الموضوع: قائمة سوداء باصحاب الورش والمراكز والمحلات في كافة مجالات السيارات

فى سمكرى (او متنكر فى صورة سمكرى) فى الحى السابع او ما يسمى بحرفيين مدينة نصر اسمه رضا..جنب رضا الكهربائى الشهير هناك"مش عارف مشهور على خيبه ايه هو التانى"
كنت بعربيه اختى من حوالى سنتين وواحد خبطنى فى الشنطه ولأنها مش عربيتى مرضيتش ارجع بيها مخبوطه خصوصا انها كانت خبطه خفيفه ومش مستاهله اخبط مشوار للحرفيين
رحت لرضا ده وقلت اهو اغلى شوية بس اريح دماغى وعموما هتفق معاه على السعر من قبلها..
رحت قلتله هتاخد منى كام؟قاللى لازم افك فرش الشنطه من جوه عشان اشوف الخبطه واصله للضهر ولا لا..المهم 4-5 اتلموا لى العربيه شالوا الاكصدام وفرش الشمطه ولقيتهم بيدقدقوا مناهم لنفسهم كده..قلت للاسطى بتاعهم مش نتفق على السعر الاول؟قالى مش هنختلف..قلتله لا..اكيد هنختلف ولازم اعرف هتاخد منى كام
المهم قالى 400 جنيه !!!!!
قلتله لا ياعم كتير قالى بعد ايه..اخلاص ردينا الخبطه..يعنى رد خبطه على البارد ف اقل من 10 دقايق وعاوز 400 جنيه وبالخناق دفعت 300 جنيه ومن يومها مش طايق اعدى جنب المنطقه كلها...خصوصا ان شغله زى الزفت والشنطه لغايه دلوقت مش بتقفل صح ومفارقه عن الاكصدام وممكن تفتح لوحدها

اوسخ كار فى الدنيا اوعى تسلم عربيتك لحد متعرفوش ولو متعرفش اسأل كويس

المشاركة الأصلية كتبت بواسطة mazdaprotege

اسوأ مكان ممكن اروحة و لن اذهب هناك تانى فى حياتى
انا حاحكى لكم ملخص لتجربتى الوحيدة معاهم و اقسم بالله انى لا اتجنى و ازيد عليهم فى شىء و اقسم بالله انى اقول الحقيقة
انا كنت شاري فورد مونديو جيا و بعد ما ركبتها شوية فكرت فى بيعها لان مصروفاتها كانت اكبر من امكانياتى و غير متعود عليها مقارنة باليابانى اللى انا اصلا باحبة
و عندما عرضت السيارة للبيع اتصل بي شخص يريد الشراء و طلب منى ان يذهب للكشف عليها فاخبرتة بان يكشف عليها فى اى مكان يرغب فية
و اتفقنا على موعد و تقابلنا و ذهبنا هناك ( مركز تكنو بوش) و هناك وجدت اسوا ما يمكن وصفة فى فحص السيارة التى هى اصلا مملوكة لى و ليست ملكهم حيث فوجئت ب 5 افراد يكادوا يمزقوا السيارة بمجرد دخولها حيث فكوا كاوتش الابواب و الشنطة و كسر الكلبسات التى تربط فرش الشنطة من الداخل و نزع الفرش بالكامل و بدات الجولات و الحوارات و النقاش الساخن بينهم بان السيارة دى مقلوبة و الاخر يقول لا و اللى يقول انها مغيرة سقف و التانى يقولوا لا و اللى يقول دى مغيرة ابواب و راشة دواخل و ابواب و الاخر يقولوا لا
تخيلوا كل هذة الحوارات امام المشترى ؟؟؟؟؟؟؟؟؟؟؟؟؟؟؟؟؟
و تخيلوا مدى احساسى بلالم و الندم الذى اصبت بة و انا اسمع هذا الهراء و الجهل و الفهلوة عن سيارتى ملكى اللى انا راكبها و اعلم تمام اليقين انها سليمة 100 %
الى ان حسمت النقاش بحزم و ادب و اعتذرت للمشترى عن اضاعة الوقت و انى لا يعجبنى الكلام دة و لن اشترك فى هذا الهزل مع شوية صنايعية جهلة و اخذت سيارتى المفكوكة التى تم تشريحها و خرجت بها من المركز و انا امر باسواء حالاتى النفسية و باسأل نفسى ان دة عمرة ما كان طريقة فحص او كشف
و ركبت كاوتش ابواب سيارتى و فرش الشنطة بدون الكلبسات اللى اتكسرت و رحت اشتريت غيرهم و جة بعد كدة صاحب النصيب اللى فحص العربية باحترام و تاكد من حالتها و اتباعت و فرحان بيها لحد دلوقتى
بس فى النهاية انا خرجت من عندهم و حلفت انى عمرى ما حاتعامل معاهم ابدا لانهم خلونى وصلت لاسوأ حالاتى النفسية لنى عمرى ما شت الطريقة دى و لا سمعت عنها
و لما راجعت اللى حصل افتكرت ان فيهم واحد كان عندة عربية فورد زيها و اخد الراجل اللى كان عايز يشترى عربيتى و فرجة على عربيتة فكدة انا فهمت انهم كانوا بيفطسوا عربيتى علشان مصلحتهم
حسبى الله و نعم الوكيل فى كل اللى معنوش ضمير
و الله على ما اقول شهيد

