المروجه وقفت ووقفت مكانتها

النهاردة روحت مشوار وللاسف مؤشر الحراراة زاد عن المعتاد
ركنت السيارة على جنب ورفعت كبوت السيارة اكتشفت ان المروحه مش شغالة
شيكت على الفيوز تمام الكلبس اللى موصل للمروجه مفهوش قطع
انا سيارتى ريجاتا نوفا هل ينفع اشغل المروجه مباشر ولو ينفع ازاى لانى معرفش
هل ممكن يكون ترموستات الحرارة عطلان علشان كده المروحه مش شغاله ولو هو السبب مكانه فين علشان افكه واغيرة بالمرة
وهل ممكن تكون المروحه اصلا من السخونية الزايدة باظت وازاى اعرف
برجاء الاهتمام بمداخلتى نظرا لانى ركنت السيارة بعيد عن مكان عملى وبيتى لكن امان ان شاء الله
وشكرا لجميع الاعضاء

الترموستات ممكن يكون اتحرق او تكون دورة المية فيها هوا فميشتغلش
بالنسبة للمروحة فليها زرار بتشتغل منه هتلاقيه على ايدك اليمين فى الجنب بسوا الكاسيت تقريباً تشده المروحة تشتغل بس متحملش عليها لفترات طويلة علشان متتحرقش

اختبار المروحة كالاتى : طبعا و العربية بقت هادية باردة يعنى اتاكد من ميية الردياتير مظبوطة . . بعدين و انت فاتح كونتاكت روح للفيشة اللى قبل الثرموستات و بسلكة 1مم مش اقل عشان متسخنش و تسيح فكها من بعض و اعمل قفلة بين طرفين الفيشة اللى جايين من الضفيرة لو دارت المروحة خير يبقى عيب ثرموستات يتغير . لو مفيش فيشة قبل الثرموستات هتلاقى كلبسين راكبين على الثرموستات فكهم و لمسهم ببعض لو دارت المروحة خير يبقى عيب ثرموستات و متخفش دول مش كهربا دول ارضى . المفروض تلاقى الثرموستات تحت فى اخر الردياتير . و فى حالة ان المروحة اشتغلت بالطريقة دى ممكن تمشى بالعربية تروح لكهربائى او بتاع ردياتيرات او ميكانيكى المهم تاكد من ان الكبرى او التلميس اللى عاملة ثابت ميفكش مع اى مطب و الا هتسخن منك تانى . و طبعا شوف الثرموستات اللى راكب عندك كام بيفتح على كام 93 و لا 90 ولا 85 و لا 80 و دا مكتوب على الثرموستات نفسة و تجيب زيية

السلام عليكم
المداخلة دة بتاعت صاحب السيارة
هو عمل زى ماحضرتك قولت
جبت سيلك تخين وربطته بالكلبسين وركبته المروحه اشتغلت والحمد لله
لكن المشكلة الان انى لم ببطل السيارة بتظل المروحه شغاله ولو سبتها ممكن بل اكيد ممكن تفضى البطارية
انا نزعت الفردة السالبه من البطارية حتى اقدر امشى
سؤالى الان هل فى ضرر لو مشيت على كدة ولا لا برجاء الاهتمام والرد السريع للاهمية

متابع باهتمام

كده يبقي عيب ثرموستات الموضوع اسهل من ما تتخيل دا بيتغير في اقل من 10 دقايق
اعمله وما تنتنطش علشان المروحه لو قاعدت شغاله علي طول هتتحرق

انا سؤالى هل فى ضرر على السيارة لو انا مشيت والمروحه شغاله حتى اغير الترمستات فى اقرب وقت ممكن لى
لان انا عملت قفله بالسلك التخزين وخايف يأثر على اى مكونات فى السيارة
ارجو الافاده بسرعه لانى راكن السيارة وخايف امشى بيها

اقتباس:

---

المشاركة الأصلية كتبت بواسطة amro1965

انا سؤالى هل فى ضرر على السيارة لو انا مشيت والمروحه شغاله حتى اغير الترمستات فى اقرب وقت ممكن لى
لان انا عملت قفله بالسلك التخزين وخايف يأثر على اى مكونات فى السيارة
ارجو الافاده بسرعه لانى راكن السيارة وخايف امشى بيها

