ارجو منكم المساعده انا محتار جدا بين الياريس ولانسر 1300 مانيوال ياريت حد جوبني ويقولي المميزات والعيوب وشكرا لاخواني:)
.............................
تم النقل إلى القسم المختص
الإدارة - 3
عرض للطباعة
ارجو منكم المساعده انا محتار جدا بين الياريس ولانسر 1300 مانيوال ياريت حد جوبني ويقولي المميزات والعيوب وشكرا لاخواني:)
.............................
تم النقل إلى القسم المختص
الإدارة - 3
مميزات الياريس عن اللانسر
انها موديل جديد واوفر في البنزين وممكن تلاقيها معمره عن الانسر في حاجات كتير
اولا انا متشكر جدا علي ردك ثانيا لو كلامك صح ليه الاقبال علي شراء لانسر اكتر بكتير جدا وكذلك سعر اعاده اللبيع بصراحه انا في حيره شديده
توكل علي الله...وهات الياريس....
العربية ما شاء الله ممتازة...انا ركبت اللانسر 1600 وكانت زيرو...بجد ركوبة الياريس اريح منها...
بالنسبة لاعادة البيع...الياريس ممتازة لانها تويوتا....ومافيش حد عايز يبيعها ...علشان ما شاء الله كويسة ومريحة....
انا كان معيا لانسر 1300 مانيوال وبعتها لظروف وبعدين جبت ياريس 1300 اتومياتيك . بصراحه الياريس احلى من اللانسر بمراحل, كواليتي اعلى في كل حاجه
سحب (تسارع)
عفشه (مطبات)
التابلوه في اللانسر كان بيعمل اصوا (التويوتا مستحيل)
التكييف في اللانسر كان وحش
استهلاك البنزين تقريبا واحد في الاتنين
بس في الياريس عيبين
اولا الصاج اضعف
ثانيا عرض العربي (وليس الطول ) اصغر شويه
لكن انا مبسوط من الياريس اكتر من اللانسر
ومش عايز ابيعها
الياريس شكلها مبعجر
و صاجها ضعيف إلى حد ما
و لكن اداء المحرك ممتاز
------------------------------
اللانسر
أحلى في الشكل ........... منتشرة ...........قطع غيارها أرخص
و اداء المحرك ممتاز أيضا
و لو أنا مكانك
سأشتري اللانسر
بسبب الشكل المبعجر للياريس ( رأي شخصي ) :D
محدش يزعل يا جماعة
ياجماعه انا متشكر جدا علي ردودكم انا بصراحه بحب الياريس جدا بس في حاجه عاوز اخد رايكم فيها وبصراحه. انا معايا لانسر 1300 خليجي كامله وعامله 6000كم وبصراحه مرتحتش فيها لعده اسباب منها العزل الضعيف جوه الكابينه انا بكون سامع صوت المتور والعفشه وده اكتر عبيين تعبني .انا بفكر جديا ابيع لانسر اللي معايا واجيب ياريس ارجو النصيحه ومتشكر اوي
ياريت ياجماعه حد يرد عليا وينصحني انا في حيره شديده
اخي العزيز
اللانسر جميلة جدا كسيارة عملية في كل شيء
الاخ اللي بيقول ان تكييف اللانسر وحش مش عارف جاب الكلام ده منين ده انا عند التكييف في ثواني بتكون تلاجة
الوسائل الدفاعية للياريس اقل كثيرا عنها في اللانسر لاحظ كبوت الياريس قصير قد ايه و مافيش دعامات للاكصدام
موتور الياريس صوته اوطي من اللانسر انما حتلاقي اللانسر اكثر ثبات علي الطريق في السرعات العالية و المنخفضة
اللانسر عائلية اكثر و تحس انها محترمة و هي علي الطريق
دي مقارنة بسيطة و مش عايز حد يزعل
انا ركبت الاتنين لكن طبعا سوقت اللانسر اكتر بكتير
محمد فهمي
اللانسر طبعاً ...دة تأثير الجديد عليك مش اكتر .
