التوكيل فى منتهى الأحترام و ناس زى الفل أنا رحت لهم فى مشكلتين فى العربية عندى و الحقيقة الناس قاموا بالواجب بدون تدخل و لا كلام منى
ارجو اننا نفعل اتحاد ملاك اللوجان نتقابل مرة ونقرر بعدها هنكمل والا بلاش منها الحكاية
عموما انا قابلت اخ معاه لوجان في شارع دمشق النهارده اسمه ا / عبد الرحمن وهوا كان عنده خبطه في الباب ولا باينه نهائي عملها عند حد في الحرفيين ب 400 جم سمكرة ودوكو وشين كمان بس ولا تحس ان كان في حاجه في الباب وهو بيقول انه بحكم شغله مستورد للسيارة الكيا ممكن يستورد لنا قطع الغيار اللي لازمه للوجان بعد ما كلمته عن اتحاد اللوجان
وهبقى احط لحضرتك نمرة تليفونه لو انتا حبيت
انا شايف من ساعه الاستاذ/ raedegypt ماعمل مشاركته واحنا نازلين في الراجل حتتك بتتك
قبل منخلص ع الراجل نتفق علي بعض النقاط وهي كتاتي
1- الامر مفهوش تالت لو كلام الاستاذ صاحب المشكله صحيح وده نص كلامه
يبقي التوكيل بيستهبل فعلا لان علي حسب المقايسه الموضوعه للكلام ده كله حتكون التكلفه 3994 اي 4000 جنيه وليس 22000جنيه يبقي في فرق 18000 جنيه ولو الحساب علي عدد ساعات العمل وافترضنا ان العربيه محتاجه 18 ساعه في الورشه يبقي المصنعيه 1000 جنيه في الساعه الست سنيه سوست بتشقي وهاتك يا رقص وهز ومبتخدش ربعهم في الساعه
اما لو كلام التوكيل سليم فدي يعني ان العربيه اتدغدغت وحصل حاجات من الداخل اكبر من التلف الظاهر ولما كان الاستاذ emadelspagh بيقول علي حد كلامه "انا كنت خابط بالعربيه خبطه صغيره من أدام" فخبطت ايه الصغيره دي اللي تسبب كل الاذي ده!!!!!!!!!!
2- الحمد لله ان استاذ عماد مامن ع العربيه ومع ذلك الراجل بيقول ان المبلغ مش معاه دلوقت عشان يدفعه الاول لحد ما شيك التامين يوصله
طب لو الاستاذ عماد مش مامن وهو خابط العربيه خبطه خفيفه "انا كنت خابط بالعربيه خبطه صغيره من أدام" ايه الحل بقي
يستلف عشان يدفع 22000 جنيه
يبيع قراطين طين
يركنها لحد ما ربنا يفرجها
لو عرفت الحل اتصل علي الخط الساخن لتوكيل رينو
3-انا كنت من ملاك اللوجان ربنا يعلم اني زي اي حد في حضراتكم لميت المليم ع المليم لحد مكونت فلوس العربيه اللي من وجهه نظري تصلح لنا كمحدودي الدخل لكن الفلوس اللي دفعتها ودفعها الاخرين دي اخر فلوس معانا ويمكن معانا فاضل مبلغ صغير .... طب والخبطه الصغيره ادفع عليها 1/3 تمن العربيه مره تاني مش معقول
المفروض التوكيل يراعي نقطه زي دي بتوفير قطع الغيار وتقليل سعر ساعات العمل دي مش ميجان ولا حتي سيمبول.
