الموضوع: حوار ودي حول مدي الديموقراطيه في نايل موتورز

سلام عليكم

وكل عام والجميع في اتم صحه ورمضان كريم

في الفتره الاخيره يا جماعه لاحظت اكتر من ملاحظه بخصوص مدي الديموقراطيه في منتدانا نايل موتورز

هجوم من بعض الاعضاء بخصوص ان الاداره بتجبر الاعضاء علي قراءة محتوي موضوع معين

طيب يعني هيا الاداره بتجبر الاعضاء علي قراءة مواضيع وخلاص؟؟

مش كلها طيب مواضيع مهمه ومعظمها بيكون تنبيهات علشان محدش يتعاقب ويقول مشوفتش؟؟؟ !!!!

هجوم بخصوص منع الكلام في المواضيع السياسيه

هوا يعني طيب لو حصلت (لقدر الله) مشكله

مين اول واحد هيتشد؟؟

خلينا نتكلم بصراحه الي هيحصل كالاتي :

هيبقي السيد العضو قاعد في بيته جمب مراته وولاده

والاستاذ صاحب المنتدي بايت في امن الدوله علي ما يتجاب العضو الفاضل الي قال الكلمتين الي نفسه يقولهم

ويتقفل المنتدي وكل عام وانتم بخير

هجوم ان بعض الاعضاء وصلهم رسايل علي الخاص (من اعضاء زيهم مش من الاداره) بتقولهم ياريت نساعد في تمويل المنتدي بالضغط علي اعلانات جوجل

والعضو يقولك ازاي وازاي توصلني رساله زي دي

طيب يا سيدي وصلتك الرساله مش عايز تعمل بيها فكك منها

اعمل مش شايفها

مش عايز تساعد براحتك بس ليه تهاجم المنتدي الي بتستفاد منه كل لحظه

ليه الانانيه دي !!!!!!!!!!!!!!!!!!!!!

ده كله كوم والي حصل الايام دي كوم تاني بخصوص الاعلانات الي بدات شركة الاعلانات الجديده في اعادة تنسيقها

ناس كتير معجبهاش الوضع

وثارت والموضوع كبر وتحول لهجوم علي الاداره

لدرجة ان في ناس اخدت وقف !!!!!!

بصراحه وقتها ولما شوفت كم الهجوم

وقتها فعلا اتصدمت

هل احنا كاعضاء فهمنا معني الديموقراطيه والحريه غلط؟؟؟

لدرجة بقينا نتكلم ونتدخل في حاجات متخصناش كاعضاء

طيب تعالوا نشوف الاداره كانت بتعمل ايه وبتراعي الاعضاء ازاي (مع انهم مش مجبرين علي كده)

1-الاداره عملت مسابقه علشان نختار مع بعض الهيدر وعملت موضوع للتصويت

(كون ان مفيش هيدر نجح في المسابقه دي مش مشكلة الاداره)

2-لما قلنا استايل (بلو) فيه مشاكل الاداره نزلت اكتر من استايل (كلرز - ويالو) مع ان مشاكل( بلو) اتصلحت

3-ولما لقيت ان في ناس كتير بيدخلوا من موبايل

بدون ما حد يطلب نزلت استايل (نايل موبايل)

دي كلها امثله قليله جدا من مشاركة الاداره للاعضاء

طيب هوا ده كله ببلاش؟؟؟

ولا ده يعني تبرعات بتيجي للمنتدي

المنتدي ده كله مش كل ثانيه فيه بيصرف فلوس؟؟

ولا هوا شغال بالبركه؟؟؟

تخيلوا لما الاداره تعمل كل شيء في مصلحة الاعضاء

وتلاقي ان الاعضاء نفسهم كل واحد همه علي مصلحته

الي بيمنع اعلانات جوجل

والي بيضيف اداه للمتصفح علشان يمنع الاعلانات

وياريت كده وبس

ده كمان بيحاول ينشرها لباقي الاعضاء

منتهي منتهي منتهي الانانيه

يا جماعه شوفوا المنتديات التانيه بتعمل ايه

وشوفوا اعلانات البوب اب

شوفوا الاعلانات واخده كام % من مساحة الصفحه

ومحدش بيتكلم ولا حد اساسا يقدر يعترض

ليه هنا بندي لنفسنا حق مش بتاعنا وندخل في الي ملناش فيه

المنتدي شغال ليه تلات سنين وشويه

محدش سال نفسه شغال ازاي وبيتمول منين؟؟

محدش سال نفسه حجم مصاريفه وصلت لفين؟؟؟

لامتي هيفضل يتصرف عليه؟؟

امتي هيجيب همه؟؟

طيب ابسط حاجه يوصل للـ break even point

علشان اصحابه ميزهقوش منه ويقفلوه

يا جماعه لو محفظناش علي المكان الي بيجمعنا وبيلم الاسره الكبيره دي وبقي قلبنا عليه فعلا

والله احنا الي هنخسر

مش معني ان في قدر من الديموقراطيه اننا نسيب لنفسنا المجال نتكلم في اي حاجه وفي اي حته

برضه ناخد بالنا من كلامنا ونفهم ان المنتدي ليه اداره ولازم تحترم

وابصم بالعشره ان الاداره بتحط في اعتبارها الاعضاء قبل اي حاجه

شوفت المواقف الي تخليني ابقي علي يقين من ده

ياريت نيجي علي نفسنا شويه ونراعي مبدا المصلحه العامه

A.Yakout