من كام يوم كنت ماشي من البيت متجه للمكتب سيرا علي الاقدام ولقيت راجل كبير في السن ولابس جلابية بسيطة جدا وماسك في ايده ورقة و متجه نحوي مباشرة وبيقوللي " ممكن لو سمحت .. "
طبعا انا من واقع الخبرة العملية بشوارع القاهرة البهية توقعت التمثيلية المكررة ..ح يقوللي انا جيت من بلاد واق واق وفلوسي ضاعت وعاوز اروح ياريت تساعدني باللي تقدر عليه .... أو المسلسل التاني .. انا عندي مرض الإستبحس وبآكل مشابك الغسيل وبوز اللحاف وانا نايم وعاوز اجيب العلاج ده من منظمة الصحة العالمية بالسنبلوين وآدي الروشتة معايا .. ودي طبعا عينة من الأفلام اللي بتتقال وافتكرت اخونا سبعاوي لما كان بيتكلم علي الهبوط بالبراشوتات .. وانا في العادة في هذه الاحوال باتصرف كأني مش سامع حاجة ومن غير تفكير قلتله .. الله يسهلك يا حاج .. الله يعطيك
لقيت الراجل وقف اتسمر في مكانه كأني ضربته بسكينة وبصلي بمنتهي الحزن واللوم والعتاب وعينه مرغرغة بالدموع وقاللي " لية بس كدة يا إبني ... " وهنا اتضحت لي الحقيقة .. الراجل معاه ورقة مكتوب فيها " مكتب السجل المدني بجوار قسم الوايلي .. بالعباسية "ويظهر انه رايح يطلع شهادات ميلاد عشان يضيف احفادة علي بطاقة التموين ... ولما لاقاني ملتحي اختارني من بين الناس اللي ماشية عشان يسألني عن العنوان ...
انا طبعا حسيت اني اندلق عليه جردل مياه باردة وبقيت في نص هدومي بس الحمد لله تداركت الامر بسرعة واعتذرتله و طبطبت علي كتفة ودليته علي العنوان بس بصراحة زعلت من نفسي جدا لتسرعي في الحكم علي الامر
علي رأي المثل
.... ولاد الحرام ما خلوش لولاد الحلال حاجة
المفضلات