سمير وعيسوي..... حوار من قلب توكيل كيا ..عليه العوض خلاص

**M.ABDEEN** · 24-08-2010 02:34 PM

السلام عليكم ورحمة الله وبركاته

احبابي الكرام الموضوع ده مش باكتبه علشان اشن حملة عن التوكيل وكيفية الانحدار اللي بدء فيه بعد ما اصبح احسن توكيل في مصر وعلى فكرة انا كنت من مؤيدي توكيل كيا ودايم الدفاع عنه وعن احترامهم وتعاملهم وعاشق لسيارات كيا بكافة فئتها وربنا يكرمني بحتة كده من الجداد ويا سلام لو حته كوببببببببه .....المهم مش هطول عليكوا واحد صديقنا هنا في المنتدى اسمه محمد عيسوي كنت كلمتكوا عليه من فترة وانه هيصبح عضو في المنتدى وبالفعل اصبح وشارك معانا لفترة بس لظروف عمله الطارئة وانشغاله مبيخشش كتير هو مالك لسيراتو 2008 ولاقيت بقاله فترة مدخلش المنتدى قلت اتصل بيه اسال عليه لانه راجل قمة في الاحترام وبالمرة اعيد عليه بمناسبة رمضان المهم بعد الاتصال والسلامات والتحيات عامل ايه والسيراتو (السيدة العجوز ) اخبارها ايه؟؟؟؟ والتوكيل عامل ايه ؟؟؟؟؟؟؟؟؟؟؟؟؟
قالي زفت في كل حاجة مش ممكن ده يبقى توكيل كيا اللي كنا بنرفع راسنا بيه ونتفاخر بيه ايه بس اللي حصل !!!!!!!
عيسوي اجاب انه عربيته اتخبططت كبوت ورفرف واكصدام
.... سمير : معلش يا باشا المهم انت سليم ؟؟؟؟
عيسوي : الحمد لله بس خد بقى !!!!
سمير : خير يا ريس !!!!!!
عيسوي : قلت اديها طلعة لابو رواش وهناك تتضبط
سمير : عين العقل وكلام سليم
عيسوي : التوكيل قالي تاخد 20 يوم يا باشا ومش كتير علشان الضغط اللي عندنا
عيسوي : ماشي وتحت امركوا في اي تكاليف
سمير : كده ناس زي الفل
عيسوي : جالي يا سمير سفرية لقطر كام يوم كده يعني اسبوعين قلت مصلحة العربية تتصلح واخلص شغل وكده يعني
سمير : ده كده مية فل و14 يا عيسوي
عيسوي : رجعت يا معلم وريحت يومين واديها اتصال بالتوكيل
كله مطنيش واللي يرميه ويقولي بكره طب بعده
سمير : كده فيه اينهه !!!!
عيسوي : طلعة يا ريس لابو رواش بنفسي واذا بالطامة الكبرى
سمير : اكيد العربية مخلصيتش يا باشا
عيسوي : ده اولا وثانيا العربية الرفرف اللي قدام التاني السليم مخبوط ومطبق تطبيقة عنب ( اتعجن )وثالثا الكاوتش كله على الارض وواحدة من الفرد معجونة ومتاكلة وجايبة سلك وطالع من كل حته ؟؟؟؟؟؟
سمير : يا نهار اسود ايه ده مش ممكن هم خدوها في فيلم اكشن ولا ايه ؟؟؟؟؟؟
عيسوي : بقيت زي التنيين والثور الهائج وبقيت اقابل كل واحد ازعق فيه واشوحله واشوط فيه ....
والصالة الخاصة بالاستقبال كلها اتلمت عليه وبالفوم المليان
يا ولاد ..... هاتولي الكبير هنا يا ما هاطربقها عليكوا
سمير : قعد باسمعه بتحفز
عيسوي : خالد فاروق طلع وفيه ايه وايه المشكلة وطبعا عرف الحوار كله وبعدين قلتله ياتعويض بقى يا ترجع زي ماكانت يا ما هفضحكوا وابهدل الدنيا واشتيكيكوا في كل حته
خالد فاروق : عينيا الجوز وقلبي اللوز واعتبرها عربيتي
عيسوي : لما اشوف ايه اخرتها معاكوا
سمير : حاسس انه حلم يا عيسوي انا مش مصدق
عيسوي : والله زي ما حكيتلك يا سمير باشا وبعدين ياسيدي لاقيت معظم قيادات التوكيل بتكلمني وتقدم الاعتذار وياريت بلاش اي اجراء ضدنا .......
ماشي ماشي خلصولي العربية انتم بس انا كده خلصت
ورحت يا سمير استلم العربية وتم اصلاحها بالكامل وتغيير عدد 2 فرد كاوتش بدلا من 1 ورجعت السيده العجوز شباب تاني احسن من الاول وكفارة يا راجل دول عالم ......