ياأخى العزيز ، أنت مخطئ من البداية أن قبلت بالفحص بهذه الطريقه وكان يجب عليك من أول محاولة لفك أى كلبس فى السيارة أن توقف هذه المهزلة فورا وتعلن للمشترى برفضك شراءه للسيارة وتسيبه وتمشى. الفحص يكون ظاهرى وليس بفك أى جزء من السيارة

المشاركة الأصلية كتبت بواسطة karim_monir

انا رديت على حضرتك في موضوع سابق وقولتلك انهم بيطلعو شهادة كشف على السيارة مختومة باسمهم
ولو طلع فيها مشكلة المشتري هايرفع عليهم قضية غش وتدليس لو كانت العربية مقلوبة
ولو حضرتك نزلت الحرفيين هاتشوف ازاي العربيات اللي مغيرة سقف بتتلحم من اماكن معينة تحت الفرش وتترش تاني بحيث انها مستحيل تبان غير لما الفرش والكسوة والجلد يتشالو عشان يتعرف ملحومة ولا لاء
ولو كنت انت مكان المشتري كنت هاتبقي مبسوط جدا
لكن هل اتعاملت معاهم في خدمة او اصلاح وكانو سيئين ولا مجرد الكشف على السيارة بطريقة (مهينة) هو اللي زعلك

هل من المعقول لما آجى اشترى عربيه مستعمله أفككها وأجردها على الصاج .. اسمحلى كلامك غير معقو ل وغير منطقى ولا يقبل به أ ى بائع سيارة مستعمله يحترم نفسه

