افيدونا بالله عليكم وفى المقدمه أ سبعاوى

بصراحه انا بقالى فتره طويله متابع المنتدى وتحديدا قسم نيسان
وكنت من خلال المتابعه ديت بحاول انى اوجه القرار بتاعى فى الشراء
واستقريت بعد متابعه طويله للكتابات هنا ان النيسان هى الافضل والاحسن بالنسبه لسعرها
وخصوصا مع كتابات أ سبعاوى عن ملامح الاداء وخلافه بس
بدأت تتوالى الكتابات عن العيوب اللى فى الصناعه المصريه اللى كسفانا على طول
01 فى فراغات فى التقفيل
02 الخامات المستخدمه زى الزفت
03 بتسخن من الرجلين
04 صالونها ضيق
05 العفشه ناشفه
06 صوت الموتور عالى
07 استهلاك البنزين جوه البلد كبير
8 0 سعر اعاده البيع اقل من الفئات التانيه واصلا تقيله فى بيعها
9 0 الكراسى واطيه جدا تتعب الرجل
10 0 شاشه الكاسيت بتسخن لما يشتغل فتره ده غير ان السماعات اللى قدام تعبانه
11 0 البعض وصفها انها علبه صفيح متحركه
12 0 كماليتها محدوده جدا
13 0 العربيه لو ركبها اتنين ورا بتحك فى المطبات واطيه على الارض
14 0 الفرامل مش كويسه بتزحف منك ومفهاش ABS
15 0 الفرش خصوصا البيج بيتوسخ بسرعه
16 0 مشكله لسه اخ لينا مشتكى منها وطلع كذا واحد عندوا نفس الهم ان العربيه طلعتلها بقع
بسبب مشاكل فى الدهان طبعا فضيحه
17 0 عوازل الصوت ضعيفه او مش موجوده اصلا
18 0 ديت مشاكل شايعه مش هتكلم عن المشاكل الفرديه اللى بتظهر لناس وناس
سؤالى دلوقت انا المبلغ اللى معايا يعلم ربنا دبرتوا ازاى وبجد بدأت اخاف من العربيه
وانا مليش خبره فى العربيات اصلا وتمنها مش قليل
وهل نفس المشاكل ديت موجوده فى super saloon
ده غير ناس بتقول ان المميزات لل Super saloon
متستهالش يدفع فيها الفرق ده فى السعر مع ال EX
وناس تانيه بتقول يبختك يسعدك لو Super saloon
فهل المشاكل اللى فاتت مش موجوده فى الفئه الاخيره ؟
وهل الفرق مش موجود فعلا ؟
وهل ال sunny مش عربيه زى مناس قالت ؟
افيدونا بالله عليكم

اتمنى ان الناس يهتموا بالرد عليا واذا كان فى بدائل افضل يقولوا برضوا
وشكرا مقدما

انا والدتي عندها Super saloon أنا شايف ان في عربيات تانيه أحسن منها بنفس التمن
بصراحه العربيه ممتازه وادائها ممتاز بس طالما المصريين لعبوا في حاجه انت عارف مش بتبقي كويسه
بالنسبه للفرق بين super saloon
وsaloon EX بصراحه الفرق بينهم يستاهل الجنوط و ال air bag لوحدهم اكتر من الفرق هي العربيه بصراحه كويسه بس في احسن منها انا اكتر حاجه مزعلاني منها الخامات بالذات الفيبر الزباله المستخدم جوه و الحته اللي ورا الطاره ده تحسها بلاستيك معاد تكريره ولا انا عارف جايبينوا من فين ده

يا ماااان انتا بتوصف عربيه ايه بالظبط؟؟!!

دي نيسان مش 128 مع احترامي الكامل لل 128

الصني ممتازه و موتورها جااااااااااااااااااااااام د جدا الحمدلله

ال supersaloon فرق طبعا في حاجات كتيييييره

من جوا و بره بس نفس الماتور و طبعا العفشة غير

طب ممكن لو مفيهاش تتقيل أعرف بدايل زى ايه ؟ ترشح ايه ؟
وبالنسبه لموضوع 128 فأكيد مش 128 وعشان كدا خفت ماهو لو 128 كنا قلنا معلهش لكن دى نيسان وده مش كلامى ده كلام ناس شاركت قبلى
المشكله انى حبيت العربيه ومستريح ليها بس خايف فيريت لو الناس اللى شكت من العربيه تتواصل معانا والناس اللى ربنا اكرمهم بيها برضوا يقولوا ايه رأيهم فى الكلام ده (ويريت الرد يتناول كل النقاط اللى اثيرت بحيث تكون الاستفاده مكتمله ...وكلوا
بثوابه ) ... وخصوصا أ سبعاوى لانه كان سبب ان ناس كتيييييييييير جابت العربيه
ماشأء الله بموضوع ملامح الاداء .

