الموضوع: محتاج استشارة فى حاجات كتير ارجوا الافادة

الحاجات اللى بتكلم فيها هتكلفك كتير وفى الاخر مش هتبقى مظبوطة ، فالافضل انك تبعها وتشترى توك توك

الاخ الفاضل أنا يشرفنى انى ارد عليك فى حدود معرفتى وربنا يقدرنى ان شاء الله

المشاركة الأصلية كتبت بواسطة keko

عندى شوية استفسارات وياريت اصحاب الخبرة يفيدونى علشان الصنايعية مايحسوش انى غشيم
معايا فيات 125 بس عايز اظبطها صح قوى ان شاء الله فرجاء الرد على الاسئلة بعض او كلها مع العلم انا فى اسكندرية يعنى لو امكن اماكن فى اسكندرية ياريت او ارقام ناس فى القاهرة اخليهم يبعتولى فى الشحن
1 - ايه الفرق بين مساعدين غاز وزيت وغاز على زيت وايهم افضل والماركة المناسبة عندى تتحمل وتخلى العربية ناعمة وثابتة وبكام
المعلومة دى معرفش افيدك فيها
2 - لو عايز اعمل اكصدام امامى فايبر يكلف كام و عايز نوع فوجات شكله حديث ومايكونش غالى يركب فيه ولو عملته حديد يبقى حلو برضه ؟
حضرتك حدد مكانك فين علشان نقدر نفيدك فى حد كويس فى شغل الفيبر
3 - الحوض عندى شكله وحش ومقشر بس قالولى بلاش ارش دواخل فايه ممكن يظبطه من غير مايعتبر رش دواخلزى مثلا بوية بلاستيك وتتقشر لما اعوز او حاجة كده.
خلى الحوض على شكله علشان لو اترش محدش هيفهم او هيحاول يفهم كل اللى هتقوله هيقولك العربية عاملة حادثة وبعدين الحوض محدش هيشوفه وعلى فكرة الدواخل الشركة بتحافظ على ثمن العربية نوعا ما
4 - بالنسبة لزجاج الكهرباء محتاج ايه وايه هيا بالضبط وحدة الرفع . انا سالت عليها جديدة ب 40 جنيه تايوانى محتاج ايه تانى
بص يا سيدى الزجاج الكهرباء بيتعمل بسهولة جدا انا مركبة فى الشاهين بس مركب قدام بس وكان مكلفنى حوالى 220 بالتركيب + وحدة رفع ب30 ج ووظيفة وحدة الرفع انك لما تقفل السنتر هى ترفع الازاز .
5 - بالنسبة للانذار والسنتر محتااااااااااس
يعنى انا مش شايف انى محتاج الانذار وانه تكلفة على الفاضى لكن هوا السنتر محتاجه فى حاجة . انا سالت ع السنتر 110 بالريموت بدون انذار طيب انا عايز اركبهم حاجة حاجة عشان التكاليف وايه نوع حلو وسعره كويس
بص يا سيدى الانذر هو سنتر + انذار ممكن تركبهم افضل الانواع هو الولف انا كنت مركبة فى شركة عبر البحار الى موجودة فى جسر السويس جنب سوق القنال عندهم جميع الاسعار وتركيبهم نضيف وفى ضمان كمان والاسعار تقريبا ممكن 250 ج للكل
6 - لو ركبت سنتر وبعدين ركبت انذار ينفع الانذار يشتغل على ريموت السنتر ولا لا
7 - انا اعرف ان السنتر بيعمل صوت تيت تيت لما يقفل طب من غير انذار بيطلع الصوت ده برضه ؟.
لا السنتر من غير صوت هو انك تقفل الاربع ابواب مع بعض وممكن يكون من غير ريموت ممكن تركب سنتر ب100ج اربع قرب
8 - يتهيالى ان لما بتقفل العربية بالريموت الزجاج الكهرباء بيقفل طيب ده محتاج حاجة معينة ولا عادى السنتر بيتوصل على زجاج الكهرباء ؟
رديت على دى فوق شوية دى وظيفة وحدة الرفع
9 - فيه ستيكر سمعت عنه بيبقى نيكل ولزقه جامد اسمه ايه وبكام
معرفش حاجة عن دة
10 - عايز اركب لمبات h4 ابيض ناصع او مزرق تكون عالية و 55\65 وات علشان ما تسحبش من البطارية اركب نوع ايه وبكام
احسن حاجة لمبات 200/260 ودى ب50 ج الجوز مع كتاوت هتلاقى الدنيا فل وبعدين العربية مفيش مشكلة من البطارية لان الدينمو شغال شحن وممكن تركب زينون صينى ب250 زة الفل مع فوانيس الكريستال
11 - صوت الموتور واصل الصالون جامد ايه ممكن اعمله يعزل الصوت
ممكن تزود العزل شوية خلف التابلوة بعازل حرارى
12 - عايز اغير التابلوه بواحد حديث ايه ممكن يركب من غير قص وتعديل
ال128 بتعدل تابلوة اوبل كورسا ال94 ممكن تشوف ينفع عندك ولا لا هو شكله حلو قوى وبيتكلف تقريبا 1000ج
13 - بلاش حد يقوللى بعها واشترى تكتك
بلاش توكتوك ممكن تجيب موتسيكل صينى لان التوكوتك اغلى منها كثير
14 - سعر شداد الشاسيه وبيتباع عند بتوع قطع الغيار ولا ايه
معرفش سعره ممكن تسال فى عزبة شلبى على الشداد
اسف جدا على الاطاله بس بجد محتاج مساعدة وجزاكم الله كل خير
ولا يهمك احنا كلنا اخوات وبنتعلم من خبرات بعض وفى راى ممكن تركب طقم جنوط شيك مع شوية سمكرة وبوهية حلوة بس دة لو مش عايز تغير العربية فى الفترة الجاية
تقبل تحياتى ويارب اكون قدرت افيك بشوية معلومات متواضعة ومتزعلش من اللى مردش احنا هنا مبدئنا محدش يرد غير اللى عارف
أخوك محمد حامد