الموضوع: سبب العوامان حتى لو العفشة 100%

بسم الله الرحمن الرحيم

احب احى اعضاء المنتدى الجميل المحترم .وكل سنة واعضاء المنتدى بصحة وخير .

خطأ ناس بتقع فية كتير اوى ومحدش بياخد بالة منة جدا وللاسف وقعت انا فية بس كنت على غير علم بالموضوع دة نهائى او مجاش فى دماغى خالص .والقصة ومافيها ان انا كنت عامل حادثة بعربيتى النترا 2008 عاملة 25000كيلو وغيرت العفشة كاملة ماستر وبعد تظبيط الزوايا والترصيص جبت جنوط استيراد (مومو 5 خرم16 ) بالمرة من ضمن المصاريف وكانت نضيفة اوى وبعد كدة لقيت عوامان فظيع فى العربية من 90 وانت طالع ودردة ورعشة فى العربية فظيعة .المهم خاليت العفشجى يحل ويربط العفشة تانى 3 مرات لغاية محلفلى ميت يمين ان العيب مش من العفشة قلت يبقى تظبيط الزاويا مش مظبوط والترصيص بردة مش مظبوط رحت مظبط زوايا تانى ومرصص تانى وبردة العوامان مختفاش المهم .طبعا اتجنيت بقيت اشد فى شعرى ودماغى راحت ان العربية كدة بالظبط خالص ومش هتنفع وفكرت فى البيع .ولكن فى يوم من الايام الصعبة كنت رايح مركز صيانة فى اسكندرية وقلت لما اظبط الكاوتش قبل مسافر المهم وانا واقف عند بريدجستون طنطا فردة كان فيها مسمار ففكها الولد اللى هناك وعملها وهو لسة بيركبها لقيت المتخصص اللى هناك طالع جرى وبيقلى العربية دية بتعوم منك استغربت وقلتلة عرفت منين قالى الجنوط اللى انت مركبها مش الجنوط اللى مفروض تركب طبعا فرحت وزعلت فى نفس الوقت وقلت تانى هدفع فلوس تانى .المهم قالى الابعاد بين المسامير وبعضها مش نفس ابعاد وللعلم ابعاد المسامير عندى 114 خمسة خرم .وقالى الجنوط عندك بتركب حشر .ومن المفروض ان اى جنط بيبقى راكب مستريح اوى او زى ماقلى يبقى فية سنة بوش . وعلية غيرت الجنوط اللى جايبها باد كدة وجبت الجنوط الاصلية جديدة من التوكيل وطبعا عملة الواجب وزيادة معايا علشان كدة حبيت ااقول للاعضاء علشان ميقعوش فى اللى انا وقعت فية وسمعت كلام ناس مش بتفهم وغرمت فلوس كتير وغيرت حاجات سليمة . وبذلت جهد اكتر سواء نفسى او عقلى او بدنى ولذللك.

ونصحيتى للاعضاء لتوفير مالهم وايضا جهدهم:

1-متسمعش كلام اى حد يفتيللك لازم يكون متخصص وفاهم اوى

2-لو لقيت العفشجى اللى انت بتتعامل معاة شغلة مش تمام اخلع علطول متستناش علية

3-لازم قبل متحسبة تجرب العربية مرة واتنين ومتزهقش

4-متحسبش العفشجى علطول خلى الحساب بعد التجربة والافضل لو الشغل كتير ميخادش فلوسة مرة واحدة

5-لازم تعد له وتشوفة بيحل اية وبيعمل اية بالظبط علشان ممكن يغيرللك حاجة اوحاجات

6-اوعى تخلى الصبى اللى عند العفشجى يحللك ويربطللك لانة اكيد هو دة اللى هيدمرللك العفشجة خلى العفشجى نفسة هو اللى يقوم بالعملية دية وبعد مايخلص خلية يعيد تربيط العفشة تانى مراجعة عليها (تحريق)

7- اوعى تسمع لكلام العفشجى اللى يقوللك غير غير غير لان مش كل حاجة بتتغير فى العفشة فى حاجات تستعدل احسن من انك تجيبها جديدة حتى لو ماستر

8-اوعى تسيبلة اى حاجة حتى ولو حتة كاوتش كل دة هترجع تتدور علية تانى حتى ولو كان بايظ مش سليم

9-لما تجرب العربية لازم تاخد العفشجى معاك ولازم تجربها على سرعة عالية وبطيئة فى المطبات وفى الطرق الممهدة

10-اوعى تسمع لكلام العفشجى اللى يقوللك هطول التيش دة واقصر التيش دة ولا يشيللك حاجة ويحطللك حاجة بتاعت عربية تانية مفيش الكلام دة فى العفشة اوعى اوعى تخلية يعدل عن الماستر بتعها خليها على وضع المصنع واكيد دماغ العفشجى مش احسن من دماغ اللى مصنعنها

11-اوعى تعلى العربية من ورا حتى ولو 1 مل لانة بيعوم العربية جدا واوعى تحط حاجة فى العفشة مش ماستر بالذات لان بيبقى للمقصات والميزان والقنطرة ابعاد للتركيب وكرفات معينة لازم تبقى بالملى والحاجة الللى مش ماستر مبتبقاش مظبوطة فتخليك تغير حاجة سليمة وهكذا وتتدخل فى دوامة ليس لها نهاية .

12-اوعى تشترى اى جنوط مستعملة حتى ولو كانت حالتها كويسة او استيراد كلها بتبقى بايظة واللى خلعها من عربيتة اكيد خلعها علشان فيها حاجة خاصة الاستيراد وبردة اوعى تشترى كاوتش استعمال لانة بيبوظ من الركنة والتراب والحفظ الخاطىء حتى لو لم يستعمل قبل كدة خالص بردة بيبقى بايظ

13-عند شرائك جنوط سبور جديدة اعرف ابعاد مسامير الجنوط وقارنها على الجنوط اللى جاية بيها العربية وبردة بتتعرف عن طريق انك هتفك الصواميل وهز الجنط بايدك لو اتهز معاك يبقى تمام لو ركب حشر او غير كدة يبقى مش دة .

14-لو فية حاجة ظهرت عندك فى العربية متستعجلش فى تصليحها وحاول قبل متصلح تروح لكذا عفشجى او مراكز صيانة تخليهم يشخصوا العطل فين بالظبط وهيتعمل ازاى وانت قارن وقرر


يارب اكون فيدكم بحاجة وربنا يبعد عنكم الحوادث وشر الطريق وبهدلة الورش ومراكز الصيانة والتوكيل .

وقريبا هجيب مشوارى فى تصليح العفشة كلها وبالصور انشاء الله مع الشرح.

اي واحد بيركب جنط كبير لازم بيعمل رينجات للجنط يا اما الومينيوم يا اما تيفلون عند الخراط
و الرينجات دي بتقبي علي قد مقاس الفرق في المقاس بين الجنط الاصلي و الجنط اللي هتركبه علشان ميبقاش فيه بوش