بص من الاخر
لو العربية مش مستريح ليها نفسيا ابعد عنها
عشان لو صوت بلاستيك طقطق هاتعبرها جريمة
فكر في السيراتو عربية ممتازة والوكيل راجع بقوة

زى ما قال اخونا العزيز كريم ، المشكلة انك فعلا قفلت من العربية واتعقدت منها

والفكرة انه فى حدود سعر العربية دى لا توجد عربية بدون عيوب

فبالتالى لو ظهر اى عيب فيها مهما كان بسيط هاتلعن اليوم اللى جبتها فيها واحتمال تتضايق من اللى نصحك بيها

بالنسبالى انا كنت ولا زلت شايف انها احسن المعروض فى فئتها السعرية، جربت عربيات اغلى منها بكتير ولم اشعر بفرق ولقيت الميزات متكررة والعيوب متكررة بينها وبين عربيات كتير اعلى منها فى السعر

وانا لو رجع بيا الزمن سنة لورا وكنت فى نفس الموقف تانى هشترى الصنى برضه، برغم ان برضه قبل ما اشتريها كل الناس سمت بدنى، ويمكن اخونا العزيز كريم منير كان حاضر الأيام دى وفاكر كل اللى اتقال لى ساعتها، لكن انا حسبت اختيارى كويس وتحملت نتيجته ولم اتوقع من السيارة اكثر مما يمكن انها تديهولى فعليا علشان ما احبطش، والواقع انها ادتنى اكتر من توقعاتى

لكن السياسة دى مش شرط انها تنفع مع كل واحد لأن اللى يناسبنى قد لا يناسبك، لذلك لو انت مش مرتاح نفسيا للعربية فكر فى اختيار آخر يريحك نفسيا، لانسر شكل قديم، اوبترا، ماتريكس، إلانترا، جين 2 ، سيات ابيزا، عندك اختيارات متعدد فى المنطقة دى

اما بالنسبة للمسائل الأدائية فى السيارة فأنا هارد على اللى النقط اللى انت اثرتها
واحدة واحدة

1- فيه فراغات فى التقفيل -التعليق (لا يوجد)
2- الخامات المستخدمة زى الزفت-التعليق خلينا نكون دقيقين شوية، فعلا موكيت الأرضية خفيف وكواتش الباب شكله مش فاخر، لكن باقى الخامات المصرية اللى فيها (الكراسى ، الزجاج، الشكمان، البطارية، الضفيرة، الردياتير والسربنيتنة) ممتازة، اما باقى المكونات فهى كلها يابانى ، المكيانيكا كلها، الإطارات بريدجستون يابانى، الفوانيس، الصاج كله، كل البلاستيكات فى الصالون، حتى خراطيم التكييف يابانى، وبالتالى حكاية ان الخامات زى الزفت دى واسعة شوية
3-بتسخن من الرجلين (معدتش عليا الصراحة لا صيف ولا شتا)
4-صالونها ضيق(هذة لا تؤخد بالسمع، اقعد فيها قدام وورا، عجبتك بها ونعمت، لو معجيتكش ومسألة الصالون تفرق معاك يبقى هذة العربية ليست اختيارك المناسب)
5- العفشة ناشفة(هى نفس اداء عفشة اللانسر اللى بتدعم الثبات على حساب الراحة شوية، وافضل من اداء الإلانترا ، وتختلف عن اداء الكورولا اللى بتدعم الراحة والنعومة شوية على حساب الثبات ، وبالمناسبة فأداء عفشة الموديلات اليابانى منها زى اداء الموديلات المصرى بالظبط متفرقش اى حاجة، وبالتالى اللى شايفين ان اللانسر عفشتها كويسة هيبقوا شايفين ان دى برضه كويسة والعكس بالعكس)
6- صوت الموتور عالى (شرحه ، هو نفس صوت موتور اللانسر، بيزعق شوية مع التسارع ولا صوت له نهائيا على السرعات الثابتة تحت 130، وشصوته مسموع شوية على السرعات الثابتة بعد 130، وبالتالى هى فى نفس منطقة اداء اللانسر)
7-استهلاك البنزين كتير (مع استطلاع أراء كل اللى معاهم سيارات 1600 اوتوماتيك من فئات مختلفة ملقيتش الفارق الشاسع ده، صحيح انها مش زى اللانسر 1300 مانيوال مثلا لكن استهلاكها مش مختلف كتير عن لانسر 1600 اوتوماتيك، 180-220 جوة البلد ، 270-290 طوالى)

