترة دى جدا لما بشوف فيلم فى التليفزيون من الفترة دى زى افلام محمود ياسين ونور الشريف ومحمد رضا بستمتع برويتة او حتى صورة تفكرنا يا أيامنا الجميلة . شكرا يا مؤرخة المنتدى وعوزين نعرف صورة الطفلة والسيدة الى فى الصورة تخص مين ؟

عرفت بأه دلوقتي هي تخص مين؟ :)
بس حلوة مؤرخة المنتدى دي

فعلا ذكريات حلوة جدا
افتكر وقت حادث المنصة كان عندي رشاش صغير من بتاع زمان اللي بيطلع شرار ده
وقفت في البلكونة وقعدت اقول
انا اللي قتلت الساداااااااات
انا اللي قتلت السادااااااااااات
طخخخخخخ
بوووووووووووم
الطخ بوم دي بقي كانت على دماغي من والدي وقاللي ادخل جوة الله يخرب بيتك هاتودينا في داهية
لان البلد كانت في حالية غليان وانفجار وانا هايص في الهيصة

__________________

طيب كويس يا كريم ان باباك اتصرفي في الوقت المناسب :D
انا مش عارفة ليه مش فاكرة حادثة المنصة اوي كده، رغم اني كنت حيلوة كده 6 سنين يعني :p

ايوه بس انا فاكر انها كانت مش محجبه وكان اغلب لبسها اخضر بس كانت طيبة وحنينه جداً وفين ماما ساميه وماما نجوي و بقلظ

و بابا ماجد يا خالد :)
اما رجل المستحيل ده فأنا لية معاه صولات و جولات.. كنت اشتري اللغز من دول و أكله أكل في أقل من ساعة.. و بعدين آخد فلوس تاني من ماما و اروح اجيب واحد و هكذا.. المكتبة اللي كنت باجيب منها كانت فاتحة على قفايا.. أصلي كنت دودة قراية

انا سعادتى بمشاهدة ما سبق لا توصف ، بمجرد رؤية هذه الصور تذكرت ايام الماضى و ما صاحبها من راحة نفسية لم اجد له مثيل اطلاقا فى ايام الحاضر

الحمد لله ان ربنا جعلني سبب في سعادة حد :o

الأوتوبيس ده إسمه بيجاسو وكان صناعة اسبانية، فى فترة السبعينات كان هو والأتوبيس النصر فقط هم اللى بيشتغلوا فى هيئة النقل العام، والأتوبيس البيجاسو ده كان احد معالم مصر فى السبعينات وياما طلع فى افلام ومسلسلات، اذكر منها فيلم الحفيد ومسلسل دموع فى عيون وقحة

بالمناسبة انا من مواليد اوائل السبعينات

و انا مواليد آخر أسبوع في آخر شهر في سنة 74 :)

شكراً يا علا على الموضوع الجامد ده ,
بصراحة انا حسيت براحة لما شفت الصور دي ,
يمكن من الضغوط اللي الواحد بيعاني منها و نستها شوية لما شفت الصور و التعليقات ,
على فكرة انا عرفت الصورة بتاعت ماما عفاف أول ما شفتها و البرنامج بتاعها كان مقدس عندي , و كمان برنامج اخترنا لك و عالم الحيوان ,
يا تري اول مصروف في سنة اولى ابتدائي كان كام و كان بتعمل بيه ايه ,
انا كنت باخد قرش أو قرشين تقريباً مش فاكر أوي و كنت طبعاً بشتري بيه الحلويات

لا انا ما أظنش اني لحقت الفكة اوي دي.. متهيألي وقتها كنا بنتعامل اكتر من اول الشلن (الخمس قروش) و البريزة و الربع جنيه و كده.

الله ينور يا علا علي الموضوع الشديد قوي ده و علي فكرة ده اول موضوع اقراهولك لاني كنت متغيب فترة عن المنتدي لكن واضح من نوعية مواضيعك انك صاحبة فكر راقي
و لو انها جاية متأخرة قوي المنتدي منور بيكي و بكل الاخوة المستجدين

بالنسبة لموضوعك الشيق فيه برضه شيكولاته كورونا و لعبة بنك الحظ و كريم حلاقة انجرام اللي كانت اعلاناته مالية الدنيا
اخوكي محمد فهمي من الرعيل الاول لنايل موتورز و من قبله كونتكت كارز

على فكرة فيه هنا صور لشيكولاتة كورونا و بنك الحظ :)
شكرا على إطرائك و عود حميد بإذن الله :)

موضوع تحفة .. هو أنا كل مافكر في موضوع تحرقيه؟؟ :)
ربنا يجازيكي كل خير، سؤال بسيط، بتجيبي الصور منين؟

يعني هايكون منين؟ هو في غيييييييييييره؟ ;)

المشاركة الأصلية كتبت بواسطة Islam_galal

موضوع رائعجزاك الله خيرا ، رجعتينا لذكريات جميلة حقيقي حسيت احساس جميل و انا باسترجع طفولتي

كويس ان الواحد كل فترة يقف شوية و يرجع لورا.. احنا طبعا هانرجع تاني لواقعنا مافيش اختيار.. انما يبقى اسمنا أخدنا نفسنا شوية من السباق اليومي اللي احنا فيه :(

سبعاوي.. اهو انا بأه كنت كل ما أشوف جيمي كارتر في الأخبار اقول ايه ده؟ فيه راجل اسمه جيمي؟؟
أصلي كنت مركزة مع بايونيك وومان و كان اسمها في المسلسل جيمي :D

علي فكرة يا اخت علا
زوجتي شافت الصور اللي انت باعتاها وعجبتها جدا وهي مصممه انك من عمرها لأن كل الذكرايات دي نفس ذكراياتها
بس بصراحة انتي موضيعك جامدة اوي وبتخرجنا من الجو الخانق اللي بنعيش فيه الي الماضي الجميل

جزاك الله خيرا :)
على فكرة ممكن فعلا تكون زوجتك من نفسي سني. سلم لي عليها اوي :)

انا من اواخر السبعينات بس الصور دى رجعتنى لزكريات فى منتهى الجمال بس هوا انت بتجيبى الصور دى منين يا علا ؟ ولا انتى معاكى فريق اعداد يعنى زى اللى فى العاشرة مساءا والبيت بتك ؟

:D لا هو في الحقيقة فريق الإعداد اللي معايا انا سارقاه من 90 دقيقة :D
بصراحة كده المصدر هو الفيس بوك

موضوع جميل جدااااااااااااااااااااااا ا

متشكرة جداااااااااااااااا يا ايمن :)