العربية الجديدة اتخبطت هو فيه كدا

العين جات ف العربية كنت ف شرم وراكن العربية قدام الفندق وما بتحركش بيها كتير لان معظم الوقت باقضية ف الفندق المهم ف نهاية اسبوع المصيف كانت العربية عليها كوم تراب يمكن هو دا ال مخلنيش اشوف الحكة ال ف العربية فرحت مغسلة اغسل العربية بالليل عشان مسافر الصبح وكلة تمام ومخدتش بالى من حاجة حتى بتاع المغسلة ما نبهنيش المهم رحت الفندق وركنت العربية وبافتح الشنطة وكانت الصاعقة لاقيت حكة واخدة من الفانوس الشمال الورانى لغاية الاكصدام طلعت فوطة وقعدت امسح فيها والحمد لله طلعت وما عديتش باينة انما ال ما رحش خبطة عند فتحة البنزين وكانها بشاكوش او بطوبة موش عارف والله اعلم يمكن من عربية كانت بتركن جنبى وحصل ال حصل
المهم الحمد لله

فداك يا باشا
المهم انك بخيير واسرتك بخيير
طبعا حاجه تضايق انما حتعمل ايه يبقى انت اكيد فى مصر
انا عندى 3 خبطات ولا واحده كونت سايق فيها العربيه

معلش فداك 1000 عربية ده طبيعي مع كل عربية زيرو
المهم إنك بخير إنت والأسرة

يا جماعة اوصيكم ونفسي باّيه الكرسي صباحا ومساءاً، وان شاء الله تبقى حافظ لينا من كل شر ومن عين كل حاقد.

اقتباس:

---

المشاركة الأصلية كتبت بواسطة tamernor

العين جات ف العربية كنت ف شرم وراكن العربية قدام الفندق وما بتحركش بيها كتير لان معظم الوقت باقضية ف الفندق المهم ف نهاية اسبوع المصيف كانت العربية عليها كوم تراب يمكن هو دا ال مخلنيش اشوف الحكة ال ف العربية فرحت مغسلة اغسل العربية بالليل عشان مسافر الصبح وكلة تمام ومخدتش بالى من حاجة حتى بتاع المغسلة ما نبهنيش المهم رحت الفندق وركنت العربية وبافتح الشنطة وكانت الصاعقة لاقيت حكة واخدة من الفانوس الشمال الورانى لغاية الاكصدام طلعت فوطة وقعدت امسح فيها والحمد لله طلعت وما عديتش باينة انما ال ما رحش خبطة عند فتحة البنزين وكانها بشاكوش او بطوبة موش عارف والله اعلم يمكن من عربية كانت بتركن جنبى وحصل ال حصل
المهم الحمد لله

---

فداك العربيه وكويس انها اتخبطت ومفيش حد فيها
انا تقريبا اتعودت على الموضوع ده
من فتره اكتشفت خبطه في العربيه وهي مركونه
بجانب الفانوس وغالبا كانت بسبب موتوسيكل دليفري
اتضايقت طبعا وقتها بس خلاص هأعمل ايه بعد ما اتضايق؟
العضو المنتدب في الشركه عربيته مرسيدس ولسه جديده
وكان في الساحل ونزل يفطر وهي مركونه تحت البيت
رجع لقى الشنطه متطبقه وما بتقفلش خالص والفانوس مكسور

اولا حمدلله على سلامتك والحمد لله انها بتيجى في الحديد

ربنا يعطيك خيرها ويكفيك شرها

تقبل مرورى

الحمد لله انك بخير
عادي يا باشا خليك فريش انت في رحله
يا ما هتلاقي
انا طلعت عيادتي و راكن العربيه تحتها نزلت لقيت خبطه متينه في الرفرف اللي قدام على الشمال و بويه حمرا على دهاني الابيض والحمد لله مفيش حاجه اتكسرت بس الرفرف اتعوج سنه
وبرضوا طلعت عيادتي في يوم تاني نزلت لقيت الكبوت فيه نقره فظييييييعه و شكلها طوبه و حمدت ربنا ان ما جاتش في الازاز
ركنت عربيتي عند البيت في بارك كده حكومي بيقف فيه عربيات كتير نزلت تاني يوم و بشيل الغطات عن العربيه لقيت الاكصدام اللي ورا محفووووووووووووووور و الغطا المشمع مقطوع وواضح ان كان فيه عربيه كانت راكنه ورايا و هوه بيطلع المسمار اللي مثبت النمر او عنده حاجه في الكصدام اللي قدام حاميه فعلت هذه الفعله الشنعاء
الحمد لله كل اللي بييجي في الريش يبقى بقشيش
و الحمد لله اننا بخير

الاخوة الكرام شكرا على مروركم وكل سنة وانتم طيبين ورمضان كريم
فعلا الحمد لله وصدق المثل
ال يشوف خبطة غيرة تهون علية خبطته
هونتم عليا وربنا يسترها علينا جميعا

دأنت دفعت الضريبه كدا خلاص :)
دى لازم لكل عربيه جديده :)
فداك