4- الكمال لله وحده ... واذا كنا هندافع عن التوكيل عمال علي بطال مش هيغير من نفسه
5- اذا كنت عايزني اصدق ان التوكيل كويس وادي اللي مطلوب منه ... لازم تصدقني وتصدق غيري لما يقولوا ان حصل منه فصول مش ظريفه ولا تقبل حتي
6-كل واحد يقول رايه بمنتهي الشفافيه والحياديه والموضوعيه ده حق كل واحد فينا بدون اي تجريح
ومن حق كل واحد ايضا ان يرد بعقلانيه لا ينبري للدفاع المطلق عن التوكيل ولا الهجوم المطلق علي كل من تسول له نفسه بان يقول كلمه في حق الوكيل . وكيلك ربنا يا شيخ
7-هنروح بعيد ليه يوم السبت بكره وان شاء الله يكون الاستاذ عماد سمع غلط واللي هيدفع 22 جنيه فقط من غير الالافات دي لانه باذن الله يكون غلط في المقايسه . وعمل المقايسه لعربيه فلونس او ميجان وكان هناك تشابه في الاسماء فادي مقايسه الفلونس لللوجان وادي مقايسه اللوجان للفلونس ...... حد فاهم حاجه .... تخاريف
يا باشا عايز اقولك ان التوكيلات كلها بتستهبل في حوارات السمكرة والدهان ده لو هما اساسا بيعملوا سمكرة انا شايف ان هما بيعملوا فك وتركيب بس مش اكثر انا السيمبول بتاعتي اتخبطت من ورا خبطة خفيفة برضه مش جامدة اوي يعني ووديتها التوكيل والمقايسة طلعت ب14000 جنيه فرحت زي الباشا خدت العربية ووديتها الحرفيين وب 3000 جنيه رجعتها زي الاول
انا عايز افهم ازاي واحد ياخد في 5 6 قطع غيار 16% من تمن العربية بس يعني هو لو جابله 3 عربيات سيمبول وقطعهم وباعهم قطع غيار ممكن يجيبله 20 عربية سيمبول
ومفيش رقابة ولا فيه نيله وسلملي علي حماية المستهلك
ربنا يلطف بينا
ابعت شكوى لتوكيل رينو فرنسا و قولهم إن العربيه المفروض لمحدودي الداخل إزاي أصلحها بـ 22000 1/3 تمن العربيه وابعت شكوى لي رينو مصر نفسها علي الاقل يبقى عندهم فكرة عن نظره الناس للاسعار واشتكي في جهاز حمايه المستهلك . بس كده :(
مشكلة التوكيل انه بيدمر سمعه العربية الكويسه
دي المقايسه
برابيز أمامي : 1150
جوان : 90
سيلكون زجاج 2*100 = 200
كبون : 1000
عدد 2 مفصله كبوت ( ليه مش عرف ؟؟؟؟؟؟؟؟؟؟؟؟؟؟)
اكصدام أمامي : 600
نيكل شبكه أماميه :585
شبكه أماميه :295
علامه رينو أمامي: 90
شبكه سفليه : 160
دعامه اكصدام : 585
صدر أمامي : 1450
كشاف أمامي يمين : 400 ( ايه ده انا مش عرفه )
فبره أسفل الرفرف اليمين : 190
مساعد أمامي يمين : 350
شمعدان أمامي يمين : 630
رومان بلي عجل أمامي يمين : 495
سربنتينه تكييف : 1750
ريداتير : 1250
قميص مروحه : 550
جالون مياه : 51 ( مش عارف ده ليه ؟؟؟؟؟؟؟ )
فانوس أمامي يمين : 400
فانوس شابوره يمين : 390
مقاومه مروحه : 300
اجمالي قطع الغيار : 13660
نيجي بقي للمصنعيه :
رسم استخدام زرجينه : 500
أعمال السمكره : 1650
أعمال الدهان : 2800
أعمال الكهرباء: 450
أعمال ميكانيكا: 300
عفشه : 500
لزق زجاج : 250
ضبط زوايا : 150
اجمالي المصنعيات : 6600
ضيف علي دول 10 % ضريبه مبيعات
والله المستعااااااااااااااااااا ااااان
مفروض ان خبير التأمين هيروح بكره التوكيل ويناقش المقايسه وربنا يسهل
دي كدة مش خبطه صغيرة دي كدة العربية مدعوكة؟؟؟
دة بيغير صدر العربية و ردياتير و سربنتينة تكييف و جنب عفشة كامل و كبوت بالمفصلات !!!!!!! حضرتك متأكد ان الخبطة صغيرة زي ما وصفت مش مأثرة من جوة الحوض جامد
و زرجينة يعني ان فية عصرة في علبة الشاسية او الكارتيرة كمان !!!
حضرتك بصيت جوة حوض الموتور بعد الحادث؟؟؟
شفت الردياتير و السربنتينة بتاعه التكييف ؟؟؟؟
هل العربية كانت دايرة و مشيت بيها عادي بعد الحادث؟؟؟؟؟
و للا المياة نزلت منها و العربية مادارتش؟؟؟؟
واضح ان هما مش بيفكروا و بيغيروا كل اللي حوالين الخبطة و السلام
انا مش فاهم سيليكون اية اللي ب 200 جنية علشان يلزقوا برابريز امامي !!! دة اصلا انبوبة السيليكون تلزق 3 برابريز مثلا و السيليكون الاسود المخصوص ما يكملش 50 جنية للانبوبة
و 250 جنية مصنعية لزق الزجاج ليــــــــــــــــة صنايعي يحط سيليكون و يلزق قزاز ب 250 جنية في نص ساعه ازااااااااي !!!