8-سعر اعادة البيع( اعتقد ان الموضوع دة لا ينطبق حاليا على الموديل الحالى واللى قبله، لأن نزول الموديل المصرى وحالة الزروطة التى اصيب بها الشارع من النيسان خلقت سعر وطلب للموديل اليابانى الأقدم حتى 2004، فما بالك بالموديل الحديث)

9-الكراسى واطية تتعب الرجلين( برضه دى انت تقدر تحكم عليها بالتجربة وليس السمع، مع ملاحظة ان كرسى السائق بيعلى ويوطى)

10- شاشة الكاسيت بتسخن (ولنفرض يا اخى انها بتسخن -مع انى عمرى ما لاحظت الحكاية دى- ايه المشكلة، طب ماهى منافستها الأولى فى هذة الفئة اللانسر الشكل القديم بتنزل من غير كاسيت اصلا، وكدة كدة لو انت غاوى صوتيات مافيش اى كاسيت عربية فى الفئة دى هيناسبك، ولو انت من المستمعين العاديين زى حالاتى ماظنش انك هتلاقى اى مشاكل مع الكاسيت بتاعها

11-البعض وصفها بأنها علبة صفيح متحركة،( ماهو فى ناس تانيين وصفوا الماتريكس بانها قسط لبن والكورولا بأنها نعش طائر ، لكن ما هى الصفات القياسية التى يمكن تمييز العلبة الصفيح المتحركة بيها عن باقى السيارات حتى نستطيع الفحكم على كونها علبة صفيح من عدمه، يا ريت تعرف من هؤلاء البعض، فكرتنى بأيام زمان لما شتريت عربية لانوس كل اقاربى طلعولى فيها العبر، وساعة لما جيت ابيعها كل اللى شتموا فيها كانوا عايزين يشتروها............!)

12- كماليتها محدودة جدا(فعلا، مافيهاش Abs وebd ، لكن فيه ايه ناقص غير كدة؟4 زجاج كهربائى وسنتر وباور ومرايات كهرباء ، وكرسى السائق 3 اتجاهات وعداد Rpm وعدادين رحلات وساعة ديجيتال فى التابلوه ورفع وخفض عجلة القيادة واماكن الأحزمة وحامل اكواب وايرباج واربعة ادراج تخزين وكاسيت وانذار وفتح الشنطة والتنك من داخل السيارة ، ده بالنسبة لل Ex اما بالنسبة للسوبر صالون فتزيد حامل نظارة شمس وجنوط سبوط وابانوس وايرباج اضافية وسى دى تشانجر وطارة
وفتيس وفرامل جلد طبيعى و مخدع بالكنبة الخلفية، عايز ايه كماليات اكتر من كدة )

13- اى عربية فرشها بيج هيتوسخ بسرعة، لو مش عاجبك البيج هات اللون الفضى منها بفرش رمادى، لو مش عاجبك الفضى بفرش رمادى يبقى الصنى لا تناسبك

14- بالنسبة لمشكلة البوية المرة الوحيدة اللى سمعتها هى هنا من صديقنا على المنتدى ، لكن ما الواحد بيشوف كل يوم 100 واحدة ماشية فى الشارع ماشفتش الحكاية دى خالص، وبالتالى دى تدخل ضمن قائمة المشكلات الفردية وليس العامة

15- عزل الصوت ضعيف: لك حق بس برضه حسب انت بتقارنه بعزل صوت انهى عربية، يعنى لو قارنته باللانسر مثلا فبالتأكيد لك حق، لكن لو هتقارنه بلانوس او فيرنا فبالتأكيد المقارنة ليست فى صالح اللانوس او الفيرنا نهائيا لكن حكاية مش موجود خالص دى برضه مساحتها واسعة شوية

