فكرة جديدة لحل سخونة السيارة بشكل طاريء

**Adham** · 21-08-2010 01:45 PM

لو يوم حار جدا و انت ماشي في طريق زحمه او مستعجل و لقيت العربية ابتدت تسخن منك و مؤشر الحرارة ابتدي يرتفع عن الطبيعي

و معندكش وقت و مافيش امكانية تقف و خايف انها تبتدي تسخن اكتر من كدة بالذات لو العربية دي معتاده الاداء السيء للتبريد في الجو الحار (زي بتاع اليومين دول) برغم انك متأكد ان المياة مش ناقصة ولا فية خرطوم مقطوع او بيسرب تعمل اية

شغل التكييف السخن

نزل الهواء عالفتحات اللي تحت عند الرجلين (علشان مايلفحكش في وشك) و سخن التكييف السخن للاخر و المروحه للسرعه القصوى

و استحمل بقى في سبيل انك توصل مشوارك و بسرعه و من غير عطلة

كلنا عارفين ان التكييف السخن في السيارات بيعتمد على استخدام مياة الردياتير في تدفئة الكابينة

يعني زي ما نقول كدة ان فية ردياتير تاني ورا تابلوة السيارة مياة دورة التبريد بتمشي فية ومروحه التكييف بتنفخ هواء على الردياتير دة علشان تسخن الهواء و يطلع بعد كدة من فتحات التكييف للتدفئة

يعني في الاخر هي نفس فكرة الردياتير برضة بس دة اصغر و جوة السيارة

يبقى ممكن تستغلة في زيادة كفائة التبريد كحل مؤقت و سريع في الطواريء

و لكن بشرط ان تكون متأكد ان العربية عيبها السخونة في الجو الحار و ان مافيش تسريب مياة منها او نقص مياة

و يفضل لو تزود القربة و ترش شوية مياة على سربنتينة الردياتير من الأمام ( و العربية دايرة) و طبعا تطفي التكييف البارد علشان مايسخنش العربية زيادة (الكومبريسور ممكن يشتغل برضة اثناء السخن ماهو شغال و تلاقي خارج عليك مزيج من الهواء البارد و الساخن في نفس الوقت من فتحات التكييف - و دي من اعاجيب السيارات )

انا جربت الطريقة دي قبل كدة و كانت فعالة في حدود المعقول ياريت اللي عنده مشكلة سخونة يجربها و يقولنا تجربتة اذا كانت فعالة معاه ام لا

و كل سنة و انتم طيبين و صيف سعيد عليكم و على عربياتكم

**aYaBooY** · 21-08-2010 03:33 PM

الفكرة كويسة بس طبعا يا ريت قبل استعمالها ياريت يتاكد ان التكييف السخن مش مفصول من الاساس

**Adham** · 21-08-2010 03:53 PM

ماتقلقش لانك حاتحس بلفحه هواء سخن جميلة اول ماتشغلة حاتعرف منها انة شغال و بيطلع صهد

بس طبعا دة و العربية سخنة
لانة اول الدوارة و السيارة باردة بتكون المياة لسة ماسخنتش و بالتالي مافيش اي تكييف سخن حايشتغل مروحه و بس

**ahmed_moeaz** · 21-08-2010 05:04 PM

عن نفسى بخلينى فى الجانب الآمن وبنزل 5 دقايق وادور تانى واخد هوا الاردراتير وازود ميه ودرجة الحرارة بتنزل لاقصى درجاتها ودى اكتر طريقة فعالة وآمنة و5 دقايق ميعتبرش توقف

**mr_sameh** · 21-08-2010 06:53 PM

الحمد لله الكورولا مفيهاش مشاكل السخونه

**wdramiz** · 23-08-2010 04:39 PM

المشاركة الأصلية كتبت بواسطة ahmed_moeaz

عن نفسى بخلينى فى الجانب الآمن وبنزل 5 دقايق وادور تانى واخد هوا الاردراتير وازود ميه ودرجة الحرارة بتنزل لاقصى درجاتها ودى اكتر طريقة فعالة وآمنة و5 دقايق ميعتبرش توقف

ممكن اعرف ازاي اخد هواء الردياتير ..... العربية لانسر بومة

**ahmed_moeaz** · 23-08-2010 05:26 PM

المشاركة الأصلية كتبت بواسطة wdramiz

ممكن اعرف ازاي اخد هواء الردياتير ..... العربية لانسر بومة

فيه مفتاح فى الاردراتير بتهوية شوية والعربية دايرة وهو بيخرج الهوا من دورة المية مش عارف ان كان موجود فى البومة ولا لأ
ولو مش موجود ممكن تشيل الخرطوم الراجع لقربة المية من الاردراتير والعربية دايرة برضو لفترة وانت بتزود مية والهوا اللى فى دورة المية هيتسحب

**aymanay32** · 25-08-2010 07:10 PM

الجو اصلا حر و فى رمضان و اشغل التكييف السخن و انا صايم يبقى انا اتجنينت و لا ايه

الفكرة دى معقوله نظريا فقط و عمليا لازم تعمل حاجة تسحب الهواء السخن من العربية

**Adham** · 25-08-2010 11:18 PM

المشاركة الأصلية كتبت بواسطة wdramiz

ممكن اعرف ازاي اخد هواء الردياتير ..... العربية لانسر بومة

تاخد هواء الردياتير فقط لو فية هواء في دورة التبريد و لا يتم عمل ذلك الا لو دخل هواء نتيجه فك احد مكونات دورة التبريد (خرطوم - كوعه - ثرموستات - ردياتير .....)

و يوجد مسمار هواء (مقاس مفتاح 10) في بعض انواع السيارات مكانة في كوعه المياة (الانتامونيا) فوق ثرموستات الكوعه غالباً و يتم تهويتة اثناء ما السيارة دائرة و الردياتير مفتوح و يتم تزويد مياة ثم فتح المسار سنة بسيطة ليخرج بعض الماء و بة فقاقيع هواء ثم تم ربطة و تزويد شوية مياة في الردياتير و بعد نصف دقيقة تكرر مرة اخرى , عدة مرات تكرر العملية حتى تجد ان الماء يخرج صافيا من مسمار الهواء و لا يوجد بة اي فقاقيع هواء

بعض السيارات لا يوجد بها مسمار هواء لدورة التبريد و يتم إخراج الهواء فيها بان تقوم بتبطيل السيارة و الردياتير مفتوح ثم تدورها مرة ثانية عدة مرات متتالية مع تزويد مياة في الردياتير

و بالطبع تتم تلك العملية و السيارات باردة حتى يمكن فتح الردياتير و تزويد الماء مع إخراج الهواء

**Akram** · 26-08-2010 11:05 PM

انا لاغي التكييف السخن ,
لكن لو حصل لازم اقف شوية و افتح الكبوت و اراجع دورة المياه علشان في الغالب هيكون فيها تسريب ,
و اسيب العربية تبرد و أحاول اعالج سبب التسريب و لو مؤقت و بعد كده اذور ميه و اروح لأقرب حد يعالج الموضوع ,

العربية مش هتسخن الا بسبب .... و المياه مش هتنقص الا بسبب ...