---

هوة حضرتك هاتسيب الوضع على كدة تقريبا قد اية يوم يعنى ولا اتنين لحد ما تفضى وتروح للكهربائى يغيرة مفيش مشاكل بس تجنب بقى المشى الكتير بالعربية لان كل دة حمل على المروحة نفسها وسلوك المروحة والقفلة الى حضرتك عملتها بحتتة السلك دى
لان المروحة على طول شغالة وهاتضعف البطارية بالمنظر دة الترموستات على الاقل بيخليها تفصل شوية وتريح وبعدين تشتغل تانى
هوة فى العادى لما الترموستات كان شغال لما كنت بتبطل العربية كانت بتقعد المروحة شغالة شوية وبعدين تطفى لوحدها دة لان الترموستات درجة حرارة المية بتقل شوية مع تبطيل العربية والمروحة شغالة والحرارة بتنزل وبعدين الترموستات يبقى اوف وفى الحالة دى المروحة تبطل ولو جاى من مشوار بعيد والعربية سخنة جامد هاتلاقيها بتغيب قوى علشان المروحة تفصل بعد ما تبطل ولو مشوار على الخفيف كدة هاتلاقى المروحة يادوبك تبطل العربية تقعد ثوانى وبعدين تفصل
هية دى شغلانة الترموستات
وطبعا مانصحش حضرتك انك تسيبها كدة فترة كبيرة لازم تغير الترموستات وحاول تعمل لمبة بيان صغيرة للمروحة لو مفيش عندك فى التابلو وماعتقدتش ان مافيش دة الريجاتا يعنى كانت سابقة زمانها بحكاية لمبات البيان وكمبيوتر الاعطال واكيد هاتلاقى بيان للمروحة بتاعت الريداتير

صديقى العزيز انا مش محتاج اكثر من مسافة رجوعى من عملى مكان مركنت السيارة الى منزلى حيت اصحاب المهن موجودين بكثرة واللى ان شاء اللة سوف يغيروها فورا
انا كل خوفى ان الوصله تأثر على شىء فى السيارة خلال عودتى لانى لما نزعت الطرف السالب من البطارية عمل زى شرز وانا بركبه تانى فده اللى مقللقنى
لعلم حضرتك انا على استعداد لتغيرة لانى فى سيارتى القديمة شوفت الصنايعى فك الترمستات قدامى وغسل الرداتير ووضعنا فيه مياه خضراء جديدة
فلو المشى بالسيارة بتلك الطريقة هيتأثر اغيرها بنفسى وامرى لله

انصحك بالاتى :

1: غسيل دورة التبريد جيدا
2: التاكد من عمل مروحة السيارة بصورة طبيعية لانها ممكن تكون ضعفت
3: التاكد من عمل طلمبة المياة
4: كفاءة عمل الثرموستات

اعمل دول وقول النتيجة عشان نكمل المشوار التانى

ومش كل حاجة الميكانيكى يقولك عليها تغيرها لو قالك غيرها وطلع العيب مش منها قولة مش هدفع تمنها وابقى اتفق معاة قبل ماتشتريها لان للاسف الميكانيكى بيقعد يجرب ويصابت يامصابتش وانت اللى بتدفع وفى الاخر يبقى عيب هايف وتلاقى نفسك داخلك فى 100 جنية

الحمد لله انحلت المشكلة وبدون الذهاب الى أى فنى وذلك بفضل الله اولا واخير من خلال اسبابه التى وضعها فى طريقى المتمثله فى الاعضاء الكرام الذين لم يبخلوا علينا بخبراتهم
اشتريت ترومستات جدبد مكان القديم الذى كان عليه طبقة املاح كبيرة التى تسببت فى عدم تشغيل المروحه عن السخونه
نظفت دورة التبريد من خلال وضع خروطوم مياه بقوه حتى يتخلل كل قطع بالريداتير وغيرة بحيث لو فيه وساخه او صدا ينزل مع اندفاع المياه
بعد تركيب الترمستات واضافه المياه وضخها حتى امتلات والتأكد ان المياه وصلت للريداتير ومنه الى الموتور لتبريدة
بعد ذلك شغلت السيارة وتركتها وضليت متابعه المروحه حتى عدا المؤشر 90 اشتغلت المروحه ثم طفت عندما قلت الحرارة عن 90
المشوار تكلفته كلها 15 جنيه ثمن الترمستات لانى بفضل الله وتوفيقه فكيت المروحه حتى اقدر افك الترمستات واركبه وبعده اركب المروحه تانى
اجمل شىء انك تحس انك تقدر تعمل شىء بايدك بس مش أى شىء الشىء البسيط لكن اكثر من ذلك يفضل ميكانيكى موثوق فيه
شكرا لكل الساده الاعضاء
كل سنه وانتم طيبيون

أنصحك بأنك و انت عند الكهربائى قولى يعمل لك مفتاح شدة واحدة لتشغيل مروحة الرادياتير علشان لو عندك المفتاح دة و الترموستات باظت ممكن تشغل المروحة يدويا بمنتهى السهولة و لا تنسى أغلاق المفتاح عند ركن السيارة و يفضل يكون المفتاح متوصل بلمبة اما لمبة حارجية او اى لمبة نور فى التابلوة و دة شكلة أشيك و أحسن و قصة سهلة جدا وصلها على لمبة الفوج لايت مثلا لو معندكش فوج لايت او لمبة سخان الزجاج الخلفى لو السخان مش شغال الى يريحك و يناسبك و بكدة حتى و انت ماشى عادى اول ما المروحة تشتغل خا تاخد بالك و تبقى مراقب المروحة بسهولة

صورة توضيحية يا باشا زى كدة و شكلها مش وحش أحسن من اللمبة الخارجية الى تركبها فى اى مكان تانى جوة التابلوة اشيك http://img838.imageshack.us/img838/7364/14032010214.jpg

و انت بالف صحة و مبروك حل المشكلة