وبرضه ارجع اقول لك، لو انت قافل من العربية بلاش منها، لكن معظم الشتيمة فى العربية سببها حالة القولبة اللى معظم الناس عايشة فيها بتاعة ان اى منتج مصرى زبالة حتى لو ثبت انه ممتاز ، فإما انك تخرج نفسك من مود كراهية العربية وتقبلها بميزتها وعيبها، واما انك لو قلقان يبقى بلاش منها نهائيا

بصراحه نسفت كل مخاوفى وفعلا التجربه خير مقياس وربنا يبركلكم فيها وشكرا جدا على الاهتمام والرد

انا عندى سوبر صالون بصراحة العربية ممتازة
الحاجة الوحيدة ان التابلوه شكله قديم

انا اشارك الراي للباش مهندس سبعاوي
بس في سؤال واحد هساله و ردوا انتو عليه
في عربيه تانيه ماركه يباني و فئه عاليه و فيها الكماليات دي و الامكانيات دي و ب 101 الف جنيه موجوده في مصر لو لقيتها ابعد عن الصني لو كلام الناس صح
و بعدين العيوب دي بتبقى مقياس من واحد للتاني يا جماعه مش كل كلام الناس صح

ربنا يخليك لينا يا باشمهندس سبعاوى
بصراحة كل ردودك منطقية
المفروض نيسان ايجبت يدولك عربية مجانا أو يعينوك عندهم فى التسويق
لو جابوا أكبر خبير عندهم فى المصنع ماكانش هيعرف يدافع عن الصنى زى ماعملت
عموما ريحت بال كل أعضاء منتدى نيسان صنى
مع خالص تحياتى

فعلا مفيش حاجه بالسعر ده فيها كل ده ....وأنا بدأت كلامى أنى مستريح للعربيه فعلا نفسيا وشايف انها عروسه ..... وأسألتى كلها فى أطار حتى يطمأن قلبى .
وعشان كده انا جمعت كل المشاكل اللى اشتكى منها الاخوه هنا بشكل مركز شويه بحيث أشوف الرد عليها سواء عشانى أو أى حد ناوى يأخد قرار الشراء .
بس كنت أتمنى أن يكون فى تفاعل أكتر من الناس اللى مرحبوش بالعربيه يعنى بالبلدى يبقى فى خد وهات اكتر من كده لحد دلوقت الخد كتيييير وده مؤشر جميل للعربيه .

ممكن أقول رأيى

أنا معايا النيسان بقالها حوالى شهر عملت بيها حوالى 3500 كم وهرد عليك بالنقط بالترتيب:

