الموضوع: احذروا النصب بالمحمول

المشاركة الأصلية كتبت بواسطة emo_ayman

الرقم\ 25771755 وده اللى خدته من خدمة عملاء فودافون لما واحد حاول ينصب عليا

الرقم سليم و رقمهم فعلا و لكن للأسف ما بيتحركوش بجد الا لما تروح بنفسك و تقدم بلاغ فى مكتب من مكاتبهم ... يمكن بيعتبروا كده جدية البلاغ ... و الله اعلم

و تحياتى

المشاركة الأصلية كتبت بواسطة ace

دي شركة ابحاث تسويق
ولا نصب ولا حاجه بلاش نكبر المواضيع
وطبيعي جدا ان خدمة عملاء الشركة ماتعرفش اي شيئ عنه لان ده قسم منفصل تماما عن خدمة العملاء والمشاكل اللي بتقابل الناس
انا اشتغلت 5 سنوات في شركة ابحاث تسويق واكتر حاجه كانت بتتعبنا ان الشعب المصري مش فاهم فكان يفتكرنا نصابين او تبع مصلحة الضرائب
فودافون مثلا مستحيل تدي داتا لشركة الابحاث لان ده ممنوع تماما وممكن تدخل نفسها في سين وجيم
فبتديله شريحة معينة من الاستهلاك ( يعني مثلا الناس اللي بتعدي 200 جنيه في الشهر )
وتعمل استمارة وتطلب من شركة ابحاث التسويق انها تملي الاستمارة وتحدد عدد وليكن 20 الف عميل
وفودافون بتتاكد ان الاستمارات مش متكروتة من الاسماء او بتتشيك عليها

عملنا بحث عن طعم عصير قبل ما ينزل السوق علشان ناخد رأي الناس في كل الاعمار قالو بنحط فيه مواد مسرطنة وعايزين نموت الناس علشان كنا بنديهم مقابل مادي

عملنا بحث عن السجاير (روزمانس) قالو بنحط مخدرات فيها وهندمر الشباب

عملنا بحث عن الاجهزة الكهربائية افتكرونا تبع وزارة الكهرباء وهننقي شريحة معينة نغلي عليها الكهرباء

والشعب المصري دماغه عالية جدا
فتلاقي واحد خايف من الضرايب يفتكرنا تبع الضرايب
واحد كان رايح يخطب يفتكرك تبع اهل العروسة هههههههههههههههه

وممكن تلاقي واحد يقولك انتو جواسيس ههههههههههههههههه

حضرتك لازم أكبر الموضوع لأنده واحد كان بينصب مش بيعمل بحث تسويق ، و كان واضح من اسئلته ، و بعدين الشعب المصرى مش زى ما حضرتك بتقول ، و لكن النصابين كتير ..

الحاجة الصح ما بيحصلش قلق منها ، و لكن النصب بيبان ..

السوبرماركت زى هايبر وان و كارفور و سبينيز مليان ناس بتعرض عليك تدوق سلعة لسه مانزلتش و تقول رأيك ، و الناس بتجرب و تقول ، و ماحدش بيقول مواد مسرطنة او كلام من ده ، لأن انت داخل لهم دوغرى و مباشرة و بوضوح ..

نفس الشئ لما ناس عملوا بحث عن الأكل اللى الناس بتاكله علشان الكوليستيرول و الدهون ، و كانوا بيوقفونا و بيسألوا أسئلتهم ، الناس كانت بتجاوب و تديهم البيانات المطلوبة ، لأنه بيوريلك اثبات الشخصية و البحث اللى معاه و مش بيطلب بيانات شخصية حساسة أو خطيرة .. الناس ما قالوش دول عايزيت بسممونا او يغلوا الأكل ، بالعكس كانوا بيجاوبوا ببساطة..

اتفرج فى الفضائيات ناس ياما بيعملوا لقاءات و مقابلات و بياخدوا رأى الناس فى مواقف ... ماحدش بيزعل او يخاف ...

كل ده لأنه بطريق مباشر و واضح و صريح ..

و بعدين لو كلام حضرتك صحيح فى اللى اتصل بى ، مش كان يكفيه اثبات لشركة المحمول انه مش بيفبرك انه يقول لهم اسمى مع تليفونى ؟؟ كده يبقى فعلا اتصل بى ، و لكن لما الاقى واحد مصر ياخد اسمى بالكامل ، و رقمى القومى ، و عنوانى ، و تليفون المنزل ، أكيد دى حاجة تقلق ... هو ماله بالبيانات دى كلها ؟؟؟ و ماله عندى عربية ولا لأ و نوعها ايه ، و كل ما ارفض اجاوبه يسأل اسئلة تانية جديدة و شخصية ... اكيد دى حاجة مريبة بعد اذن حضرتك .. هى شركة المحمول هاتاخد منه اثبات انه اتصل بى انه يقول لهم نوع عربيتى ايه ؟؟ و هل شركة المحمول عارفة نوع عربيتى أصلا ؟؟

و زى ما انا قلت قبل كده ، لما حد بجد بيتصل علشان حاجة ، المفروض انه يقدم اثبات انه جايب تليفونى من الشركة بتفويض منهم ، مش بيضرب اى نمرة و خلاص

