الموضوع: اي حد معاه ريجاتا و حبيب يعدلها و يظبطها صح يدخل حالا هيلاقي حلول مفيده ان شاء الله

بسم الله الرحمن الرحيم

اولا تحيه كبيره جدا لمشرفين و اعضاء المنتدي
انا امتلك فيات ريجاتا و العربيه ديه معانا زيرو فبجد عزيزه عليا جدا و عشره عمر
انا مش هرغي كتير بس انا بأذن الله هقدم لكم موضوع عن بعض الاضافات و تعديلات في هذه السياره و اتمني اني اكون هقدر هفدكم بحاجه
وتعديلات ديه عن تجربه طويله جدا و تجربه شخصيه في عربيتي و متجربه من سنين



اولا: نظام تبريد
العربيه ديه كتير قوي بيعاني من مشكله سخونيه....الحل:
1- تلغي الكهربا المروحه الاصلي و تخليها ديركت علي بطاريه علي طول من الثيرموستات للمروحه و البطاريه يعني افصلها فصل تام من علبت الفيوزات
2- تنظيف الردياتير تنظيف كويس قوي
3- تروح لبتاع ردياتير خليه يجب سيخ حديد سخن و تفتح غطا ردياتر و تعمل خرم صغير من عند نحيت بيك الهوا....كده بقي الهوا مفتوح من عند نحيه تزويد الميه الاساسيه
بس يكون خرم صغير مش يوسع قوي يعني....كل ده عشان الردياتير في حاله انو لو جمع هوا يطلع بمجرد تزبود ميه بس خلي بالك لما تيجي تزود ميه لازم يكون مستوي اقل من الخرم ب10سم



4- تشيل الثرمو ستات الي فيها الي اكيد هيكون رقمها 82-90 وتحوط واحد تانيه 68.....ديه هتمص الحراره ليل نهار صيف اي وقت
و تيرومستات موجوده عند بتوع قطع غيار الفيات و تمنها 15 جنيه

الحمد لله انا عامل كده عندي يمكن من 3 سنين لحد دلوقتي نسيت ابوص في عداد سخونيه اصلا في عز صيف بتكون اقصي حاجه 88 يعني تحت 90 و ده كويس جدا علي عربيات ديه !!
و مش هتسخن تاني باذن الله الا اذا كان في مشكله من موتور لقدر الله



ثانيا: نظام التعليق
الحمد لله العربيه ديه عفشتها محترمه اوي بس عيبها الوحيد في العفشه جلب مقصاتها !!! ضعيفه جدا !!
1- تروح لاي حد بتاع قطع غيار بيجو و تجيب جلب مقصات 504 هتلقي الوحده ب6 جنيه !! هتلائي شكل جلبه حديد علي كوتش و شكله متين
2- تخلي العفشجي يحل المقصين و يفوك الجلب القديمه منها و تاخد من الجلب القديمه الحديده القلب الي في نوص ديه بس
3- تروح للخراط يوسعلك فتحت المكان اليركب في جلبت المقص بحيث تكون نفس الحجم للجلب الجديده....بس ميوسعش اقوي و يركبها شحط يعني كأنها مكان لسه ديق و يا سلام لو عنده مكبس كده يبقي تمام بس طبعا لما يكبس ميكبسش علي جلبه نفسها كده تبوظ هو مفرود عندو قلوب كده بتكون فاصل بين المكبس و الجلبه عشان تحافظ عليها
4- ركبت تمام....تخليه يركب الحديده الفكناها من الجلب القديمه في قلب الجلب الجديده و بكده مسمار بقي نفس الحجم بالظبط الصلي !! بس علي فكره الحكايه ديه مش محتاجه توسيع هو ينشف كده و يركبها شحط هو اكيد هيبقي فاهم
5- ضبط زوايه
6- ادعيلي
هتستفاد ان شاء الله ثبات عالي جدا و طاره محكمه جدا و دبدبه هتقل اوي في المكسر

و بالنسبه لو عجل ورا قالب او مفرشحه كده يبقي تخلي العفشجي يفوك المسمار 17 اليي ماسك طنبوره بالمقص و تجيب مسمار14 بس يكون نضيف ووردتين و صمولتين...لما تحط المسامير ديه هتلاقي الطنبوره بقي في براح انها ممكن تدخل جوي..دخلها و خلي يربط صمولتيت جامد قوي قوي و متقلقش مش بيفكو بسهوله وانت بصفه مستمره لما تيجي تربط عفشه متنساش يراجع علي مسامير ديه و باذن الله مش هيجيبو رباط اصلا ان شاء الله



ثالثا: الكاربتير
اوحش و اسوء كاربيتير نزل في تاريخ الفيات هو بتاع الريجاتا والحمد لله
حاولت معاه كتير قوي لحد ما ظبطو بالعافيه بس بياكل بنزين بطريقه سخيفه جدا...كان 10 ليتر يموشها 50 كيلو مش حارق !!!! خراب بيووووت !! بس سحب كان ممتاز جدا
و عملت ظبطه تاني بقت توفر 10 ليتر يمشوك 70 كيلو و سحب زفت
و لو عملت ايه عمره ما هيظبط سلانسيه و بتعلي و طوطي لوحدها و حاجه تتعب وتزهق بجد

