فيرنا زيرو/بي ام 316 موديل 94/هيونداي كوبيه 2005

**icon** · 25-08-2010 06:52 PM

معايا 70 ألف وبفهم في العربيات كويس جدا والحمد لله ، ونازل من عربية لانسر 1991 السنة اللي فاتت بعتها
عاوز حاجة تناسبني في حدود 70 ألف ، فكرت ودورت وحطيت كل خبرتي وفي الاخر رسيت علي الثلاثة دول :
1- فيرنا زيرووووو
2- بي ام 316 موديل 94
هيونداي كوبيه 2005
وهقولكو ليه
1- طبعا الجديد جديد والفيرنا رغم كل الكلاااااااام (من غير ما نفتح مواضيع) عربية ممتازة وكفاية ريحة الزيرو
2- ههههه ، مش هتكلم طبعا ، فخامة وقوة ومتانة ومعمرة (شششش) ولا كلمة ، بس خايف من قطع الغيار ياتري عشان موديل قديم شوية التجار هيتحكمو فيا وهتبقي غالية ؟ وممكن متبقاش موجودة أصلا وأدوخ عليها بس بصراحة مهما كان فيها أسمك راكب (bmw) بس.
3- اوعي الروشنة ، خاصة لو العربية حمرا ، اوووووه ، اكس اووووووووه كمان ، مش شايف لها عيوب معايا ، لكن مشكلة بسيطة اني كل يوم وانا رايح الشغل بيركب معايا الحج والحاجة، والكنبة اللي ورا ضيقة ، بس ممكن نتعود بسيطة .
بس عرفتو ايه مشكلتي ان الثلاث عربيات مافيهمش مشاكل بالنسبة لي غير اللي ذكرته ويمكن التغلب عليه
1- الفيرنا عليها كلام
2- البي ام خايف من قطع غيارها
3- الكوبيه معايا أبويا وأمي كل يوم بنروح الشغل احنا الثلاثة وأمي هتركب ورا (والله مافيهاش حاجة) ايه يعني نطبق الكرسي ونفرده .

افيدووووووووووني
(أنا بصراحة كدة بتلكك علي البي ام)

**Mostafa.Mahran** · 25-08-2010 07:10 PM

انزل خد جولة عند محلات قطع الغيار الجديد و الاستيراد و غللبا هتكون الاسعار معقولة ده بالنسبة للبى ام
وممكن كمان تدور على جولف 2001 برضه عربية جميلة

والفيرنا الميزة انها زيرو فقط غير كده مش ركوبة زى البى ام

**SeaShark** · 25-08-2010 07:26 PM

المشاركة الأصلية كتبت بواسطة eng.m mahran

انزل خد جولة عند محلات قطع الغيار الجديد و الاستيراد و غللبا هتكون الاسعار معقولة ده بالنسبة للبى ام
وممكن كمان تدور على جولف 2001 برضه عربية جميلة

والفيرنا الميزة انها زيرو فقط غير كده مش ركوبة زى البى ام

+11111111111111111111111111111111
كلام صحيح تماما البي ام طبعا حاجة تانية و الجولف 2001 كويسة برضه
و متقلقش من قطع الغيار الاهم من كده انك تجيب عربية تبص عليها كويس و انت بتفهم كويس في العربيات و لازم ترفعها عشان انا اعرف واحد جاب بي ام مستعملة قبل كده صرف عليها تمنها صيانة و توضيب و بعد كده يأس منها و باعها

أهم حاجة الحالة....

**icon** · 25-08-2010 07:33 PM

بردو مش فاهمني
طيب انا محتار بين البي ام وبين الكوبيه ومحدش جاب سيرة الكوبيه خالص ، مع اني اجرتها مرة في شبكتي واتزفيت فيها وانا اللي كنت سايق والمدام جنبي وبردو كانت ركوبة وهايلة وثبات ، عربية جميلة والبي ام طبعا من الاخر

**SeaShark** · 25-08-2010 07:51 PM

يمكن في فترة من العمر ممكن تختار انك تجيب الكوبيه لكن افتكر برضه انها عربية سبورت اوي و مش عائلية تماما و انت واضح انك اتجوزت و هيبءي عندك اولاد ان شاء الله و هتحتاج عربية عائليه و تكون كبيرة.

ان البي ام من احسن الاختيارات (في الثلاث اختيارات اللي انت قولتهم)
يعني اذا استبعدنا انك تجيب مثلا أفيو زيرو و هيونداي اكسنت
او انك تدفع الـ 70 الف مقدم و تجيب مثلا نيسان صني او لانسر.

بس في اللي انت قولته الـ بي ام افضل اختيار

**Mostafa.Mahran** · 25-08-2010 08:01 PM

الكوبيه وانت شاب لوحدك ماشى

والكنبة الخلفية ضيقة و السقف واطى على الى قاعد ورا

ولو عاوز تركب حد معاك مش كل شوية هتنزل انت او المدام و تتنى الكرسى

**icon** · 25-08-2010 08:08 PM

عين العقل والله كلامكمو جميل وبجد خليتوني اشوف حاجات ماكنتش شايفها
يبقي دلوقتي مش هتنفع الكوبيه
والفيرنا (راكب علبة كانز)
خلينا مع الصانع الألماني
في واحدة قدامي هشوفها وربنا يسهل وبشكر كل اللي شاركوني وبقولهم ربنا يوفقكم وكل عام وانتم بخير

**eng.m7md.ali** · 25-08-2010 08:15 PM

البي ام طبعا
ممكن تجيب 320 موديل 94 او 316 موديل 97 بي ال70 الف
وقطع غيرها متوفرة في الحرفيين ورخيصة مش غالية اوي

**mahmoudselim** · 25-08-2010 08:20 PM

تقريبا كدا والله أعلم انا عرفت انتا نفسك تركب اية ومع ذالك محتار , أرشحلك بجد ال فولكس واجن بورا 2001 عربية صناعة المانية من افضل العربيات ال اتصنعت في مصانع فولكس ثبات وفخامة وبرستيج وقطع الغيار موجودة ومش غالية اوي وركوبة من الاخر معلهاش كلمة.
وأرجوك أبعد عن الفيرنا و لو عاوز زيرو ممكن تدفع المبلغ دا في تويوتا ياريس مثلا او جين 2 او الينترا او نيسان صني وتقسط الباقي , وفي عرض عاملو السعودي جروب بيدفعلك اول خمس أقساط وانتا تكمل الباقي يعني هتلاقي نفسك مش دافع كتير عن ال 70000 ال معاك.

**ahmedsadek82** · 25-08-2010 08:34 PM

المشاركة الأصلية كتبت بواسطة icon

عين العقل والله كلامكمو جميل وبجد خليتوني اشوف حاجات ماكنتش شايفها
يبقي دلوقتي مش هتنفع الكوبيه
والفيرنا (راكب علبة كانز)
خلينا مع الصانع الألماني
في واحدة قدامي هشوفها وربنا يسهل وبشكر كل اللي شاركوني وبقولهم ربنا يوفقكم وكل عام وانتم بخير

البي ام لا تقارن بأي حاجة , اتوكل على الله , من ناحية القطع , مرميو في كل حتة جديد و مستعمل و اصلي و مش اصلي ....مش حتغلب .بس حتركب عربية بمعنى الكلمة. اهم حاجة دور كويس على حالة كويسة عشان متتعبش بعد كده. على فكرة الجولف 4 بردو ظريفة لو غاوي هاتش بس.