الموضوع: 128 بتسخن مع السرعات العالية

المشاركة الأصلية كتبت بواسطة ziabassem

فيه حاجة عبيطة قوي ممكن تكون هي السبب في السخونة دي .. عاوزك تبص على القربة بتاعة المية .. المفروض المية جوة القربة متبقاش مليانة على الأخر .. بمعنى أخر تكون تحت العلامة الموجودة في القربة .. ولو زادت عن كدة زي ما بيقولوا بالبلدي الردياتير مبيبقاش فيه نفس للتبريد .. كمان ممكن يكون غطا الردياتير مش مظبوط في الإحكام بتاعه سواء بالسلب أو الإيجاب .. كل ده يعمل سخونة حتى لو الموتور والردياتير مظبوط .

بالنسبة لموضوع القربة انا غيرتها خالص قولت ممكن فيها عيب ولا حاجة و طبعا ما بملهاش على الاخر و بخلي المياة عند العلامة. بالنسبة لغطاء الرداتير اشتريت واحد عالي و واحد واطي لاحظت ان العالي لما باجي افتحة ما بينطرش مياه بره الرداتير في اي وقت على عكس الواطي بيعمل كبس و في اي وقت تفتح تلاقي دفع مياه تخرج.

اه نسيت اقول انه لما بتكون العربية سخنة يعني المؤشر واقف قبل الاحمر على طول بنزل ابص على القربة ما بلقهاش بتغلي بلاقيها عادية خالص القديمة و الجديدة برده.

مياة القربة مالهاش دعوة

اللي بتسخن مياة الردياتير

القربة بس علشان لو المية تنقص الردياتير يسحب منها

المشاركة الأصلية كتبت بواسطة eng_mostafa_89

طيب بص بقى علشان نوصل لحل ان شاء الله سوا

احكى بقى السخنية دى ابتدت من امتى ازاى علشان نعرف اية اللى حصل وخلى السخنية تزيد؟

الموضوع ابتدى لما سافرت اول مرة بعد ما اشتريت العربية اول لما زودت عن الـ 100 لقيت الحرارة بقت 3/4 المؤشر فقمت و خففت السرعة لحد 80 فالحرارة رجعت تاني على النصف. روحت للميكانيكى و قولت له الموضوع ده قالي العيب ده عيب رداتير علشان اللي عندك حديد. فقولت لما يجي الصيف ابقى اشتري الرداتير نحاس 3 ماسورة يخلي العربية ثلاجة. اشتريته لاقيت العربية بتسخن اكتر من الاول فرحت للميكانيكي قالي مروحة و بعدين ثرموستات و بعدين جوان و بعدين صباع الحرارة اللي في وش السلندر و بعدين فك تاني وقالي نقشط الوش و بالمرة نظبط التكيهات و الخراط بيظبط التكيهات لاقي الكامة فيها ركبتين بايظين فغيرنا الكامة. وكل ده و الحرارة زي ما هي بل زادت ! رحت غيرت الرداتير تاني و برده اول لما اطلع طوالي الحرارة تزيد لحد ما تبقى قبل الاحمر بمللي.

قشط الوش لو زيادة غلط

يزود الضغط جوة غرف الحريق و يسخن العربية في الجري

و هل الخراط شاطر و كشفلك عالصبابات و بااخص الدلايل لانها لو تقيلة برضة تسخن العربية

و ممكن تراجع تاكيهات تاني لانها لو محملة تسخن برضة

المشاركة الأصلية كتبت بواسطة ahmedfawzy14

بص من الاخر كده

انا فضلت 6 شهور فى فيلم زى بتاعك ده بس فى الشاهين

و بعد ماغيرت الشكمان كله والريداتير وترموستات كذا مرة وحاجات تانية كتير وعملت زرار للمروحة وبرده مفيش فايدة

وفى الاخر يطلع العيب فى امبير الحراة اللى فى التابلوه

كان بيقرا مع السرعة ان الحراة بتزيد ولكن فعليا الحرارة بتنزل

عليك وعلى كهربائى شاطر او بتاع عدادت

وطمنى عملت ايه

رحت لبتاع عدادات قولت له على اللي بيحصل فراح جاب من عنده عداد و عمله توصيلة و جرب بيه لاقه قارئ نفس القرآة اللي في عدادي ام راح فك العداد بتاعي و قعد يلعب فيه كده و قفل و قالي تمام و خد 20ج قلت الحمد لله روحت اجرب لاقيته زي ما هو المؤشر بيقف قبل الاحمر بمللي طول مانا على 100 و قبل الـ 100 المؤشر 3/4 بالليل بس هوه اللي بيبقى على النصف. ممكن حضرتك تقولي بتاع العدادات اللي حضرتك روحت له عملك ايه بالظبط علشان حاسس الراجل ده نصاب.

هل انت حاطط شبكة متعدلة قافلة عالرادياتير؟؟ هل اتأكدت ان المروحة بتشفط و كهربتها مش مقلوبة بتخليها تنفخ عكس الهواء؟؟

هل بتغسل سربنتينة الردياتير من برة ؟؟ هل اتأكدت ان الريش بتاعتها سالكه مش مقفولة نتيجه الغسيل بخرطوم ضغط عالي مثلا؟؟

هل السربنتينة النحاس الجديدة اترشت دوكو اسود تقيل و انت بتركبها ؟؟؟



لو الميكانيكي بتاعك بيعمل عمرة لعربية 128 تانية

خلية لما يحل العربية يحل وش سلندرك و يركب التاني تجرب بية يوم

لو العربية ماسخنش بالوش التاني يبقى اشتري وش سلندر استيراد

المشاركة الأصلية كتبت بواسطة h_daim

رحت لبتاع عدادات قولت له على اللي بيحصل فراح جاب من عنده عداد و عمله توصيلة و جرب بيه لاقه قارئ نفس القرآة اللي في عدادي ام راح فك العداد بتاعي و قعد يلعب فيه كده و قفل و قالي تمام و خد 20ج قلت الحمد لله روحت اجرب لاقيته زي ما هو المؤشر بيقف قبل الاحمر بمللي طول مانا على 100 و قبل الـ 100 المؤشر 3/4 بالليل بس هوه اللي بيبقى على النصف. ممكن حضرتك تقولي بتاع العدادات اللي حضرتك روحت له عملك ايه بالظبط علشان حاسس الراجل ده نصاب.

امبير حرارة الشاهين فيه مغناطيس كده

كل اللى عمله انه ظبط المغنطه بتاعه المؤشر

وقفله تانى

معرفش ال28 نفس النظام ولا حاجة تانية