هل تقاطع المنتجات الدنماركيه

**ahmedateya** · 06-03-2008 10:48 PM

المشاركة الأصلية كتبت بواسطة OlaOsman

ليه؟.. استفسار بس :)

علا باشا:) بما اني مش عارف اقول انسة ولا مدام:)
انا ضد المقاطعة دي تماما لأني مش شايف انه صح اني اقاطع بلد علشان واحد فيها قليل الادب
و كون بلد زي الدنمارك يتحمي حرية الرأي عندها و اللي يقول حاجة يقولها براحته يبقى مش اقاطع منتجاتها ... رايي الشخصي ان ده مش منطقي
و لو واحد صاحبك ابنه قليل الادب و شتمك او شتم اهلك اروح اقطع الكهربا عن بيتهم؟
برضه كلام مش صح
طب ما احنا طول النهار و الليل بنشتم فيهم و نوصفهم بالكفرة و المنحلين و المفسدين في الارض و هم على العكس بيدونا معونات و بيساعدونا على طول

انا على العكس بشجع المنتجات الدنماركية خصوصا منتجات الالبان و بموت فالجبنة الريكفور

و برضه خدت نفس الموقف من فرنسا ساعة موضوع الحجاب لأن كل واحد حر في ادارة بلده بالشكل الذي يراه

**khalid_adel** · 06-03-2008 10:52 PM

اكيد طبعا
بصو الصراحه مكنتش بجيب غير شوكولاته كيندر ودي كانت احلي شوكولاته بحبها وكانت غاليه اصلا بس حلوه
المهم اديني اول ماعرفت انها دينماركيه مدوقتهاش وان شالله عنى ماكلتها مش حيجرالي حاجه بس اديني بعمل حاجه مفيده

**PRO-DRIVE** · 06-03-2008 11:05 PM

ليه لما يمنعوا الحجاب نقول كل بلد حره تدير نفسها بطريقتها

و ليه لما يسبوا الرسول نقول حريه الرأي و التصرفات ووووو

:)

علي فكره المعونات مش للمساعده المعونات تقدر تقول كدا بيشتري الرأي الحكومي او الرسمي بيها :)

**Hassan Khalil** · 06-03-2008 11:34 PM

المشاركة الأصلية كتبت بواسطة ahmedateya

انا ضد المقاطعة دي تماما لأني مش شايف انه صح اني اقاطع بلد علشان واحد فيها قليل الادب
و كون بلد زي الدنمارك يتحمي حرية الرأي عندها و اللي يقول حاجة يقولها براحته يبقى مش اقاطع منتجاتها ... رايي الشخصي ان ده مش منطقي
و لو واحد صاحبك ابنه قليل الادب و شتمك او شتم اهلك اروح اقطع الكهربا عن بيتهم؟
برضه كلام مش صح

احمد باشا :) بما اني مش عارف اقول لحضرتك استاذ و اللا بشمهندس و اللا ابو حميد و اللا ايه .. :)
حضرتك احنا مش بنقاطع بلد علشان فيها واحد قليل الادب .. و اللا ما كنش حد فينا قعد في بلدنا اللي احنا فيها دلوقتي .
احنا بنقاطع بلد علشان فيها حكومة قليلة الادب .. و فيها جرايد قليلة الادب ..عايزة تزود مبيعاتها من هذا الطريق .. و حكومتها عارفة ان الموضوع ده سوف يؤذي اكتر من مليار و ربع في دول معرفش عددها كام .. و بتقول حرية رأي ..
و خليني اسأل سيادتك سؤال ...لو الصحف دي اتكلمت او لمحت من بعيد او قريب علي الهولوكست .. او علاقة النازيين باليهود او حتي تعاطفت مع الفلسطينين في غزة الان علي انهم ( مجرد ناس بيموتوا و ليسوا اصحاب بلد ) ..تفتكر ساعتها حيكون ايه الوضع .. الدنيا حتتقلب عليهم .. و حدوتة حرية الراي مش حتسمع عنها خالص .. ورؤساء تحرير هذه الجرائد اما سيقالوا او حيقدموا اعتذار رسمي في جرائدهم ... دي حاجة ..
ارجع تاني لكلام حضرتك .. ان مش معقول نقاطع بلد لمجرد ان فيها واحد قليل الادب ..هل معني ذلك اننا منقاطعش اسرائيل ؟؟؟ ..دا فيها ناس كتير قليلة الادب .. و ملهمش شغلانة الا التطاول علي مقدساتك و علي اهلك في فلسطين بل علي اهلك في مصر كمان .. دول كمان ليهم مولد في بلدك اقل ما يقال عليه انهم بيعملوا البلد في هذا اليوم .. ماخور...( مش نفس المنطق ؟؟!!!)
موضوع المعونات ...
معوناتك يا باشا كلها مشروطة .. اينعم من المفترض انها تكون موجهة لمشاريع تنموية .. و لكن حتي الادوات التي يقام بها المشروع لا بد ان تكون مشتراة من البلد المقدمة للمعونة ... غير انه ( و هذا هو الاهم و الاخطر ) ان المعونات دي تشترط تندخل بعض هذه الدول المانحة في بعض السياسات الخاصة بــ التعليم ( مثال : تعديل المناهج و خاصة الكتب الشرعية الازهرية ) .. الصحة و المرأة و الطفل ( مثال : مؤتمر المرأة .. و قضايا الحرية الجنسية .. و اباحة المثلية الجنسية .. الخ ) و الامثلة كثيرة ..

