المشاركة الأصلية كتبت بواسطة n_i_t_e
السلام عليكم
أنا خريج ITI دفعة 2008 قسم Software development
شوف بالنسبة لأمتحان الأي كيو و الأنجليزي كان أوك بس متتوقعش تحل الأمتحان كله للأخر...عادي الأمتحانات دي فى الغالب الوقت مش بيكفى بس الموضوع مكنش صعب أوي
بالنسبة للأنترفيو برضه مش صعبة يعنى مثلا سؤال Introduce your self in English على كام سؤال Hr عادي
بالنسبة للمرتبات أنا على أيامى كان المرتب 500 للى جايب جيد و 750 جيد جدا و 1000 أمتياز بس سمعت انهم زودوهم الدفعة اللى بعدها.
بالنسبة للدراسة بصراحة كانت أجمل سنة فى حياتى لأن نظام الدراسة مختلف عن الجامعات الحكومية ..الكورسات قوية بصراحة بس الميزة أن فيها عملى و غاليا مش بتحتاج ترجع تحفظ فى البيت زي نظام الكليات. انت بتاخد المحاضرة ووراها العملى على طول.
الدراسة هناك مش سهلة انت بتاخد كم كورسات مضغوط و لازم تكون متابع كويس و ملتزم لأن فعلا الكم كبير و الوقت ضيق.
الدراسة بتنقسم 3 أجزاء 3 شهور starting module بتدرس فيها من كل رجل قبيلة على رأي المثل..عينة من كل تخصص أقصد.
بعدها تختار التخصص بتاعك..لو القسم بيحتاج عدد محدود بيبقى فى امتحان و انترفيو عشان التصفية بين المتقدمين زي قسم Unix و JAVA و بعدها تبدأ Focus module فى القسم بتاعك
على نهاية الموديول ده المعهد بيكون متفق مع شركات تيجى تختار من الطلاب من خلال انترفيوهات و امتحانات للتعيين و ساعات بيقدموا Seminars لتعريف الطلبة بشركتهم.
أخر 3 شهور بتدرس انجليزي فى معهد متخصص و بيكون تدريبك فى شركة أي تى بتعمل Project هناك أو تعمله مع صحابك تحت أشراف المعهد.