متشكر يامحمد علي ردك .انت بردو سيارتك خليجي؟
ياريس طبعا أنا كان معايا الإتنين الياريس أحسن من لانسر 1300 فى الأتى :
1- إستهلاك بنزين أفضل .
2- كماليات أكتر (ABS+EBD+Airbags).
3- عوامل الأمان أفضل من تجربة EURONACP
4- العفشة أفضل .
5-التسارع أفضل .
6- التكييف مابيأثرش نهائى على التسارع عكس اللانسر .
7- الياريس أنعم من اللانسر
و أخيرا العزل بتاعها أحسن بكتيير من اللاسر إللى بتحس جواها بأى صوت برة عكس الياريس بمجرد غلق الزجاج بنعزل عن العالم الخارجى
بس يا استاذ تيمو
المقارنه دي قعدنا فيها كتير اوي بين العربيتين دول.
مش عاوز اقولك اني كنت بقارن بين 8 عربيات و انا بشتري و في الاخرجبت ياريس .
و دا لاسباب عديده يطول شرحها
بس في حلالتك حرام تبيع عربيه عامله 6000 كيلو لمجرد العزل بتاعها مش كويس .
في حاجات ممكن تستحملها زي العزل و فيه حاجات ما ينفعش انك تستحملها زي الاعتماديه و التقفيل
يا Sharky دايماً ردودك بناءة و بتساعد على تشغيل الدماغ ...
الكلام اللى انت قولتة هايل بس بفروق بسيطة و دة طبيعى لعربية فى اول عمرها و خصوصاً التيوتات الجديدة كلها ...اعتقد فى فروق تانية لصالح اللانسر على المدى الطويل
1-انتشار و محبوبة للناس اكتر
2-شكل و تصميم افضل بكتير
3-قوة تحمل اعلى (قطع غيار - صاج- موتور- اكسسوارات حتى -...) ودة واضح فى الياريس اللى ماشية فى البلد حتى
4-سعر اعادة بيع حلو
5- سعر قطع الغيار غالى بس معمر عن الياريس
6- الثبات (ودة لوحدة كفاية )
انا شايف ان اللانس (عربية حديدة رياضية ) ...الياريس (عربية عائلية مرفهة بسعر معقول )
ودة يتوقف على اختيارك و واحتياجاتك و تستحمل سلبيات العربية علشان حاجات تانية كتير بتحبها .
تعالى نتكلم براحة يا باشا
1- إنتشار و محبوبة أكتر
دا نتيجة لنزولها قبل الياريس بـسنتين لكن تعالى نشوف دلوقتى حتلاقى الياريس عاملة مبيعات كبيرة جدا زى اللانسر ما بدأت يعنى لو فضلت على كده حتننشر و تبقى زى اللانسر
2- شكل و تصميم أفضل يكتير
دا بتبقى أراء و بتختلف من واد للتانى يعنى انا مثلا شايف إن شكل الياريس أحلى من اللانسر و شايف إنه عصرى جدا عكس اللانسر كلاسيكى و دا رأى الشخصى .
3-قوة تحمل اعلى (قطع غيار - صاج- موتور- اكسسوارات حتى -...) ودة واضح فى الياريس اللى ماشية فى البلد حتى
الحاجة الوحيدة إللى اللانسر تتفوق فيها عن الياريس إن صاجها أجمد قليلا من الياريس لكن برضه ضعيف .
4-سعر اعادة بيع حلو
دا نتيجة لإنتشارها لكن إعادة بيع الياريس دلوقتى ممتازة بعد إنتشارها دا غير إن المعروض منها مش كتير بالنسبة لمبيعاتها يعنى قليل من إللى إشتراها عايز يبيعها .