طب ايه رأى حضرتك ان أصلا بنتى الصغيرة هى اللى ردت على التليفون و لقيتها بتديه لى و بتقول لى "واحد بيسأل بيت مين ده و احنا ساكنين فين ؟" ، مش لو كان جاد كان قال لها هاتى بابا او حد كبير اكلمه ؟؟ ولا الأبحاث عن مدى جودة الشبكة و تغطيتها بتتعمل مع الأطفال دلوقت يا أخى العزيز

و بعدين اذا كان على سرية البانات و تسريبها ، فمش عايز اقول لحضرتك ان شركات دعاية كتير بتاخدها باتفاقيات غير معلنة بينهم و بين شركات المحمول ، يا ما بيجيلى عروض من فنادق و شركات سياحة على محمولى ، و اول ما بيتصلوا بيقولوا اسمى بالكامل علشان يثبتوا انهم جايبينه من شركة المحمول ، و بما انى مش هاقدر اثبت انهم سربوا بياتناتى فشركات المحمول بتعمل الحركة دى دايما من غير قلق ، يبقى ليه فى الأبحاث عن التسويق هايخافوا من اعطاء البيانات ؟؟؟

و بالنسبة لكلام حضرتك عن ابحاث التسويق ، فطبعا لا يمكن اشكك فيه ، و لكن انا رأيي الشخصى ان الناس مش سيئة الظن او خوافين او شكاكين بالشكل ده ، و لكن الطريقة اللى اتعملت اكيد كان فيها حاجة تسبب القلق ..

و تحياتى

المشاركة الأصلية كتبت بواسطة mohamed hamed

شكرا ع التنبيه يادكتور

ممكن بقى ياساره يعمل بيها اى حاجه الله اعلم ايه بقى الى ف نيته

المشاركة الأصلية كتبت بواسطة dr.sherifmansy

أولا ممكن تلاقى سيل من المكالمات اللى بتعمل دعاية عن اى منتجات ، او الأشتراك فى كروت تخفيضات لفنادق او منتجعات ... الخ ... و مش محتاجين نقول انها كلها تقريبا وهمية

و ده اضعف و أخف الأحتمالات...

ثانيا ممكن حاجات أخطر ، ..

ان مثلا تلاقى حد جاى على العنوان و معاه فاتورة مكتوب عليها اى لوجو و مثلا يطلب مبلغ الفاتورة على انه ممثل لشركة المحمول و ان دى مبالغ متأخرة أو تسويات أو أو أو ... و طبعا هايذكر لم بياناتك بالتفصيل لأثبات انه فعلا من الشركة (البيانات اللى اخدوها منك قبل كده) ...

ممكن ينصبوا على حد و يستعملوا البيانات بتاعتك دى فى النصباية و بكده يحاولوا يلصقوا التهمة بحد تانى (طبعا عرفنا مين ...)

دى مجرد أمثلة و السيناريوهات فى الواقع كتيرة جدا ، المعلومات الشخصية خطر أى حد ياخدها علشان كده

انا طبعاً بأخد حذري من التليفونات اللي زي دي
بس انا بيجيلي عروض الكروت وتخفيضات المنتجعات السياحيه والقروض وحتى الكورسات واحيانا سيديهات تعليميه
وجالي مره عرض غريب لشراء موسوعات ثقافيه
واللي بيتصل بيكون عارف اسمي الأول ويبتدي يسأل عن بيانات من نوع طبيعة عملي ومكانه
واحيانا مستوى الدخل وده لما بيكون عروض خاصه بقروض الشراء
اللي انا مش فاهماه هما بيجيبوا بياناتي منين؟
ولما بسأل بيكون الرد ان تم ترشيحي من صديق وطبعا مش بيقول هو مين اللي مرشحني لإستقبال العرض ده

المشاركة الأصلية كتبت بواسطة sara2001

انا طبعاً بأخد حذري من التليفونات اللي زي دي
بس انا بيجيلي عروض الكروت وتخفيضات المنتجعات السياحيه والقروض وحتى الكورسات واحيانا سيديهات تعليميه
وجالي مره عرض غريب لشراء موسوعات ثقافيه
واللي بيتصل بيكون عارف اسمي الأول ويبتدي يسأل عن بيانات من نوع طبيعة عملي ومكانه
واحيانا مستوى الدخل وده لما بيكون عروض خاصه بقروض الشراء
اللي انا مش فاهماه هما بيجيبوا بياناتي منين؟
ولما بسأل بيكون الرد ان تم ترشيحي من صديق وطبعا مش بيقول هو مين اللي مرشحني لإستقبال العرض ده

لو صديق فعلا بيقولوا اسمه لتأكيد الجدية ، و لكن اللى بيرفض بيكونوا واخدينها من شركات المحمول ، او من اماكن تانية بتكونى سبتى اسمك و تليفونك فيها ، زى مثلا مسابقات الفضائيات ، بيرجعوا بعد كده يبيعوا الأسامى و التليفونات لشركات الدعاية و التسويق (احيانا مش دايما)

ايضا شركات التوظيف و التسفير بيتبادلوا بيانات العملاء بينهم

و تحياتى