عموما .. انا بس حبيت اوضح بعض هذه النقاط .. لكن بصراحة .. كله كوم .. و انك بتحب الجبنة الريكفور .. دا كوم تاني !!!!
يا راجل .. بتاكلها ازاي دي ؟؟؟

عذرا للاطالة .. و اهه كله في الاخر .. حرية رأي

**meza** · 06-03-2008 11:45 PM

اللى حصل فى الدنمارك ده بيفكرنى بالعيل الصغير اللى تقوله كده غلط و هو يعند معاك و يعيد نفس الغلط .... فى حين لو ضحكت عليه بكلمتين حلوين هيسمع كلامك

دلوقتى هما بيبصوا للموضوع على إنه حرية صحفية ..... و الحرية دى هما كافحوا عشانها عشرات السنين .... فلما يجى ناس من بره بلدهم يحاولوا يسلبوا منهم الحرية دى .... مش هيسكتوا و هيعندوا أكتر.

بجد مش عارف هل المقاطعة دى هتأثر فيهم بشكل كبير؟! ...... و يحصل السيناريو اللى راسمينه فى دماغنا ..... الدنمارك تخسر و رجال الأعمل يضغطوا على الحكومة فالحكومة تضغط على الصحافة و توقف هذه المهذلة

رأيى السيناريو ده بعيد جداً ....

لو فى طرق تانية فعالة أكتر من المقاطعة يبقى أحسن

ليه مثلاً متصاحبوش بتوع الصحف دول !!!
يعنى ليل نهار بيغلطوا فى الأديان ... الإسلامى و المسيحى و عمرى ما سمعت إنهم قربوا من اليهودية ...... عارفين ليه .... بسبب الضغط الرهيب من اليهود عليهم.... و إعتبار أى كلام عن اليهود هو معاداة للسامية .... و طبعاً اليهود نجحوا إنهم يصدروا قانون فى أوروبا يجرم هذا الفعل الشنيع !!!
هنا مش بتكلم عن حوار بين الأديان ..... لأن اللى غلطوا فى الإسلام دول بيغلطوا برضه فى المسيحية ..... أنا أقصد يكون لينا رجِل هناك فى بلدهم.

لو زادت نقاط الإتصال بين الشرق و الغرب .... الخلافات دى هتقل جداً.
لكن لو زادت العزلة .... هتزيد معاها الخلافات... و الجو يخلى لليهود يتحكموا فى العالم براحتهم.

لعل المقاطعة أضعف الإيمان لكن على أرض الواقع لن تحقق شىء.

هذا رأيى

**ahmedateya** · 06-03-2008 11:51 PM

الناس دول مستعدين يموتوا قصاد حرية بلادهم
و نظام المقاطعة ده كل مرة بيثبت فشله
ولا ايه؟

**Hisham_ElFeky** · 06-03-2008 11:54 PM

اقاطع طبعا ....ولو مرة .....المسلمين يجتمعوا علي حاجة

انا مقاطع من زمان بس اكتشفت ان ساجد بياخد دواء من عند البعْده فجبتيلوا البديل المصري وربنا هوا الشافي

**ibrahimsaad** · 07-03-2008 10:36 AM

اسف اخوانى

سلاح المقاطعه سلاح قوى ورهيب اذا ماطبق منا بصدق واخلاص وقد ادى فعلا الى خسائر كبيره جدا فى الدانمارك المره السابقه

