بجد كان يوم رائع و جميل جدا جدا جداا, و اجمل ما فيه من حضروه
وصلت متأخر شويه انا و شنوري و والدته ( و السبب ان شنوري كان بيتكلم في الموبايل) :ma:
و كمان احمد مصطفى و حرمه كانوا في العربيه اللي قصادنا و دخلنا سوا متأخرين
بالمناسبه دي, والدة شنوري ست زي العسل والله, ربنا يخليهاله
مع اني انا و هي اتفقنا اننا نرمي شنوري من العربيه و احنا رايحين
و يرجع هو بمعرفته, لأنه عمل اللي عليه و وصلها خلاص, هيجي معانا كمان!! :))
دخلنا المطعم, و ما شاء الله, العدد كان كبير من الاعضاء و العضوات الكرام
خلصنا فطار, و نزلنا قعدنا في الكافيتريا (في الهواء الطلق)
القعده كانت اكثر من رااااااااائعه, و كفايه اني شفت اصدقائي اخواتي
اللي بقالي كتيير ماشفتهمش, و سعيد جداا اني اتعرفت على اعضاء جدد
جمعني حديث شيق مع المهندسين خريجي جامعة المطريه
و اللي كرمهم كريم باسم المنتدى, و ما شاء الله عليهم
شباب تشرف و عندهم طموح و عزيمه و ان شاء الله
يقدروا يعملوا حاجه كويسه قوي السنه اللي جايه
و جمعني لقاء و انا ماشي بالصدفه بالانسه آيس, ربنا يبارك فيها
و جزاها الله خير على المصليات (فكرتها مبتركه جدا, و شيك)
الجميل بقى اني طلبت ايد بنت كريم منير (8 سنين تقريباً) و كريم وافق :)))
يعني اللي هيزعلني, هوقفه شهر مع الشغل (ما انا مناسب رئيس جمهورية المنتدى)
ربنا يبراكلك فيها يا كريم, هي و ابنك ولي العهد :))
نيجي بقى للمفيد... الكنـــــــــــــافه بتاعة والدة شنوري (يعني اسكندراني اصلي)
الكنافه دي كانت عندي في العربيه, و المغرب اذن علينا في الشارع
و جبنا مياه و فطرنا, و والدة شنوري قالتلي كل كنافه يا محمد...؟؟
قلتها بلاش, اكييد الأعضاء هناك هيبقى نفسهم يذوقوها (شمعه تحترق من اجل الآخرين)
يعني انا السبب في وصول الكنافه دي ليكوا بسلام... فين حقي؟؟؟ :36_1_2[1]:
اي حد كل من الكنافه دي, مسؤل امام الله انه يديني نسبتي... و الموضوع بسيط
25 جنيه على كل قطعة كنافه (للسيدات و الآنسات)
15 جنيه على كل قطعة كنافه (للرجال و الشباب)
هتسألوني يا كابتن غازي (كابتن لطيف سابقاً), اشمعني البنات اغلى؟؟
لأنهم المستفيد الرئيسي و الأول, بل و الأكثر استفاده من موضوع الكنافه دي
لانها كانت عندهم اصلا, و الرجاله الغلابه (اللي هو احنا) ما شوفناش منها
إلا رفايع كده, و مش كتيييييير.... طيبين والله :))
بجد اليوم كان جميل جداا, و كنت سعيد بالتواجد وسط الكوكبه الجميله دي
كل عام و انتم و نايل موتورز بألف سلامه, و رمضان كريم على الجميع