الموضوع: بخصوص اللانشيا يا جماعه عاوزين همه شوية

السلام عليكم

مبدئيا انا بشكر المنتدى و كل الاخوة اللى شاركوا فى قسم الداتشيا

بس يا جماعه بصراحه انا ملاحظ ان الناس لسه مش مشاركه بقوة

يعنى العربيه محدش يعرفها والناس تخاف ما تجهل

ليه الاساتذه اللى يعرفوا فيها لسه معملوش شغل عالى برضه رغم المجهود الكبير المبذول حتى الان

يعنى اهم اشياء تهم شارى السيارة انه يعرف مميزاتها ، عيوبها ، استهلاكها للبنزين ، اماكن بيع قطع الغيار بالتفصيل ، اسعار قطع الغيار و مدى توافرها ، ايه هى قطع الغيار اللى ممكن تركب عليها من موديلات تانيه ( سمعت كلام عن رينو 9 ، و لوجان فهل ده صحيح على انهى قطع بالضبط ، برضه بالنسبه لتوكيل رينو هل ممكن يقدم قطع غيار ولا لا ، وهل قطع الغيار دى اصليه ولا استيراد ، ولا ايه نظامها ( انا مش بتكلم عن التوكيل طبعا لانه المفروض انها اصليه عنده اانما بتكلم عن المحلات العاديه

يعنى انا شوفت موضوعات لبعض الاساتذه الافاضل ذكرو نبذه عن قطع غيار الداتشيا ، بس حوالى 8 او 10 اصناف ، لكن لسه فى اصناف مهمه كتير قوى زى تيل الفرامل و فلاتر الزيت ولبنزين والهوا ....الخ طبعا انا عارف ان السادة الافاضل مش ملزمين بالرد عليا ولا على غيرى ، انما هو مجهود فردى منهم ربنا هو اللى يكافئهم عليه ، وحنا كبشر لا نملك لهم الا الاعتراف بالفضل والشكر

برضه بالنسبه لاماكن قطع الغيار انا ملاحظ انها اماكن عامه بدون عناوين محدده او ارقام تليفونات ، انا عارف ان الغرض كان عدم اعتبارها اعلان ، لكن المنتدى مليان بارقام وعناوين ميكانيكيه و محلات قطع غيار وغيره ، وانا اتمنى اننا نستأذن الاشراف على المنتدى انه يغض النظر عن هذه النقطه لاعتبارات ندرة السيارة

سؤال برضه لاساتذة الداتشيا ، انا مش قاهرى لكن بسافر للقاهره اسبوعيا مره او اتنين ( من الزقازيق ) فباختصار هل يمكن ان يصلح هذه العربيه اى ميكانيكى شاطر ولا لازم ناس متخصصه ، يعنى فيه عربيات بتبقى معقده شويه زى الفورد ، و الاكسارا وغيره فهل الداتشيا كده برضه ، ولا زيها زى عربيات اوروبا الشرقيه اى ميكانيكى بيفهم هيفهملها بسهوله لان مبادئها هى نفس مبادى الباقيين

برضه انا فهمت انها انجكشن ولا انا غلطان ، وايه استهلاكها للبنزين ، و 80 و لا 90
طبعا انا بتكلم عن الموديلات الشائعه 98 99 2000 نوفا

ولا بعتبارى غير قاهرى بلاش منها ، رغم انى فعلا معجب بيها جدا ( شكلا وسعرا )

اكرر شكرى للجميع وارجوا الا يغضب منى احد لكن نفسى العربيه يبقالها حس بيكم

اخوكم

د شريف