دة انت لو نزلت جريش ركبت الزجاج هناك ولا بربع السعر دة
انا مركب عند جريش برابريز هوندا من 4 سنين ب حوالي 300 و شوية يعني على كدة اللزق السيليكون ب 200 و المصنعية 250 يعني الزجاج هناك ببلاش هههههههه
و علامة الرينو اللي على الشبكة ب 90 جنية !!!!!!!
هي دي وقعت من الشبكة من الخبطة و للا لازم يحطوا واحدة جديدة و خلاص !!!
شوف امورك مع التأمين انهم ياخدوا العربية تتصلح في الحرفيين دي ما تصرفش 7 لاف بالكتير قوي و كل حاجتها (اللي تلزم) تيجي و تركب في ورش برة
ربنا معاك و يعوض عليك خيراً منها بإذن الله
اعتقد ان احنا نقرا الفاتحه علي روح خبير التامين .. لا نه هيطب ساكت
لكن تعالي نحل فزوره النوره كمانورا
افرض مثلا مثلا يعني ان التوكيل مظلوم .. ده مثلا يعني
والمقايسه اللي حطاطها 100 فل و14
وان الاجزاء اللي في المقايسه مطلوبه بصفه ملحه مش مالحه لا مولحه.
وجه الاخ الخبير بعد ما فاق من الغيبوبه والصدمه العصبيه وعلاج 6 شهور علي نفقه الدوله ....
زعق زي الغول وراح يجعر ويقول ... لا مش تعاليلي يا بطه ... قال
المقايسه دي غلط
المفروض تبقي كذا وكذا ونشيل كذا تم كذا ...
وعمنا الخبير عشان خبير نقي ارخص الحاجات وقال ...
1- ليه بربريز امامي وجوان وسيليكون ....دي الناس بتدفع الافات عشان فتحه سقف ... خليهاله مفتوحه واهو الدنيا حر محتاج ليه البربريز.... مش بقول لكم خبير!!!!!
2-ليه الكشاف الامامي الاستاذ عماد ياخد حد من قرايبه معاه علي طول ويقعده جمبه ويمسكه كشاف واول ما الاستاذ عماد يحب ينور يقوله نور فينور ... والحل ده قليل التكلفه ويوطد اواصر صله الرحم ويا حبذا لو غير كل يوم قريب شكل مره ابن عمه مره ابن خاله ومننساش الجيران عشان النبي وصي علي سابع جار... خبير والله خبير
3- ليه سربنتينه تكييف ب 1750 جنيه ماحنا سبنا البربريز وبكده الهوا هيدخل مش هنلاحق عليه ...عجب والله عجب
4- نيجي للسمكره والدهان طبعا الست عبله كامل قالت في فيلمها الشهير " الليمبي" يا ساتر استر من دخول الحاره دي حاره وحشه والنسوان قراره.. طبعا الكلام ده صح 100% ... عشان كده ننصحك انك تسيب العربيه بحالتها كده توافقا مع مبدا "" سيبها تاخد العين""" ....
5- الحاجات دي طبعا شيل مصنعيتها والضرايب والحبشتكانات ...
بعد السرد ده كله يبقي الكوره فين قصدي الغلط علي مين
1- التوكيل اللي عنده زمه وجه الخبير بتاع الغيبوبه واقنعه بان مقايسته غلط:POINTIy2[2]:
2-التوكيل غلطان من البدايه انه يقول الحقيقه لازم كان يقول مقايسه قليله عشان يكسب تعاطف الناس:F_eyeb1[1]:
3-التوكيل عارف ان التامين هيساوم فعمل كده عشان لما التامين يساوم يبقي في المان:3mla:
4- التوكيل عامل كده مخصوص عشان يظهر مدي الود اللي بينه وبين التامين لما ينزله من الاسعار وعشان خاطر شركتكم انتواا بس هنصلحها ب 18000 بس مش 22000:120105~352:
5- استاذ عماد اللي فكر من الاساس يبقي زي الناس ويركب عربيه اساسا اعمالا لمبدا "" عيشوا عيشه اهاليكم"" :rfds:
اذا عرفت الحل اتصل علي اي رقم يبدا ب 22 الف وانت طالع
جايزه صابونه لاول 100 متصل احذرو التقليد
وخلي بالك من السلمه المكسوره ......دششسطخطخدششش
ايوه اللي وقعت فيها دي