حسبي الله ونعم الوكيل

الاخوة الافاضل علشان نكون عمليين افهموا الكلام الى هقوله كويس من خبرة 15 سنة مع مجموعة عربيات كتيرة
مفيش حاجة اسمها مركز صيانة كويس و مركز وحش و الموضوع ده مستحيل يكون له قاعدة ثابتة , الصنايعية الى بيشتغلوا فى العربيات هما الاساس و بطبيعة الحال كلهم تقريبا ناس قرفانين من عيشتهم من ظروف البلد و ظروفهم و ماعندهمش صبر ولا اهتمام حقيقى باتقان اى شغل و عاوزين ينجزوا و ياخدو فلوس و يروحوا و خلاص و بيختلفوا عن بعض حاجة بسيطة فى الاهمال و التخريب و الكروتة , الكلام ده فى افخم التوكيلات زى ماهو عند احقر ورشة و مهما كان نظام الادارة و المتابعة مستحيل السيطرة الكاملة على التزام الصنايعية بتفاصيل التصليح الصحيحة و العربيات الحديثة اكيد بقت اكثر دقة و نعومة و ضعف فى اجزائها و فك و تركيب اجزاء كتير بدقة و بدون تلفيات محتاج صبر و وقت و اتقان مستحيل يتوجد فى الزمن ده و الظروف دى و موضوع قطع الغيار برضه معقد من ناحية امكانية التفريق بين الاصلى و التقليد و المجهود الخارق المطلوب للبحث فى الزحمة و الحر و قطع الطرق و ارتفاع الاسعار المستمر و الحل للمشكلة دى كلها فى حاجتين اساسيتين
اولا نعرف نحافظ على عربياتنا كويس من البداية و نحترمها و نركز كويس و احنا سايقين و نسيطر على اعصابنا و نغير الفلاتر و التيل و الزيت و مستلزمات الصيانة فى مواعيدها تفاديا للاضرار و نركز على الارض بالليل و نبعد عن اماكن العنف و المسيرات على قد مانقدر بدون مانكسل و مانسوقش و احنا محششين او باستهتار الى اخر تعليمات ماما نجوى دى الى اى حد عارفها بالفطرة مش محتاجة تفصيل و نحط فى اعتبارنا ان التقصير هيسبب تلف بقى شبه مستحيل يرجع تماما زى ماكان بدون بهدلة العربية و نفسنا و فلوسنا
ثانيا و ده الاهم وقت الصيانة التقليدية او لو حصل الخراب خلاص فالتصليح بيحتاج للقواعد الاتية
اولا اى حد بيسوق عربية لازم يلم على قد مايقدر بمعلومات عنها و عن مكوناتها و اصلاحاتها و قطع غيارها الاصلية و اماكنها و طرق فك و تركيب اجزائها ( كل واحد حسب قدرته على المتابعة ) و عند الحاجة لاصلاح جزء ما لازم نسال الاول كل الى نعرفهم و ندور على النت و نسال كذا ميكانيكى عن تفاصيل التصليح المطلوبة و نحكم عقلنا و المنطق و نروح نشترى قطع الغيار الاصلية بنفسنا
ثانيا اثناء التصليح نفسه , بالنسبة لمرواح اى مركز صيانة ياخد العربية و يقعدنا فى الصالون و يشتغل ده ده الغباء بعينه و مالوش اى مبرر ولا لزمة و لازم نتجنبه نهائيا , احنا نروح لاى حد نقف قدامه و نحط عينينا كويس على ايده و هو بيشتغل و نتابع حتى لو ماعندناش خبرة اطلاقا فاى حد عنده عقل اكيد هياخد باله من الشغل باهمال او عصبية او اتلاف اجزاء او رفايع اثناء الفك او الاصلاح او تركيب حاجة غلط و ايضا حصر المسامير و الاجزاء الى اتفكت و التاكد من تركيبها و عند اول غلطة للصنايعى بنوقف الشغل فورا و ناخد موقف ما حسب الظروف و الشغل و لو مضطرين نكمل نراقب بشكل اكبر و حتى لو فيه تلفيات بتحصل فعلى الاقل هنكون شايفينها و عارفينها و نحط فى اعتبارنا تصليحها غير سيبان العربية عند حد و استلامها ببلاوى مستخبية بعد كده و نغلب المنطق و العقل على اى تخاريف بنسمعها من اى صنايعى مهما على صوته و مانمشيش على رايه ابدا لو مش مقتنعين فهو فى الاول و الاخر شخص عشوائى جاهل عاوز فلوس و خلاص و مخنا له اولوية عن كلامه و الكلام ده برضه بينطبق على السمكرة و الدوكو و الدهان فمجرد وقوفنا بنفسنا على الشغل هيخلينا نفهم تفاصيل كتير و نتابع و نتحكم فى جودة الشغل بدرجة كبيرة بدون اى خبرة مسبقة و كفاية انه اكيد هيخلى الصنايعى يضبط الشغل اكتر مايكون منغير مراقبة