انتهت احداث القصة الحقيقية دي واللي دار حديثها بين عضوي نايل موتورز لقسم كيا وابطالها

1- محمد عابدين ( سمير )
2- محمد عيسوي ( عيسوي)
3- النجمة سيراتو ( السيدة العجوز )

وربنا يعلم ان هذا فعلا هو الحوار من غير زيادة او نقص او تزييف وربنا يرحمنا برحمته ويا خسارة التوكيل كده شكله مش هيعمر

**ahmed_su** · 24-08-2010 02:37 PM

اولا حمدا لله على سلامة السيراتو

توكيل كيا للاسف كل يوم بينزل درجة

ثالثا حلو السيناريو والحور يا باش مهندس :-)

**ahmed_su** · 24-08-2010 02:54 PM

ما عاش ياباشا ولا كان اللى يخلينا نحط عربيتنا فى الوحل

العربية عربيتى والصيانة ماهياش لغز ولا قدس الاقداس

عربيتى معايا وفلوسى فى جيبى ها اعملها فى المكان اللى يرحينى ويدينى خدمة

مقابل الاداء التوكيل كويس اهلا وسهلا باظ فيه 100 حل ولايهمك

**sara2001** · 24-08-2010 03:53 PM

يعني العربيه بدل ما تتصلح في الوكيل تتعجن
انا مش مطمنه للوكيل خالص بعد الكوارث اللى بيعملها
وده اللي المفروض احسن من غبور
كده كله محصل بعضه

**mohamed_e36** · 24-08-2010 04:39 PM

الحمد لله انها اتحلت وربنا يستر

**human** · 24-08-2010 04:46 PM

مش فاهم ايه اللى حصل للكاوتش

**aaet1** · 24-08-2010 07:17 PM

عادى ياباشا وتجربتى معاهم فى فرع أبو رواش من شهرين بس والعربية كنت بغير اكصدام وصدر وفانوسين وفانوس ضباب وكارتيرة عجلة شمال، وبرضه ال 15 يوم وبرضه سبتها وسافرت اسبوع ولما رجعت سمعت كلام كتير من نوع خلاص اهه، بكرة ، بعده وبعد اسبوعين رحتلهم وقابلت المهندس خالد فاروق وللمفاجأة كل اللى لقيته ان العربية فاكين منها الاكصدام والفوانيس طب وبعدين لقيت ان المشكلة ان معندهمش صدر، يا حلاوة ... امتى هيوصل ... كام يوم طب عندكوا لغاية آخر الاسبوع وأنا هجيب الصدر من بره .. ماشى،
طبعا مفروس لأنهم ماوضحوش ان عندهم مشكلة فى قطعة غيار من البداية بدل ما كل شوية يمطوحونى.

برضه دورت بره ولقيت مليون صدر عند الجندى وغيره ... المهم صدقوا والصدر وصل واتركب بعديها بيومين طب وبعدين .... يومين تلاتة على الاكصدام الجديد لما يترش حاضر ... المهم وصلنا ل27 يوم وأخيرا هستلمها بكرة ولسه رايح لقيت مكالمة معلش أجلها يوم ... ماشى

رحت لقيت العربية زى ما هى مجرد صدر اتركب والاكصدام مجرد مرشوش.

طبعها وقفتلهم وياباشا فى نص ساعة بالتمام والكمال الاكصدام اتركب والكرتيرة وفانوس الضباب والعربية طلعت اتغسلت وبعدين اتركب الفانوسين ودمتم

يعنى الموضوع لو الواحد عمله برة مايخدش يومين ثلاثة أنا اتذليت جنبيهم 29 يوم بالتمام والكمال

لأ ومحسبينى على مصنعية 1550 جنيه ... على شغل نص ساعة وهقول ساعة كمان تركيب صدر !!!!

ماعلينا .... اهى حرقة دم والسلام

مرة تانية كنت بظبط التكييف ورحت فرع روكسى وطلعت منهم ب 3 خدوش على الكبوت ومع الأسف ما شفتهاش إلا لما روحت

-

الموضوع: سمير وعيسوي..... حوار من قلب توكيل كيا ..عليه العوض خلاص

LinkBack

أدوات الموضوع

عرض

-

-

-

-

المواضيع المتشابهه

مشكلة في توكيل العوض لأوبل

عليه العوض و منه العوض

عليه العوض

وإنعدم الاحساس بالمسئولية وتقدير الأخرين عليه العوض

الكلمات الدلالية لهذا الموضوع

المفضلات

المفضلات

ضوابط المشاركة