1- فراعات التقفيل: ماشفتش مصرى أحسن من كده غير المرسيدس.
2- الخامات وحشه: كلام فارغ ولا أساس له من الصحه فيما عدا كاوتش الأبواب جيد وليس ممتاز
3- بتسخن من الرجلين: اطلاقا عمرها ما حصلت حتى الآن
4- صالونها ضيق: دى مساله نسبيه
5- العفشه ناشفه: معاك حق فى دى ومتعالجه فى السوبر صالون
06 صوت الموتور عالى: يمكن شويه ولكن مش زى الفرنا مثلا. مقبول الى درجه كبيرة
07 استهلاك البنزين جوه البلد كبير: نفس رد أستاذ سبعاوى
8 0 سعر اعاده البيع اقل من الفئات التانيه واصلا تقيله فى بيعها: فكر لو حبيت تبيعها تجيب ايه؟ تقدر تقول لى ؟ لازم تكون حاجه أعلى زى ايه بأه؟ وأمتى بعد سنه مثلا (ما أعتقدتش) ولا بعد عشر سنين أعتقد وقتها مش هتفكر فى كده
9 0 الكراسى واطيه جدا تتعب الرجل: دى تختلف من شخص لشخص و الكرسى فعلا ممكن يعلى وعلى كلا علاجها سهل حط حاجه تعلييه
10 0 شاشه الكاسيت بتسخن لما يشتغل فتره ده غير ان السماعات اللى قدام تعبانه: صح بس تخيل ما أختش بالى غير دلوقت يعنى العيب ده مش ظاهر قوى زى ما أنت متخيل.
11 0 البعض وصفها انها علبه صفيح متحركه: كلام فارغ
12 0 كماليتها محدوده جدا: نفس رد الأستاذ سبعاوى
13 0 العربيه لو ركبها اتنين ورا بتحك فى المطبات واطيه على الارض: لسه دى ما جربتهاش
14 0 الفرامل مش كويسه بتزحف منك ومفهاش Abs : نتيجه لوزنها وأنها أتوماتيك بتحتاج مسافه أكبر شويه صغيرة للتوقف بس دى بتتظبط مع التعود. الغريبه أن فى ناس بتتضايق من القرامل القويه وتقول دى فرامل لزق فى الزجاج...........!!!!!!!!!!
15 0 الفرش خصوصا البيج بيتوسخ بسرعه: أنصحك باللون البيج لأن لون السقفوالقوايم بيج حتى مع الفرش والتابلوه الرمادى فطبعا الرمادى مش بيطلع حلو مع البيج. عارف فكرتنى بأيه واحد شرب حاجه ساقعه وقال دى وحشه قوى بتخلص بسرعه. ده أنت لو لابس هدوم فاتحه لازم هتتوسخ بسرعه عن الهدوم الغامقه هل ده عيب الهدوم؟
16 0 مشكله لسه اخ لينا مشتكى منها وطلع كذا واحد عندوا نفس الهم ان العربيه طلعتلها بقع بسبب مشاكل فى الدهان طبعا فضيحه: والأخ ده دهن الأكصدمات على حساب الضمان
17 0 عوازل الصوت ضعيفه او مش موجوده اصلا: غير صحيح بالمرة


هناك ميزه مهمه جدا تغطى على كل اللى فات من وجهة نظرى: كل حاجه معموله علشان تعمر أطول فترة ممكنه يعنى وان كانت الكماليات قليله نسبة الى السيارات الحديثه ولكن عمرها الأفتراضى أطول كتير. أنا كان معايه عربيه صينى فيها اللى بتحلم بيه ولكن لمدة أد ايه تحلم بيه؟

أنصحك بالسوبر صالون فرش بيج (لون نبيتى مثلا) لوجود ميزه واحده مهمه فى وجهه نظرى التعليق الرياضى وانا سألت على المساعدين دول لقيت الواحد الأمامى ب775 جنيه والخلفى ب440 جنيه ده غير الأستبيليزر الأمامى يعنى التعليق الرياضى بس ممكن يتكلف 4500 جنيه على أقل تقدير ده غير الكماليات الأخرى اللى مش ممكن تركيبها زى الأصلى زى مثلا فوانيس الشبوره ممكن تركب ب1000 جنيه بس بتشتغل بمفتاح منفصل مش زى الأصلى مع ذراع الأشارات.

أخيرا أنا متفق تماما مع الأساتذه كريم وسبعاوى لو قفشت من الصنى ابعد عنها

تقييمات اكثر من ممتازة

العربية معايا و هى اكتر من ممتازة, انا حسيت انك بتوصف عربية لادا مش نيسان صنى

انا شايف ان السوبر صالون افضل عربية فى فئتها
بس يعيب السوبر صالون انها فقط اتوماتيك
عشان فى ناس ومنهم انا
عايزين السوبر صالون بس مانيول ودى مش عارف ساقطة من الوكيل ودة من الشركة الام او الاب :(

اقتباس:

---

المشاركة الأصلية كتبت بواسطة hummer

العربية معايا و هى اكتر من ممتازة, انا حسيت انك بتوصف عربية لادا مش نيسان صنى

---

لالالالا ليه كد بس انا معايا عربية لادا وهي اللي شايلانا كتر خيرها

اخى العزيز ربنا يهديك للى فيه الخير
بس انا كنت عايز ارد زى ما الأخ سبعاوى رد بس ماكنتش عارف ارد زاى وهوه دا فرق الخبره ربنا يباركله يارب ويهديك للى فيه الخير

اقتباس:

---

المشاركة الأصلية كتبت بواسطة viking1616

لالالالا ليه كد بس انا معايا عربية لادا وهي اللي شايلانا كتر خيرها

---

يا باشا انا ما قصدش طبعا

و انا من شهرين بس كان معايا لادا 2107

العربية اللادا حمالة قاسية و بتستحمل بس عيبها انها ناشفة شوية.