و للاسف فشلت في تظبيط الكاربتير بس وصلت الحمد لله الي حل رائع !!
1- تنزل تجيب كاربتير شاهين 1600 الي هو بيك سلانسيه كهربا ايستيراد من الوكاله او عزبه شلبي وتشتريه علي تجربه طبعا علي الاقل اسبوع
2- تروح لواحد في دقي عند تقاطع شارع تحرير امام محطه مترو دقي اسمه محمد يوسف بتاع قطع غيار فيات بس راجل تمام قوي وحجته كلها فوق الممتازه...تجيب من عنده فلانشه اعدت كاربتير تحول من ريجاتا لشاهين وهو عارف هيكون قصدق ايه...حاجه بالبلدي كده زي محوول شاحن موبيل من تخين لرفيع كده
3- روح للمكانيكي بتاعك يركبلك كل ده و روح لكهربائى يوصلك وصلات السلانسيه معا كنتكت
4- جرب كده 3 تيام, سحب, اداء, عادم ميكونش فيه اسود, و استهلاك بنزين
5- تروح لللمكنيكي يفكلك بوجيه لقتو ابيض يبقي كده بسم الله ماشاء الله كله تمام....ممكن مكانيكي ينضفهولك تنضيفه حلوه من غير ما يلعب في حاجه جواه او يستحسن ميلمسوش من جواه لو هو مش خبير قوي
و اوعي اوعي تنضفه بعد ما تشتريه علي طول عشان انت وخده علي تجربه لو في مشكله هيقولك ده اتفتح و يقرفك و هما اساسا بتوع الايستيراد دول مقرفين خلقه

الاسعار: كاربيتير انا اختو ب390 بعد فصال شاااق و انت و شطارتك و اخت العمه هديه كمان...و جبتلها خرطوم عمه جديد و فلتر رياضي و ظبط الاداء
الفلانشه: 70 جنيه
ممكن يكون مكلف شويه بس فرق فعلا يستاهل
هتستفاد ايه بقي من كل ده ؟؟؟ هؤلك
1- توفير حاد للبنزين...10 لتر = 120 كيلو وانت حارق كمان !!!.وانضباظ تام في سلانسيه و موتور هيبفضل مظبوط لا يعلي و لا يوطي و سحب جامد قوي قوي و كمان انا مركب فيلتر رياضي و عامل صوت معا دوسه فتح الباب تاني يعني لما بجيب اخر دواسه بيطلع صوت زي انجكشن بظبط و صوت رائع و ملفت جدا !!
علي فكره العربيه بتفرك معايا اول تاني تالت ما شاء الله و سرعه قصوي بقت 190 و طبعا مكنتش مصدق عنيا

طبعا خرطوم البخار هجيب واحد جديد اطول من عند اي حد بتاع قطع غيار و بيباع بالمتر و مش غالي المتر ب 3 جنيه حاجه كده


اسمعو صووت كده بقي ازاي و احكموا بنفسكوا انتو بقي
Sound clip 09.mp4 - 4shared.com - online file sharing and storage - download




رابعا: الانوار
نور العربيه ديه ضعيف جدا جدا الامامي و مشكله و بعدين تيجي ترعش تلقيه بطيء كده و مصفر

يلا خطواط العمل
1- تجيب كتاوت نور تركي و سعروا 20 جنيه من عند اي بتاع قطع غيار فيات
2- لمبتين كوري او ياباني مش صيني خالي بالك...تكون فيلبس او كده..200/260 هي معروفه و سعرها هيبقي 70 لمبتين
3- 2 دوايه قلب سيراميك بتبقي في حدود الوحده ب 4 جنيه هات اتنين
4- كهربائي نضيف يوصلك اللليله ديه كلها ولما يوصلك خليه يهتم بماصدر الارضي ديه اهم حاجه
هتلائقي نور ماشاء الله ابيض وقوي جدا و بيرعش بسرعه و ينوورلك جامد...عن نفسي الحوار ده اغناني عن زينون لأني كنت علي وشك شرائه بس قولت اجرب مش هخسر حاجه و بردو اديني بتعلم و الحمد لله ربنا وفقني


اتمني اكون قدرت افديكم بحاجه و لو اي حد عنده استفسار او اي مشكله تانيه في عربيه ديه يقولي و بأذن الله نحاول نساعده ان شاء الله

موضوع جميل والحمد لله على العربية نعمة بجد بحمد ربنا عليها ومش اى حد فاهم قيمتها
وان شاء الله ليا عودة للموضوع لما اظبت العربية فى اقرب وقت ممكن لان الحمد لله العربية مظبوتة معايا ما عدا النور اللى فعلاً ضعيف جداً جداً وان شاء الله هجرب طريقتك
انما انا مش معاك فى حكاية الكاربتير ده لااستهلاك البنزين ما شاء الله ممتاز والسلانسية مظبوت ودخان الشكمان مظبوت
اما العفشة ورا لسه عاملها من 10 ايام وياريتك كنت سبقت بموضوعك لان جلب المقصات اللى جبتها مع انها غالية بس مش عاجبنى ادائها والسوست اللى عملتها خلت الجنب الشمال عالى عن اليمين لكن ان شاء الله هحاول اعمل طريقتك
بالنسبة لموضوع التبريد الحمد لله العربية تبريدها ممتاز بالنظام الاعتيادى بتاعها لكن انا مركب مروحة يابانى ويمكن اللى مساعد اداء التبريد ان المفتاح الموجود فى الاردراتير الخاص باخد الهوا انا مهوية شوية وبتابع مستوى المية من فترة لفترة كده
واشكرك شكراً جزيلاً لموضوع وان شاء الله زى مقولت هيكون ليا عودة قبل اى تعديل او صيانة فى العربية لانه ما خاب من استشار وانا زيك من ملاك الريجاتا firsthand بس كان الوالد والحمد لله لسه معانا