الموضوع: اسئله هامه اصوات فى الدبرياج و الفرامل

السلام عليكم و رحمه الله و بركاته

رمضان كريم على كل اعضاء المنتدى

بدايه انا معايا لانوس 2007 عامله 80 الف كم و انا عامل لها الصيانه فى التوكيل(زيت و فلتر و سير كاتينه و بليه كاتينه و...........) اشتريتها من 7 شهور بعد سؤالكم هنا فى المنتدى وبصراحه انا متابع يومى للمنتدى و باستفيد جدا من راى جميع الاعضاء المتميزين و خصوصا م/سمير و أ/محمد ممدوح و العضو النشيط محمد الشامى و لكنى نادر المشاركه حيث ان خبرتى قليله

فى الحقيقه انا عندى عده استفسارات و ملاحظات و ارجو مساعدتكم مشكورين قبل ما اروح للميكانيكى بتاعى علشان اكون على درايه بالكلام اللى هايقوله و الشغل اللى مطلوب يتعمل و هى فى النقاط الاتيه:

1- انا عندى صوت تزييق لما بدوس دبرياج و الصوت بيكون اوضح طبعا لما بتكون العربيه مبطله و فى المشى بيكون فى صوت تكتكه مسموعه و رحت عند ميكانيكى(بس مش بتاعى) كان بيصلح عربيه صاحبى المهم قلت اخد رايه راح ساق العربيه و بعد كده نزل تحتها فى البياره قعد يقولى دوس دبرياج كده و العربيه مبطله بعدين قاللى عايزه اسطوانه و ديسك بصراحه انا استغربت جدا و شكيت فى كلامه و قلت اروح للميكانيكى بتاعى لما اشوف هيقول ايه يا ترى ما مدى صحه كلام الراجل ده و ايه النوع الاحسن للاسطوانه و الديسك و سعرهم لو افترضنا انى هاغير و ايه رايكم اروح التوكيل او لمحمد عبده علشان اكون مطمن اكتر خصوصا انا شايف ان دى حاجه مش بسيطه

2-سعات بيكون فى رجه يسيطه كده لما برفع رجلى من على الدبرياج و قبل ما ادوس بنزين بس انا باقول ان دى من ظبطت رجلى و انى بارفع رجلى بسرعه و مش باعمل التوازن المطلوب لانى لما بركز و برفع رجلى باراحه مابتحصلش ولا ده ممكن يكون مشكله تابعه لموضوع الاسطوانه و الديسك فى النقطه السابقه

3-فرامل اليد ضعيفه جدا فسالت الميكانيكى ده قالى العربيه عايزه تيل امامى و رجلاش للخلفى و الدنيا هتتظبط معاك ارجو النصيحه برده

4- زر مروحه التكييف لما بجيبه على السرعه 4 بيفصل كأنى جبته على off بالضبط يا ترى ممكن الزر يكون بايظ

5-الميكانيكى قالى برده ان فى زيت عند الكارتيره , ياترى ده من ايه و علاجه ايه


اسف للاطاله و لكنى طمعان فى خبرتكم و معلوماتكم المفيده
انا شايف بصراحه انى اروح التوكيل اللى فى شارع التحرير و اقولهم على كل الحاجات دى خصوصا انى عملت عندهم صيانه ال 80 الف و كانو ناس محترمين و لانى مابحبش اشتغلات الصنايعيه

ارجو ان اكون شرحت المشكله بشكل واضح, انا متابع باهتمام و اى معلومات مطلوبه عن العربيه انا متوجد

انا رحت للمكانيكى و كانت النتيجه كالاتى:

1- قاللى صوت التزييق دة من حركة الفورش... بس مفيش خوف او مشكله منه و مع ذلك لما ركب العربيه فاللى الغيارات مش تمام و ممكن نبص على الاسطوانه و الديسك بعدين

2-التيل الامامى سليم و عمل رجلاش للخلفى و ظبط فرامل اليد

3- صلحت زر مروحه التكييف عند الكهربائى و قاللى كان فى سلك مفصول من ناحيه الكتاوت البرتفالى ناحيه السائق

4- المكانيكى قال ان الزيت ده بخره بسيطه و غير مؤثره و ان كل اللانوس و النوبيرا كدا و مفيش مشكله

انا قلت اوافيكم باخر الاخبار و رجاء الافاده عن صحه الكلام المذكور