مالك يامصر؟؟؟

**boing** · 29-08-2010 06:05 AM

عاوز اقول لاخواننا اللي بيقولو ان البلد هتفضل كده ومش هتتغير

لا ممكن تتغير ....

لان ربنا قال: ان الله لايغير ما بقوم حتى يغيرو ما بانفسهم

هيا كانت حلوة واتغيرت للاسوا.....يبقى ممكن تكون وحشة وتتغير للافضل
ولا ايه رايكم؟؟

**Miss_Pharma** · 29-08-2010 09:56 AM

المشاركة الأصلية كتبت بواسطة boing

والله انا مش شايف ان الحكومة ليها مصلحه ان البلد تفضل ورا في كل حاجه
انا شايف ان المشكله فينا كبني ادمين
الشعب المصري اتغير جامد
فيه ناس هترد عليا وتقولي الظروف الاجتماعيه هيا اللي غيرت النفوس هرد عليك واقولك كان من ضمن اصحابي واحد سوداني بيقولي عندهم في السودان ايامها من 4سنين كانو فقراء اوي(الله اعلم اتطورت وسبقونا زي ما بسمع ولا ؟؟) وكان بيقولي انتو هنا في مصر الناس كلها عماله تتخانق مع بعضها لكن في السودان بيقولي الغالب بين الناس وبعضها الحب والمودة وده اللي احنا كلنا اكيد سمعناه من جدودنا ان مصر كان فيه االموضوع ده اياااام زمان

ياجماعه انا والله وبدون مبالغه ما بروح اي مكان غير والاقي الناس كلها قافشه على بعض او بمعنى اخر كلو بيخلي بالو من اللي بيتعامل معاه

يبقى الحكومه ملهاش اي دخل في نفوس البني ادمين الموضوع كله ان فيه حاجه غلط في نفسياتنا

البلد معدش فيها تعليم السبب المدرسين انفسهم
المستشفيات الدكاتره اللي فيها بقو بمنهى الطمع والجشع لدرجة انا لما باجي اكلم الاخصائي بالليل واصحيه من النوم عشان معايا حاله مستدعيه جراحه في المستشفى ما ينزلششششششش لكن لو في عيادتو الخاصه والللللللله بينزل في عز البرد الساعه 3 بالليل
هتقولوي عشان الدخل والحاجات دي
هرد عليكم وهقولكم طالما هما باعو ضميرهم يبقى المشكله فيهم هما

كلامك اللي قلته في الاول انا حسيت بيه كلمة كلمة والله العظيم ..
انما موضوع ان العيب في الناس ده انا مش معاك فيه
ليه بقى
اكبر دليل انت وانا وكل الناس اللي اتربت بره في بيئة غير مصر .. اول لما جت هنا حصلها ايه ؟
فيه ناس قدرت تقاوم وتفضل زي مهي (قلة قليلة )وناس اتغيرت كليا وناس اتغير فيها حاجات وحاجات لا ..
ليه ؟
والعكس .. اللي بيعيش طول عمره في مصر ويسافر بره .. سلوكه كله بيتغير ويختلف وبيرجع هنا يحس بالفرق ..
ليه ؟
لانك غيرت البيئة اللي عايش فيها ..
معنى كده ان الحكومة هي السبب الرئيسي .. لو الحكومة صلحتلك البيئة اللي حواليك وغيرتلك الظروف المحيطة بيك .. انت تباعا هتتغير ..
دليل على كلامي .. المدرسين اللي بيسافروا يشتغلوا بره ..
انا هتكلم عن الكويت اللي بيروحلها كمية مدرسين مصريين كتير جدا ..
المدرس المصري ده هو هو لو حطيته في مدرسة مصرية هيعمل ايه ؟ هيعمل اللي بيتعلمه من اللي قبله ..
اهمال ودروس خصوصية ومفيش شرح ومفيش ضمير مهي العملية سايبة ومحدش بيحاسب حد (ااكيد مش اجماع بس الغالبية ومحدش ينكر )

انما لو نفس المدرس ده سافر اشتغل في مدرسة في الكويت .. الوضع هيتغير تمامااااااااااااا .. قمة الالتزام .. الضمير في الشرح .. الالتزام بالمواعيد .. وغيره ..

