رايح الضمان الأسبوع الجاي إن شاء الله .. وحصل مشكلة وفي شوية أسئلة صغيرة
السلام عليكم ورحمة الله وبركاته ...
كيف حالكم جميعا أتمتى تكونوا بخير .
أنا معايا صني 2010 بقالها بتاع 4 أو 5 شهور معايا وعديت الألف كيلو خلاص ( 1300 كم حاليا) العربية معايا ما شاء الله زي الفل بس فيها مشكلتين بس مجنني :
الأولى : سحب البنزين بشع جداا من يوم ما جات التانك كله بيعمل من (240 - 280 ) كيلو ( جوا البلد - تكييف )
التانية : الأبواب تقيلة أوي في القفل لازم تزقها جامد عشان تقفل كلها .
فقلت أروح الضمان إن شاء الله أشوف المشاكل دي ...
المشكلة بقى الكبيرة أن امبارح عديت من على بلاعة مش باينة للأسف عديت على طرف غطا البلاعة والغطا ماكانش ثابت فراح طرفها اللي عديت عليه نازل تحت والطرف التاني اللي تحت العربية قام مرفوع وداخل في العربية من تحت من أدام جنب العجلة الأمامية اليمين من تحت العربية وساعتها للأسف حسيت أن في صوت خبط منتظم كدا مستمر من تحت (العربية كانت دايرة ) والناس ربنا يكرمهم رفعوا العربية لحد ما رجعت بيها ومن ساعتها لقيت لمبة البطارية منورة حمرا باستمرار على الرغم من العربية دايرة كان الوقت متأخر ماكانش في حد أعرفه ممكن يشوفها فاتصلت بكهربائي سيارات قالي غالبا سير الدينامو حصل فيه مشكلة أو اتقطع ممكن يكون هو اللي عمل المشكلة فالبطارية ما بتشحنش ودا اللي مخلي اللمبة منورة .( الحمد لله على كل حال )
أنا اللي محيرني دلوقتي العربية لسا جديدة وأنا ساكن في المنصورة بعيد جدااا عن التوكيل وماينفعش أسافر بالمنظر دا لازم حد يعالجه بس أنا خايف اللي يصلح المشكلة دي يخرجها من الضمان أو حاجة زي كدا وفي نفس الوقت خايف لو رحتلهم كمان بعد المشكلة دي يطلعولي أي مشكلة تانية سواء سحب البنزين أو أي خلل يقولوا سوء استخدام بسبب المشكلة دي وبالتاي أي حاجة أنا اللي أشيلها فمش عارف أعمل إيه ؟؟
منتظر اقتراحاتكم بشدة قبل ما أعمل أي خطوة فيارييييييييييت تساعدوني وجزاكم الله خيرا