استكمالا للحديث
اغلب قطع الغيار الاستيراد من الحرفيين فعلا ممتازة و جودتها مضمونة احسن من اى قطع غيار جديدم مش اصلية و خصوصا لو اتفكت قدام عينينا دى اكيد هتكون سليمة و مكان الصنايعى او الورشة الى هنختارها ضرورى يكون مكان هادى و واسع قادر يشتغل فيه براحته مش مزنوق ولا فى وسط الشارع لان ده بيفرق كتير فى جودة الشغل و الصنايعى نفسه لو كان عصبى او بيتمسك برايه او بيستعبط او بيتكلم كانه استاذ الاساتذة او مادى بزيادة ده مافيهوش امل و لازم نسيبه فورا و نروح لحد طيب و هادى و مابيحاولش يجبرك على اى شيء و بيحاول يرضينا و بيتقبل بصدر رحب كل تعليقاتنا و انتقاداتنا على تفاصيل الشغل و من الضرورى ان احنا كمان مانبقاش مستعجلين ابدا او عاوزين ننجز و خلاص و ورانا مواعيد او نختصر اى خطوات تصليح او نوفر فلوس طالما محتاجين قطع غيار جودتها مضمونة و الافضل اننا نصلح الحاجة على كذا مرة لو العربية بتمشى يعنى على اننا ننجز بسرعة فى يوم واحد و الافضل من ده كله اننا نحاول دايما نمشى ايدينا فى عربياتنا و نتعلم و نمارس اى دور يتقدم مع الوقت و ضرورى كمان ماناجلش اى اصلاحات ضرورية مهما كانت الظروف علشان العربية ماتعطلش بينا و نتبهدل و نبقى فرجة فى الشارع و ناخد بالنا كويس من بعض الاجزاء الى بتعطل العربية و خارج الصيانة الدورية لو حسينا انها قربت من اخرها زى شربون المارش و الدينامو و طرمبة البنزين و وساخة الكاربيراتير او الانجكشن او الرشاشات او الحساسات و كلها اجزاء قبل ما بتقف بشكل نهائى بتبدا تعافر الاول و تشتغل مرة و مرة و تبرجل العربية لازم ساعتها نسيب الى فى ايدينا و نجرى نغيرها فورا , اتمنى انى اكون قدمت معلومات مفيدة على قد ماقدر و برضه هكرر تانى نقطة الابتعاد عن اماكن المظاهرات و العنف و نلف و نمشى عكسى فورا بمجرد الاحساس ان السكة فيها حاجة مانستهونش و نعتقد اننا هنعدى بسلام علشان نيتنا حلوة و متابعة خطوط سير المسيرات و التظاهرات مسبقا و نودى العربية بعيد عن طريقهم حتى لو بعدت عن البيت و نهدى اعصابنا و احنا سايقين مهما استفذنا سواقين الميكروباصات و التكاتك نسيبهم يفوتوا و نديهم السكة لما يكسروا علينا و نعرف كويس ان ده بقى زمنهم و الشوارع بقت بتاعتهم تماما و مانركنش فى حتت غبية مخنوقة و زحمة تعرض العربية للتلف و نبعد و نبقى نتمشى شوية و مهما كان مجهود التمشية هو دايمااقل من مجهود التصليح و نحاول نفوت الموتوسيكلات من ورانا او جنبنا على قد مانقدر و نركز اوى مع المطبات و الحفر و الطوب فى الارض و نحاول نحفظ مكانهم و ربنا يوفق الكل

على فكرة بخصوص التكييف فى اى عربية لو سرب شحن الفابريكة نسبة اصلاحة بشكل كامل و حقيقى فى اى مكان فى مصر اقل من 5 فى المية و خصوصا لو مش هيتفك جزء او قطعة غيار و تتحط مكانها قطعة غيار اخرى اصلية جديدة انما اى لحام او عك من اى نوع او حتى شحن بالفريون الصينى الوسخ الى مافيش غيره ابدا فى السوق كله حتى عند افخم مراكز الصيانة مش هينفع و مش هيرجع زى الفابريكة تانى نهائى لان ببساطة شغل التكيف بيحتاج دقة و نظافة و تركيز و صبر و اهتمام بتفاصيل و كشوفات بتتناقض تماما مع طبيعة الصنايعى المصرى مهما كان و ايا كان و فى جميع ورش تصليح التكيف الى على ارض مصر و اقدر انصح اى حد تكيفه يبوظ انه يحاول يغير العربية احسن لانه هيفضل يشحن التكيف طول العمر و رايح جاى على الورش بشكل معتاد هيكون جزء من حياته و روتينه