5-سعر قطع الغيار غالى بس معمر عن الياريس
دى معلومة أوا مرة أسمعها أنا إللى أعرف إن قطع غيار التويتا عموما معمرة عن الميتسوبيشى
6- الثبات (ودة لوحدة كفاية )
دا فعلا اللانسر ثباتها أحسن من الياريس نتيجة لإنخفضها عن الياريس لكن العربيات دى الفروض إنها City car يعنى مش للجرى و إنك تقفل بيعا العداد يعنى هى ممتازة للغرض المصنعى لأجله يعنى إرتفعها مفيد جدا للمطبات فى مصر و الواحد 90% من سواقته جوا البلد يعنى مش محتاج ثبات قد ما هو محتاج إرتفاع كويس علشان المطبات
على العموم يا Sharky احنا عرضنا وجهتين النظر ...
يمكن انا مش بطيقها عشان (العدادات اللى فى النص - انها تطوير للأيكو و تاريخها - الخامات الغريبة -الاكصدامات الغالية اوى و تلاقيها مفارقة دايماً -....) :D
و ماظنش ان مستقبلها هايطول ..كل الموضوع انها نزلت فى فئة و بسعر و تحت اسم (يعنى مجموعة ظروف ) خدمتها جداً
و على فكرة الحوار معاك ممتع يا باشا
و شكرا ليك .
توكل على الله وهات الانسر طبعا
لانسر ...الياريس مع جوز اختى الكراسى مش مريحه الكنبه ضيقه كنت قاعد دماغى خابطه فى السقف.كراسى الفيرنا بتاعتى و الكنبه اريح, الثبات مش حلو خالص و الصاج ضعييف اوى..
لانسر احسن بكثيير
اللى عمل اسم و سمعة للياريس هى الكورولا مش اكتر انما اللانسر عربية تاريخها معروف
بس فى الاخر شوف انت بتدور على ايه و زى ما كل الجماعة قالوا لو بتدور على بنية قوية و ثبات و سعر اعادة بيع و قطع غيار رخيصة يبقى اللانسر غير كده هات الياريس
الياريس هى سيارة اقتصادية من التويوتا , واقتصادية يعنى وفر فى الخامات
لتقليل السعر او معدل دوران قطع الغيار اسرع يعنى اللى مش هتدفعة دلوقتى فى قيمتها لازم تدفعه فى وقت قريب.
ممكن يا استاذ ماجد توضح ليا الخامات اللي مش كويسه في الياريس؟؟اقتباس:
الياريس هى سيارة اقتصادية من التويوتا , واقتصادية يعنى وفر فى الخامات
لتقليل السعر او معدل دوران قطع الغيار اسرع يعنى اللى مش هتدفعة دلوقتى فى قيمتها لازم تدفعه فى وقت قريب.
لعلم حضرتك شركه بحجم تويوتا عمرها ما حتضحي بسمعتها و تنزل عربيه خامتها رديئه علشان تكسب.
ياجماعه انا عاجز عن الشكر وكفايه اني اتعرفت بيكم وشكرا علي كميه المعلومات دي وعرفت منكم ازاي اقرر حسب احتياجاتي انا بسافر كتير جدا وده لطبيعه شغلي وكدا عتقد ان انسب حاجه فعلا للسفر هي اللنسر عشان ثباتها. شكرا ياخواني وكان حوار ممتع جدا معاكم واتمني تدوم بنا المعرفه اخوكم تامر عابد
ربنا يباركلك في عربيتك تامر باشا
لو عايز تظبط اي حاجة في العربية في اسكندرية انا تحت امرك ( انذار - فوجات - جرايد - فرش - اسبويلر )
محمد فهمي
يامحمد باشا ربنا يخليك انا شاء الله انا مسافر اسكندريه بعد اسبوعين واتمني لو اشوفك واتعرف بيك ياريت اعرف رقم تليفونك شكرا ياقائد
رأى ياريييييييس
حضرتك الياريس مش ضايعه اوي للدرجه يعني اللي تخلي حضرتك تقلق من ثباتهااقتباس:
انا بسافر كتير جدا وده لطبيعه شغلي وكدا عتقد ان انسب حاجه فعلا للسفر هي اللنسر عشان ثباتها.
انا جايب بيها 160 و عادي جدا