تفتكر ليه الفرق ده ؟ لكذا سبب اولهم بياخد مرتب اضعاااف اللي بياخده في بلده بيكفي احتياجاته ولازم يحافظ على رزقه ويشتغل عشان ميضعش منه .. تاني سبب هناك فيه قوانين وعقوبات شرسة وحازمة لو دخلوا على مدرس لقوه مش بيشرح ولا سايب الكشاكيل منغير تصحيح ولا نايم وسايب العيال بتلعب في الفصل !! لان الحساب عسير .. يعني لفينا لفينا ورجعنا ان الحكومة هي السبب الاول لتغيير سلوك الفرد ..
مش هنقول 100 % بس هنقول 90 % :)

**تامر.محمد** · 29-08-2010 11:09 AM

همممممم
و الله السبب معروف
ولا هايتصلح اي حاجة غير لما السبب ده يزول

**boing** · 01-10-2010 09:09 PM

الاخ اللي بيقولي المصريين بيروحو الكويت وبيبقو محترمين
انا عاوز اقولك دي حاجة نادره

من اسبوع بس
واحد مصري محاسب في شركة اعرفها في السعودية طلع تاشيرة خروج وعودة على اساس انو نازل اجازة
ونزل فعلا اجازتو

بس ثاني يوم الصبح في الشركه لاقوه سارق 150الف ريال ولاب توب

قولي بذمتك ده واحد مصري ومتعلم وطالع يشتغل بره وكتر خير اللي شغلو عنده هل بعد الحركه دي صاحب المكان على الاقل او اللي يعرفهم هيغيرو وجهة نظرهم في المصريين

يا اخي الفاضل الهمجية وقلة الذوق بقة سمه واضحه في الشعب المصري وواضحه ووضوح الشمس زي ما اتكلمنا قبل كده
اضربلك كمان مثل تاني خالص بس بيوصل لنفس نتيجة النموذج اللي فات

ليا واحد جارنا هنا في العماره راجل كبير تعب مرة واحده وحصلو ايامها جلطه في المخ..مفيش دكتور في العماره ساكن غيري انا بس
المهم كلموني بعد الفجر ونزلت كشفت عليه وكملت معاهم لحد ما دخل العناية المركزه وبعد ما خرج منها بقيت كل يوم اتابع حالتو مرتين والله مرة وانا رايح شغلي ومره وانا راجع حتى متابعات الدكاتره اللي بيمشي معاهم بقيت اوديه واجيبو هوا واسرتو
لان ابنو شغال في السعودية وليه ابن تاني شغال في القاهره ...لحد ماربنا كرمنا وبقا احسن من الاول بكتير
ومر شهرين وربنا يعافينا ويعافي جميع مرضانا ابويا تعب واتشخص انه عندو كانسر وعملنا عملية كبيرة ايامها لوالدي وقعد في العنايه فترة وبعد كده رجعنا البيت

والله العظيم يا جماعه ما فكر لا هوا ولا حد من عيالو يطلعولي او حتى كانو كلموني ايام العملية برغم اني رقم معاهم
كل الليىعليهم انهم لما يقابلوني ع السلم يسالوني ع والدي....تخيلوا

انا ما استغربتش والله من اللي حصل لان المواقف دي مش وارده غير هنا في مصر وبس

الخلاصه ان الناس هما اللي عاوزين يكونو كده وعشان كده البلد طبيعي لازم تبقى زفت

وللمره الالف هفضل اقول مالك يا مصر؟؟؟؟

**mrwho1982** · 01-10-2010 10:35 PM

السلام عليكم اولا

ثانيا انت عارف ليه مصر بقت كده روح لخضري وقولو هاترشح مين بدل حسني

هايقوللك لا هارشح حسني ماحنا عارفينو وزي الفل

النوعية دي كتيييير وهي دي بجد هي اللي مبوظة البلد

بلاش دي خد دي بقي

دكتور جامعة المفروض انو بيربي اجيال يعني مربي فاضل الاقي بيسب بالاب والام وفاتح شركة من الباطن ومدخل معاه شريك علشان يمشي علي حسة الورق