وانا شخصيا كنت احادث شخص دانماركى وكنت اتحدث معه عن تلك القضيه وكان لى بانر عن المقاطعه فى احد المواقع وقد ترجانى هذا الشخص ان ازيله من الموقع وكان ناقص انه يعيط علشان اشيله وهذا دليل على ان سلاح المقاطعه قوى جدا

نحن كشعوب للاسف فى وادى والحكومات فى وادى اخر

الحكومه للاسف لم ولن تتخذ موقف ايجابى نحو قضايا الدين

ولكن نحن كشعوب مطلوب منا اضعف الايمان ان نقاطع

وقضيه المقاطعه ليست جديده لانها طبقت على عهد الرسول صلى الله عليه وسلم حينما تم حصار المسلمين من قبل اهل مكه وقاطعوهم قطاعا اقتصاديا

نحن الان سلاح المقاطعه يعتبر علينا واجب لانه بايدينا نحن وليس الحكومات ومادام بايدينا فهو واجب وفرض

كل السلع تقريبا لها بدائل محليه فلما اذن نعطيهم اموالنا ليحاربونا بها تحت ادعاء الحريه الزائف

اللى قرفونا بيه ليل نهار واول مانستخدم هذا الشعار من قبلنا يكون هجوم علينا لانه حلال ليهم حرام علينا

بصراحه الكلام اللى بيقول المقاطعه مش مجديه ده كلام فارغ ومش صحيح لانه من اقوى الاسلحه وانا شخصيا سوف اقاطع واقاطع الى يوم الدين حتى لو اعتذروا وقبلوا الاقدام فلن اسامحهم ابدا ولن استخدم او اشترى منتجاتهم لو حتى اموت من الجوع وده مش هيحصل طبعا لان البديل موجود

**ibrahimsaad** · 07-03-2008 10:47 AM

المشاركة الأصلية كتبت بواسطة ahmedateya

الناس دول مستعدين يموتوا قصاد حرية بلادهم
و نظام المقاطعة ده كل مرة بيثبت فشله
ولا ايه؟

هذا هو الفرق بيننا وبينهم وكلامك هذا يؤكد كلامى

هم على باطل ويتمسكون بباطلهم
ونحن على حق ونفرط بحقنا

يبقى مين الافضل

للاسف هذا يثبت اننا ناس مش كويسه

لو عندنا ذره من الكرامه لقاطعناهم قطاعا كليا ولكن للاسف العرب كله لديهم بلاده نحو تمسكهم بدينهم وثوابتهم

وكل مايحلموا به ان يخلعوا جلباب العروبه والكرامه والعزه التى ورثوها عن اجدادهم عمر وابوبكر وووووووو ليلبسوا جلباب قله الادب والفسق والفجور تحت شعار عيش حياتك واعمل اللى انت عايزه دون قيود بالذمه دى حريه ؟

الحريه للاسف فاهمينها غلط الحريه عمرها ماكانت قله ادب وتطاول على الغير حتى لو اختلف معاك

ولنا فى ديننا وتعاليمه الامثال

كان شخص يهودى جار الرسول صلى الله عليه وسلم يؤذيه ويلقى على بابه القاذورات ووو يوميا ومع ذلك احد الايام لم يجد الرسول هذا الفعل فسأل عن اليهودى فعلم انه مريض فقام بزيارته

ارايتم هذا الشخص العظيم الذى وصفه الله بانه على خلق عظيم

هم الان يشتمونه ويسبونه اولاد الخنازير الفسقه

اليس من الواجب ان ندافع عن نبيينا ام نترك هؤلاء الكفره يسبونه ونحن صامتين وفى الاخر نقول دى حريه رأى

لا والله دى قله ادب وسفاله

-

مشاهدة نتائج الإستطلاع: هل تقاطع المنتجات الدنماركيه

الموضوع: هل تقاطع المنتجات الدنماركيه

LinkBack

أدوات الموضوع

عرض

-

-

-

-

-

المواضيع المتشابهه

حد يعرف حاجة عن المنتجات دى؟

حد جرب المنتجات دى من شركةk&n

سلسلة محلات كارفور تقاطع المنتجات الدنماركية

حدث عند تقاطع

الكلمات الدلالية لهذا الموضوع

المفضلات

المفضلات

ضوابط المشاركة