قاعد في أمان الله فى الشغل و من كتر التعب
لاقيت ايدي وقفت و سابت الماوس و الكي بورد و سرحت فى الشاشه و تخيلت البوب (أبويه) انا مسميه كدا على الموبيل
بيرن عليه و ان بفتح عليه و هو بيزعق و يقولي تعاله بسرعه العربيه اتخبطت
قلت لالالا انا و هزيت راسي و قولت ايه الفال ده ؟
ما فيش ثانيه بالظبط اول ما فوقت لقيت التليفون بيضرب
ابص فى الشاشه القي البوب و ايدي بتترعش خايف ارد افتح عليه القيه بيزعق وبيقول انا عملت حادثه تعاله بسرعه
لقيت نفسي لامم عزالي و سبت الشغل و طيرت رحتله
اول ما وصلت لقيت الحمد الله الحج واقف على رجليه ارتحت اوى و قولت في داهيه العربيه البوب سليم
اضرب عيني اشوف ايه؟
مني باص 26 داخل فيه من ورا
العربيه الشنطه مفتوحه مش عايزه تقفل و واخده خبطه و الفانوس مشروخ و في عصره فى الرفرف الشمال خلته كابس شويه على الباب بس الباب بيفتح ويقفل الحمد الله من غير اي حك
طيرت على السواق قاعد يقولي صيام و كل سنه و انت طيب و معلش و العربيه سليمه و الحج الحمد الله و أكل وداني
قولتله مافيش كلام هتصلح العربيه و اخدت الرخص بتاعته العربيه و القياده
شويه وجه صاحب الميني و معاه واحد بيتنطط كده عشان اخواته واحد لواء فى المطار و التاني عميد مش عارف في ايه؟
و بيقولي هات الرخص احنا معاك مش هنطير و بيزعق و ياله بسرعه مش عايزين نقطع عيش السواق خليه يروح يشتغل و احنا معاك
قولتله مافيش رخص و اعلى ما فخيلك اركبه ( و من هنا لهنا) زعيق و ان اخواتي مين و مش عارف ايه
و انت مش منحق سحب الرخص و خليها معاك احنا مش عايزنها و هنعرف نجبها و شوف مين يصلحلك العربيه
قولتله قشطه حطيت الرخص فى جيبي و كلمت صحبي ظابط قولتله تعاله عشان توديني للسمكري بتاعك واخت بعضي و طالعت على السمكري
لقيتهم جري جايين ورايا و حصل خير هات بقى الرخص قلتله و عزه جلاله الله ما انت شيفها ادبا ليكوا إلا لما تدفعوا الفلوس
عشان تبقى تبجحوا اوى جيه اللى اخوه لواء عمال يطنطط تاني قولتله اللى عايز تعمله اعمله
العيله عندنا مليانه دبابير و عمري ماهكلم حد اقلق مذاجه عشان هيافه زى يكوا
طلعت على السمكري قالي 600 جندي سمكره
اتصلت بنبيل كتر خيره قولتله شفلي الفانوس بكام ؟
قالي حاضر خد عربيته و نزل و بعد 10 او 15 دقيقه لقيته بيتصل بيقول 300 استيراد و حوالي 160 جديد
قولت تمام من هنا لهنا قولنا التكلفه كلها 800 انا دفعت النص اللى كنت محوشه للتصليح التكييف و هما دفعوا الباقي
و قولت ياله اديني هاقعد فى الحر تاني لحد اما احوش فلوس اصلح التكييف