هه عايز تاني
طيب خد دي لما ضابط شربة يوقف والدي ( 65 ) سنة ويسحب منو الرخص والحجة ان النمر ممسوحة

والضابط يسيب والدي واقف ربع ساعة وفي الاخر والدي اخر مازهق قالو انا مش عايز لارخص ولا وصل و حسبي الله ونعم الوكيل وسابو وجه عالبيت ولما حكالي

والله رحتلو انا وجوز اختي ( رائد في الصاعقة ) وسيل من الشتايم والواد واقف زي الفوطة المبلولة

مافيش ادب مافيش احترام
وجود روح الانهزامية والكلام الفارغ زي ( مافيش فايدة وهانفضل كده طول عمرنا )

والخروج خارج البلد بس انا الحمد لله عارف اللي لي واللي علي ولما اعمل حاجة لحد بحط رقم 1 قدامي هو ربنا

احنا مابقناش كده غير لما بعدنا عن ربنا وحسبي الله ونعم الوكيل في اللي كان السبب

بس في امل ان شاء الله

**نور القمر** · 02-10-2010 02:22 AM

مال حالك يا مصر
النهاردة كان يوم من ايام مصر
احكيلك حصل كام موقف كلهم مستفزين
عند هايبر وان كام خناقة في الباركينج او مشادات كلامية
ليه
عشان واحد ماشي عكسي في الباركينج
عشان واحد راكن خارج صفوف الركنة والست مش عارفة تطلع بعربيتها عشان ضيق عليها
في شارع الهرم
ولد حوالي 10 سنين يركب نص نقل من وراء ويقع على ضهره لوح خشب كبير
متسول كسيح ينزل من رصيف الهرم عند ازحم واغبى منطقة قبل العريش بشوية وقاعد يشحت في الضلمة
يعني ده لو حد لمسه هايجيبله مصيبه
مينى باص غبي يقف في نص الشارع ينزل ويركب زباين
واحد مش عارفة اقول عليه ايه يمسك نص الطريق الضيق في طريق اسكندرية مصر ومش سامح لحد يعدي يمينه ولا شماله
واحد في اشارة الرماية يدي اشارة شمال اكتر من مرة ويدخل يمين اتاري حضرته يقصد انا هوسع لك الشمال
في الهايبر نفسه السوبر ماركت زجمة موت ورغم كدة تلاقي المتسوقين سايبين الترولي في نص الطرقة على ما ينقوا
تقف تحاسب تلاقي واحد رخم يزنق بوز الترولي قدامك عشان يحاسب قبلك
كلها موقف مستفزة وتحرق الدم
وحاجات من دي كتير
ياترى السبب في ده كله الحكومة ولا سلوكيات البشر اللي ماشي ومش هامه غير نفسه ومفيش اي احترام للغير !!!!!!!!

**tom_gr** · 02-10-2010 02:42 AM

اجبلكم من الاخر يا جماعة
خلاصة الكلام

هاقول مثل بسيط وكل لبيب بالاشارة يفهم

هات كوباية واملاها مياه

سيب الكوباية فترة كبيرة بدون ما تغير المياه او حتى تحركها
ايه الى هايحصل ؟؟؟

هاتلاقى عفن وحشرات ويرقات وتراب والمياه بقت غير صالحة

ليه ده حصل ؟؟؟؟

لان المياه لم تتغير
لم تتجدد
لم تتحرك

اذن
التغيير مطلوب
التجديد مطلوب
التحريك مطلوب

اكيد كلنا فهمنا