الموضوع: مبني وزارة الزراعة بالدقي بالقاهرة اروح له ازاي؟

المشاركة الأصلية كتبت بواسطة abdo_general

والله بصراحة انا مش عارف

بس اتمني حد من الاعضاء يرد عليك ويفيدك في اقرب وقت

شكرا ليك وفي انتظار ردود الاعضاء

انا شغلى فى الدقى وساكن على شارع الهرم ( فى مكروباس بيروح هناك انت تقول له وزارة الرزاعة عتنزل بعد كوبرى الدقى عند بن شاهين )
ومن هناك عتمشى مسافه مش كتير من 3 الى 8 دقائق تكون فى الوزارة ولو سألت اى احد هناك عيقول لك

المشاركة الأصلية كتبت بواسطة mahgary

انا شغلى فى الدقى وساكن على شارع الهرم ( فى مكروباس بيروح هناك انت تقول له وزارة الرزاعة عتنزل بعد كوبرى الدقى عند بن شاهين )
ومن هناك عتمشى مسافه مش كتير من 3 الى 8 دقائق تكون فى الوزارة ولو سألت اى احد هناك عيقول لك

باشا انا جاي من اسكندرية ومعرفش حاجة في القاهرة وعاوز اوصل لموقف مشاريع يكون فيه مشروع يوصل لمكان الوزارة عشان امشي وراه

هل المسافة من الدقي للحسين بعيدة؟

المشاركة الأصلية كتبت بواسطة د.أحمد سمير

أنا مش فاهم تحديداً .. انت جاي من الإسكندرية بسيارة ولا مواصلات
الأرجح بسؤالك عن المشروع إنك جاي مواصلات
لو جاي من اسكندرية الصحراوي لحد رمسيس تبقى الحكاية محلولة جداً
من رمسيس عند مترو مصر الجديدة ميكروباصات بتروح بولاق الدكرور بتعدي قدام وزارة الزراعة
لو مفيش أو اتأخرت وعايز تركب حاجة سريعة يبقى مترو الأنفاق حتى محطة الدقي اتجاه الجيزة
ومن محطة الدقي حوالي 5 دقائق مشي في شارع الدقي هاتكون عند وزارة الزراعة

لو جاي صحراوي لحد الهرم وبس
هتركب ميكروباص الدقي من الهرم هاينزلك عند وزارة الزراعة
لو ملقتش اركب ميكروباص المؤسسة وده بيروح المؤسسة عن طريق كوبري أكتوبر فبيعدي على وزارة الزراعة قبل طلوع الكوبري .

لو ملقتش اركب ميكروباص بولاق أو لواء أو امبابه وانزل عند آخر شارع جامعة الدول ومن هناك تاكسي بخمسة جنيه للوزارة أو تمشية صغيرة من محيي الدين أبو العز وشارع نادي الصيد حتى الوزارة وهتاخد حوالي ربع ساعة مشي فقط .

لو جاي بالسيارة يبقى أسهل شيء صحراوي ثم محور 26 يوليو
هيقابلك كوبري 15 مايو تطلعه ، وتنزل الزمالك أول نزلة شمال ، وراعي أن تكون محضن يمين علشان فيه ثلاث مطالع قبل المنزل ده .

هاتنزل الزمالك تمشي طوالي لا يمين ولا شمال لحد ما يقابلك كوبري أكتوبر .
هاتطلعه وتكمل طوالي لحد نهايته تماماً وتنزل ، أول شارع يمين بعد منزل الكوبري هو شارع وزارة الزراعة

وتوصل بالسلامة

الدقي مش بعيد عن الحسين لو بالمترو هاتركب وتنزل محطة العتبة ، ومن هناك فيه تاكسيات 7 راكب بجنيه واحد لحد الحسين .

لو بالعربية هاتطلع كوبري أكتوبر ، وتنزل بعد النيل مباشرة يمين إلى وسط البلد ..
ملحوظة بعد النيل فيه منزل يمين على الكورنيش تسيبه ، ومنزل تاني جنب سور المتحف تسيبه برضه ، لكن الكوبري لما يتقسم يمين وشمال خد يمين وانزل ..
بعد حوالي 100 متر هتلاقي شارع عبد الخالق ثروت على يمينك وفيه نقابة الصحفيين والمحامين ونادي القضاة خش فيه لحد آخره
هتلاقي نفسك في ميدان الأوبرا
وهتلاقي كوبري ونفق ، اطلع الكوبري .. نهاية الكوبري هي ميدان الحسين ، وفي بارك في آخر الشارع جنب مستشفى الحسين .

شكرا لردك يادكتور احمد وانا رايح بالعربية بس كان قصدي امشي ورا مشروع يكون رايح عند وزارة الزراعة دة قصدي

في انتظار مزيد من الردود