الموضوع: تيدا بلس 2007 ارجو المساعد من خبراء نيسان

اخى الكريم
التيدا من العربيات الجيدة
ولسه فى موضوع كنت مشارك فيه
http://www.nilemotors.net/Nile/173098-tiida.html
وكتبت فيه عن ملاحظاتى للسيارة واقرئه باذن الله حيفيدك
والحمد لله العربية دى بالذات كل او اغلب ملاكها متفقين على نفس الكلام الواحد , فمش حتلاقى فيها جدل كتير او كلام كتير من كل واحد بشكل

فى موضوعات فى القسم وفى موضوعات كمان مثبتة اقرائها وانت حتعرف كل حاجة عنها , افتح الموضوعات لمجرد حتى القراءة واقرائها زى ما قولتلك وباذن الله حتستفاد

وبخصوص استفساراتك الاخرى الزيادة

بخصوص الضمان

معاك عربية نيسان تعمل صيانتها فى اى بيت من بيوت نيسان عادى , يعنى اى مركز خدمة معتمد لنيسان تقدر تعمل فيه
سواء كان السبع او مودرن او يونايتد , ومحدش يقدر يقولك لا, وحتى لو خرجت من الضمان , تروح تعمل عندهم صياناتك العادية عادى بس طبعا لو اى حاجة بايظة وانت خرجت بره الضمان بتكون على حسابك

بخصوص الكيلوميترات بتعتها

طبعا كل ما بيكون الكيلو ميتر بتعها اقل من 100 الف يبقا افضل , ولكن , فى قبل كدا ناس ذكروا ان فى تيدا عاملة 300 الف كيلو وزى الفل معاهم , بس احنا بنقول ان الافضل تكون اقل من 100 الف ويكون لسه فاضل سنة على الاقل فى الضمان

بخصوص هل حد بيعرف حد بيصلحها فى المعادى

بصراحة محدش يعرف هل فى ميكانيكى فاتح ورشة بيصلح فيها ولالا , لكن اللى نعرفه ان مركز السبع احد مراكز خدمة نيسان المعتمدة موجود فى المعادى وبيصلحها على اكمل وجه

بخصوص قطع الغيار

ممكن تلاقى تيل فرامل بره التوكيل وممكن تلاقى مساعد وحاجات اخرى , ولكن للمرة المليون واذا حضرتك قراءت فى القسم كتير بنقول وبنشدد على الغيار الغير اصلية , اللى بنجيبها عشان ارخص واوفر من قطعة الغيار الاصلية , وانها بتاثر على حاجات اخرى فى العربية وممكن تبوظ حاجات مهمة فى العربية , كمثال التيل الغير الاصلى بياثر على الطنابير وشوف بقا لما تجيب تيل فرامل مش اصل وتبوظ بيه الطنابير شوف الطنابير دى اللى بوظتها بسبب الاهمال تمنها كام
وحعطيك مثل تانى , شوف مثلا لو جبت مساعدين الجوز مثلا 1200 او ب1000 جنيه مثلا , وركبتهم , حيقعدوا معاك 50 الف كيلو ويضربوا , وحتضطر تجيب اتنين تانين بحوالى 1000 او 1200 جنيه مثلا , اما الاصلى ب1800 جنيه الجوز وبيتغيرهم كل 100 الف كيلو , قولى بقا انت كدا وفرت ايه
حتلاقى ان فى ال100 الف جبت مرة واحدة جوز مساعدين اصلى , ولكن بالنسبة الى الغير اصلى اشتريت جوزين مساعدين على مرتين يعنى حوالى او مش اقل من 2200 او 2000 جنيه , فبالزمة ده كلام

العربيات الحديثة كلها واللى تمنها بيعدى ال100 الف عاوز تحافظ عليها يبقا عليك بالحاجة الاصلية فيها تركبها , ماعدا الفلاتر والفوانيس والكلام ده

وده موضوع عن قطع الغيار فى التوكيل ومثبت عندنا فى القسم فوق
\http://www.nilemotors.net/Nile/155219-2010.html
وفى موضوعات كتيرة اوى مهمة فى القسم مثبتة ياجماعة وصدقونى حتفيدكم بس اطلعوا عليهم واقرؤها
وياريت بردوا تقراؤ موضوعات حتى الصنى , لان احيانا فى حاجات بتفيد ملاك التيدا معاهم
وحتلاقوا موضوعات عن الصيانات وتكلفتها وايه اللى بيتعمل فى الصيانات دى
صدقوانى الموضوعات المثبتة مفيدة جدا لكل الاعضاء الجدد

وبخصوص مقارنتها بالاوكتافيا

لو قدامك اوكتافيا بس عاملة كيلوهات اقل وتكون مثلا 2004 او 2005 يبقا توكل على الله وهاتها افضل , لان انا بعشق الالمانى لان كنت راكب بولو قبل اليابانى , وبعدين الاوكتافيا ماتور رائع وقطع غيار استيراد كتير فى الحرفين بالهبل موجودة ,

وبخصوص تسعير التيدا بتاعت قريبك

70 الف جنية حلو عليها اوى ومينفعش اكتر من كدا


واتمنى بكدا اقدر اكون افادتك وجاوبتك على كل الاسئلة
وتحت امرك
وكل عام وانت بخير
ورمضان كريم