من 6 اكتوبر الى سيتى ستارز

**mmans** · 24-08-2010 10:27 AM

عاوز اعرف اروح ازاى من 6 اكتوبر الى سيتى ستارز بالعربيه و ازاى ارجع اكتوبر تانى ؟؟؟؟؟؟؟؟؟

و عاوز اعرف اروح مواصلات من اكتوبر برضو ازاى ؟؟؟؟؟؟

و شكرا

**rasim** · 24-08-2010 11:00 AM

السلام عليكم
ممكن تجرب فى جوجل ماب انا جربت وبحثت من القطامية الى ستى استارز بس لم اجرب وان اذهب

**mohamedrabia** · 24-08-2010 11:30 AM

بس يا باشا عندك اكتر من طريق الاول تطلع من اكتوبر وتاخد الدائري من جنب دريم بارك وتكمل عليه لحد ما تطلع طلعت المنيب وتاخد دائري المنيب لحد زهراء مدينة نصر تدخل الزهراء شمال هتبقي في مدينة نصر تكمل الشارع لاخرة لحد انبي وتدخل يمين اخر الشارع سيتي ستار الطريق التاني تاخد المحور ةتطلع كوبري اكتوبر لحد اخرة وتنزل النزله الشمال هتلاقي النصب التذكاري كمل علي طول عباس العقاد ومكرم عبيد هيبقي علي ايدك الشمال دول الطريقين والاقرب طبعا طوبري اكتوبر بس بيبقي زحمة شوية والعوده بنفس الطريقة

**ahmedsamir79** · 24-08-2010 11:43 AM

المشاركة الأصلية كتبت بواسطة mohamedrabia

بس يا باشا عندك اكتر من طريق الاول تطلع من اكتوبر وتاخد الدائري من جنب دريم بارك وتكمل عليه لحد ما تطلع طلعت المنيب وتاخد دائري المنيب لحد زهراء مدينة نصر تدخل الزهراء شمال هتبقي في مدينة نصر تكمل الشارع لاخرة لحد انبي وتدخل يمين اخر الشارع سيتي ستار الطريق التاني تاخد المحور ةتطلع كوبري اكتوبر لحد اخرة وتنزل النزله الشمال هتلاقي النصب التذكاري كمل علي طول عباس العقاد ومكرم عبيد هيبقي علي ايدك الشمال دول الطريقين والاقرب طبعا طوبري اكتوبر بس بيبقي زحمة شوية والعوده بنفس الطريقة

+1

**mmans** · 24-08-2010 11:47 AM

شكرا يا باشا

**eng.m7md.ali** · 24-08-2010 05:37 PM

في طريق تاني اعتقد احسن واختصارا للزحمة
تاخد محور وتطلع دائر تفضل ماشي تنزل نزلة السويس وتفضل ماشي شوية هتلاقي نفسك في شارع الثورة جمب سيتي ستارز

**mohamedrabia** · 25-08-2010 12:40 PM

في طريق تاني اعتقد احسن واختصارا للزحمة
تاخد محور وتطلع دائر تفضل ماشي تنزل نزلة السويس وتفضل ماشي شوية هتلاقي نفسك في شارع الثورة جمب سيتي ستارز

ده مش اختصار ده بيلف حولين نفسه كده اقصر الطريق للدائري من دريم بارك منيب للمحور وكوبري 6 اكتوبر وده اقصر طريق لانه مستقيم

**m7nsh** · 26-08-2010 07:07 AM

مجرد رأى

لو هتاخد القوس الشمالى للدايرى ( بنها الزراعى - اسماعيليه الزراعى و الصحراوى ) .. ممكن تنزل نزله المطار و تكمل كأنك جاى من اسماعيليه صحراوى و تكمل من جمب الكليه الحربيه ( تقطع صلاح سالم و مساكن شيراتون ) و هتكون فى الأوتوستراد قبل كوبرى ال 4 ونص بشويه ,, هتطلعه و تكمل عادى لحد سيتى ستارز

والقوس الجنوبى اعتقد اقصر فعلا ..

لو رايح فى وقت زحمه خد الدايرى .. و ممكن وانت راجع بالليل مثلا و الدنيا فاضيه تاخد اكتوبر للبطل احمد عبد العزير و بعدها المحور ل 6 اكتوبر

**Sh_sunsea** · 26-08-2010 02:05 PM

بما اني داخل على شهر بدون عربية لأنها في التوكيل بتتصلح - أسمحلي أساعدك في نقطة المواصلات

اسهل حاجة - تاخد ميكروباص من أكتوبر للاسعاف أو رمسيس - وهناك في حاجات كتير ممكن توديك أي حتى في مدينة نصر ومصر الجديدة - تتابع بقى الاوتوبيسات الي جاية

أنا خلال الشهر ده مثلا روحت من الاسعاف للشغل بأكتر من 7 طرق مختلفة