الموضوع: الوساطه والمحسوبيه

الواسطه موجوده في كل حاجه في مصر

شهر 12/2009 أخويا جه من السفر فى أجازه سريعه جدا 4 أيام وكان عاوز يعمل بدل فاقد للرخصه القياده وللى ميعرفش بدل فاقد الرخصه لازم تعمل محضر وبعدين تروح المرور وتاخد تصريح شهر وبعدين تروح تتطلع رخصه ممتده
طبعا مكانش ينفع روحت جبت وسطه ودخلنا قعدنا أنا وأخويا عند الباشا مدير الوحده ساعه بالظبط وكنا وخدين الرخصه وكمان رحنا نادى السيارات فى أسكندريه طلعنا الرخصه الدوليه
رحت انا بقا فى 3/8/2010 أجدد رخصه القياده الخاصه بيا وغلطتى أنى محبتش أخش للظابط بتاع واسطه المره الى فاتت دخلت على الشباك جبت ورقى وأستماراتى ودفعت رسومى وكل حاجه فى 20 دقيقه والساعه 10.20 الموظف الى فى الشباك قالى روح علشان تتصور
دخلت أستنا التصوير أخلص بقا الساعه كام 1.20 وكل ده وانا قاعد أشوف ملفى والموظف هينادى أسمى يخش أمين الشرطه معاه كام ملف للوسايط ويتحطو فوق ملفى الاقينى بقيت تحت خالص لما كنت هعيط والله
وشربت من نفس الكاس الى الناس التانيه شربتو (الواسطه والمحسوبيه )

مره رخصتني اتسحبت بسبب ركن في الممنوع ... والدي كان يعرف عميد شرطة وجابلي كارت توصيه منه وقالي روح المرور واديهم الكارت مع ايصال السحب وهما هيرجعولك الرخصة

المهم انا روحت المرور وانا حاطط في بطني بطيخة صيفي وفاكر اني هخش للظابط واديلوة الكارت وأقعد اشرب القهوة على ما تيجي الرخصة

افاجأ بالآتي .....

طابور من الناس اللي معاهم كروت توصية والأمين عمال يعدي علينا واحد واحد وياخد ايصال السحب ويدبسه مع كارت التوصية وبعدين لمهم كلهم وقالنا انتظروا شوية وطلع لوكيل النيابة

بعدها بحوالي نص ساعة نزل ونادي على اسم كل واحد ورجعلوه رخصتة .... وقعدت اضحك على الموقف دة وانا مروح

نسيت اقول ان الكارت مبيرجعش تاني عشان دة للأستعمال مره واحدة فقط .... وعمار يا مصر