رجاء المساعدة...تكييف الصني!!!

hh · 08-03-2008 01:12 AM

يا جماعة النهاردة فتحت التكييف في عربيتي الصني الجديدة لكن كان بيطلع هوا سخن زي ما تكون المروحة بس اللي شغالة. انا قلت اكيد التكييف فيه عطل و بصراحة اتدايقت جدا لأن العربية ما بقالهاش أسبوع. المهم لمبة البنزين كانت منورة فرحت البنزينة و فولت و بعد كدة لما شغلت التكييف اشتغل. أنا قلت واضح ان لما البنزين بينقص لدرجة ان اللمبة تنور التكييف مش بيشتغل عشان يوفر استهلاك البنزين. يا ترى الموضوع ده عادي فعلا و لا فيه مشكلة في التكييف؟

**loai-omar** · 08-03-2008 03:54 AM

الحمدلله سليمة

بس معروف ان التكييف بيخليك تستهلك بنزين اعلى
فا وانتا ماعكش بنزين حبكت تشغل التكييف :)

جرب اطلع طرق فاضي كده امشي على 60 80 و شغل التكييف حتلاقيه ان شاء الله اتعدل

hh · 08-03-2008 11:35 AM

انا كنت بجربه بس. و جربته بعد كدة لما حطيت بنزين لقيته شغال. يا جماعة انا عايزة اعرف ده طبيعي و لا تكييف العربية فيه عطل؟

**hesham2004** · 08-03-2008 12:10 PM

انا ماسمعتش ان فيه عربية بتفصل التكييف لما البنزين يكون قليل ، و بعدين التكييف فى الصنى مش تاتش او بمعنى اخر ذو تحكم الكترونى عشان نقول ان وحدة التحكم الألكترونية الخاصة بالموتور اتجننت فى عقلها و اتحكمت فى التكييف كمان ، فمفيش قدامنا الا انه يكون تخريف من الكتاوت الخاصة بالكومبريسور او اى سويتش كهروميكانيكى بدائرة التكييف .
على العموم رقاب التكييف لفترة وشوف
( على فكرة ممكن يكون خطاء من عندك انت يعنى ما شغلتش التكييف اصلا و المروحة بس هيه الى اشتغلت )

hh · 08-03-2008 12:28 PM

لا انا متأكدة اني كنت مشغلاه. طيب معنى كدة ان فيه مشكلة؟

**hesham2004** · 08-03-2008 12:34 PM

لا مشكلة و لا حاجة ، اذا تكرر نفس الموضوع تانى او بصورة تانية ، عليكى و على التوكيل
و اهم حاجة عاوزين نعرف ايه العطل بالضبط و ما تم لأصلاحه

hh · 08-03-2008 12:46 PM

طالما هي مش حاجة عادية ازاي حضرتك يتقول مفيش مشكلة؟ يبقى كدة فيه عطل او حاجة بتعلق في التكييف, صح ؟

**hesham2004** · 08-03-2008 01:04 PM

عشان كده بقول لحضرتك لو الموضوع اتكرر تانى يبقى فيه حاجة بايظة او مش شغالة كويس ( زى ما بيحصل فى كتاوت النور او الكلاكس ، فى بعض الأحيان النور او الكلاكس بيعلق مرة واحدة ، لو اتكرر يبقى لازم نغيره او نصنفره على الأقل ) فمن الممكن يكون مثلا كتاوت الكومبريسور علق مرة ، لو اتكرر يبقى مثلا نغيره
و على العموم مشاكل التكييف مش من المشاكل الى تخوف زى لمبة الزيت او البطارية او التشيك انجين او الأير باج ......
مجرد المراقبة فقط لفترة حيبان اذا كان فيه عطل ولا لأ