جمارك المواتير

**bluegene** · 07-03-2008 05:07 PM

يا ريت لو حد عنده فكره عن جمارك المواتير الأستيراد أو الترخيص الجمركي ليها يكاف كام ... هل كلو زي بعضه ولا على حسب الماركة
ولا على حسب الحالة

**Xpert** · 07-03-2008 05:10 PM

اسرار مهنه ....انت عاوز موتور ايه بس قوللي ...

**bluegene** · 07-03-2008 05:23 PM

أنا كنت عايز أعرف بتكلف فى حدود كام على أساس لما أغير العربية و أجيب موتور استيراد هتبقى مكلفة و لا لأ . مش قصدى موتور محدد بي( باين إنى دخلت فى شغل حد) نفرض الموتور bmw m5 موديل 2002 . و ياريت كمان أسال على موتور opel vectra رقم الموتور c20Let هوturbo intercooler

**bluegene** · 07-03-2008 05:34 PM

أنا قصدى كل خير ....بجد يا أستاذ xpert أناكنت بهزر عادي مش قصدي أى حاجه بالكومنت ده بس الأيقونات مظهرتش عشان توضح الكلام

**Xpert** · 07-03-2008 05:55 PM

ههههه انت فيه ايه يا عم ... انت قتلت ابو حد هههه
لاء يا سيدي بص .. اصل المعلومات اللي عندي قديمه شويتين .. المهم .. اللي اعرفه ( اصل انا كنت مستورد قديم ... من ايام بورسعيد ما كانت بورسعيد) ... زمان كانوا بيحسبوا الاتي :
جمرك الموتور بيتحدد علي اساس الماركه و السعه اللتريه .. و كان المتوسط لل 6 سلندر جمارك 1000 جنيه (ده المتوسط) .. و مواتير ال 8 سلندر (زي الام فايف 2002 كده ) يزيد كتير شويه .. اما بالنسبه للجاز فده لو دخلته علي رخصه العربيه بتدفع عليه 3000 جنيه ..
المعلومات قديمه شويه لكن اعتقد ان لسه نفس النظام :d

**bluegene** · 07-03-2008 06:36 PM

طب هل ال موتورين دول موجودين هنا عند بتوع الأستيراد و لا هاتعب نفسي و أجري ورا حساسات و مشاكل زي المكتوبة فى مواضيع تانيه فى المنتدي... يا ريت لو تعرف بكام ؟:)

**Xpert** · 07-03-2008 06:50 PM

انا افيدك في اللي اقدر عليه ... البي ام علشان دي لعبتي ...
بص ... فيه سبب ان الناس مابتسقطش غير 35 ابيض و 25 اسود و الام فايف القديم ... ... بجد فيه سبب ... السبب ده يمكن انا باعاني من نسخه مصغره جداُ جداُ منه في ال 35 الابيض ... بس انا مش ميكانيكي ..... المهم ....
الام 5 اللي انت بتتكلم عليه ده ... مكنه صعب جداُ حد يسقطهالك هنا ان لم يكن مستحيلاً ... هوه مش مستحيل قوي يعني ... ليه ؟ هاقولك ليه ...
المكنه الام 5 دي فيها حساسات الدنيا و الاخره .. و الدفيره بتاعه المكنه بدفيره الاوبل الفيكترا بتاعتك من اولها لاخرها ... ده غير ان الكنترول بتاع المكنه مش حته واحده ... ده 3 حتت و معاهم المفتاح ابو فحمه و لييله كبيره ....فعلشان حد يسقطهالك ان لم يكن خبيراً في البلاوي دي مش هاتدور ..... حل تاني ؟ دور بقي علي ستاند الون انجن مانجمنت و حد يقفلهولك و حد يركبهولك و حد يظبطهولك ....... لييله تاني ....
الموتور الام فايف اللي انت عاوزه موديل 2002 ده ... موتور 8 سلندر 5000 سيسي ... هايركب في البي ام الصغير ( ده علي افتراض انك هاتركبه في اي ثرتي ) ... هايركب بس هاتنقل كل حاجه من مكانها و هاتحتاج قاعديتين الومونيوم تنمهم 600 يورو .. هاتتعامل في السيرفو و الماستر و الاي بي اس و الدريكسيون و العفشه و الفرامل و ليله تاني (كله بيتعمل و انا نفسي عارف ايه اللي بيركب و ايه لاء ..) .... (الناس بره بتسقط في 8 بتاع ال 540 موديل 90 بيعملوا كل ده .. بس مافيش المشاكل بتاعه الانجكشن و الكهرباء ) ... و لو عاوو تسقطه في ثرتي سكس ...هاتحتاج كارتيره تمنها الشيء الفلاني .....
و ده السبب الرئيسي ان المستوردين مابيجيبوش غير المواتير اللي الصنايعيه عارفاها ... و في نفس الوقت سعره في متناول اليد ... يعني انت مش هاتروح تدفعلي مثلاً 40 الف ولا 50 الف في مكنه ام فايف 8 سلندر و ماتلاقيش اللي يركبها ....
بالنسبه للبي ام لو عاوز تسقط مكنه في اي ثرتي انصحك بال 535 الابيض و انصحك اكتر كمان بال 525 الاسود ....
بالنسبه للاوبل هايفيدك فيه استاذ محمد ممدوح علشان هوه بيعمل ابحاثه عن المكنه دي ...

**bluegene** · 07-03-2008 08:11 PM

شكرا على المعلومات دى بجد (إظاهر إن موضوع الbmw كبير أوي و الوتور أنا عارف إنه فيه حاجات كتير بس إظهار حتى لو جبته مش هلاقى حد يركبه) أما فى حكاية الأوبل أنا كنت بفكر بجد أسقط موتور c20let بس مش عارف هو موجود و حجاته موجوده ولا لأ ؟ (أنا قرأت على الموتور ده كتيرفى منتديات أجنبيه و هو فعلا موتور كويس)

**Xpert** · 07-03-2008 08:15 PM

المهم في توصيلاته الكهربائيه تكون ملمومه ... لاءن اي ضفيره انجكشن بترجع تلم علي فيشتين او 3 بالكتير .. المهم مايكونش ليه بقي بدال الكنترول 3 و 4 .. و بدال السلك 100 و 200 ... و كده يعني ... فيه حركه في مواتير الفلوكس برضه تقرف .. ان لازم الموتور يركب بعداداته ... و نفس الحركه بتاعه البي ام اللي ليه 3 كونترول و مفتاح بفحمه .. و دي اسمها can-bus ... اقراء عنها الاول ...