السلام عليكم ورحمة لله وبركاته
اولا يا جماعة رمضان كريم وينعاد علينا وعليكوا اعوام مديدة ان شاء الله في دوام الصحة والعافية ان شاء الله
بعد المقدمة الطويلة انا حبيت احكيلكم عن اللي حصل معايا
انا طالب بكلية هندسة قسم الأباطرة ( قسم مدني ) :eee: بالفرقة الثالثة حاليا
وبعد 3 سنين صرفت فيهم ملايين الجنيهات على الإنتقالات في مصر وطبعا عارفين سواقين التكسي في مصر الحقيقة طيبين طيبين طيبين ومفيش فيهم اي نوع من انوع الإستغلال وفي النهاية قررت انهي المهزلة دي واشترى عربية ( حلوة انهى المهزلة دي )
وفي النهاية قولت يا ولد حط ميزانية مبدئية للسيارة 50 الف جنيه خصوصا وللأيف اني كنت عايش برة مصر فوق الـ 19 سنة وكنت متخيل وعايش في وهم انو الـ 50 دول ها يجيبوا عربية ممتازة ههههه :36_1_50[1]:
في النهاية ملقتش قدامي غير الإسبيرانزا لكن هيهات من كثرة الكوبيس اللتي كانت تطاردني بالصييني من العربية دي ( حلوة برضوا هيهات دي ) وقررت ارفع الميزانية شوية وقولت نعصرها شوية على نفسنا ولكن نشترى عربية تستاهل وقولت مدام ها اجيب عربية جديدة يبقى على طول اوتوماتيك يا معلم وخصوصا اني ما زلت جديد في السوقة وخصوصا في مصر قولت مفيش غير البيكانتو لحسن من الفيرنا والانوس مش عشان همة اعلى فئة لترية ولكن انا عايز عربية تكون صغيرة وعلى مقاسي وتكون اقتصادية ولكن كنت وحتى اليوم والله يا جماعة اشعر بوجود غصة في حلقي من اني دافع 72.500 الف على عربية هاتشباك 1100 ومفبش فيها اي نوع من انواع الإمكانيات ولا حتى الأوبشنز نهائياااااااااااااااااااا ااااااااااااااااااااااااا ااااا يمكن مفيش فيها غير التكييف اللي بصراحة حاسس انهم منو علينا بيه والنهاردة لملمت شتاتي وجمعت الأوراق المطلوبة وقلت لازم اقطع الشك باليقين ( مش عارف ايه البلاغة اللي حطت عليا النهاردة دي ) وروحت معرض لأحد اقاربي عشان يجيبلي موافقة البنك وعرض السعر من احد المعارض اللي معرفة له وانا عندوا بيفحص الورق صارحته بالشوكة اللتي تنغص على حلقي (ارحمنا من العربي الفصيح) قالي طيب تعالا معايا تحت ولقيته بيقولولي انتا عارف البوروتون قولتله آه طبعا انا عارف انو الـ الجين 2 حلم كل الشباب المصرى قالي طيب شوف الساجا كده وقولي ايه رأيك فيها فضلت لتفرج عليها ساعتين كاملين وانا في حالة صدمة لا توقف بقى انا كنت ها ادفع 70 الف في عربية 1100 وفي عربية بالمواصفات دي وسعر افضل منها وكاملة من كل شئ وما يمزيها عن الإسبينزا ثلاث اشياء
1- المساحة الموجودة في سيارة 1300
2- الفتيس الأوتوماتيك
3- كلمة (MADE IN CHINA ) ودي لوحدها كانت عملالي رعببببببببببببببببببببببب ببببب
ولكن قريبي قالي انا عمري ما ها اضرك اشتري مني وتوكل على الله واخدنا بالفعل الورق وقدمته للبنك على الساجا اوتوماتيك طبعا انتو عرفين انو سعرها ارتفع اصبح 75 بس برضوا مش مشكلة خالص العربية بالفعل شكلها تستاهل والله وفيها كل حاجة ممكن تتخيل وقالي انو ان شاء الله الورق يا يخلص في خلال 3 ايام وبعد كده تقدر تستلم وطمني انو استلامي ها يكون قبل العيد كمان لكن اكيد الترخيص ها استنى لبعد العيد للأسف :11:
ولكن بصراحة انا هقول على حاجة انا شايفها تعيب السيارة التوكيل ضارب في سمعتها عرض الحائط يعني زي ما عز العرب لو روحتوا التوكيل اللي في العجوزة لو شفتوا الإهتمام اللي معمول لملاك الشيروكي والكريزلر بحكم اني ليا اصدقاء بينزلوا تمرين في عز العرب وبيحكولي على اللي فيه هوة فيه ادارة جيدة ولكن المشكلة الدعاية يا جماعة شبه مش موجودة هوة معتبر نفسوا ببيع عربيات بتسوق نفسها لكن البروتون ما تزال غربية عن الشعب المصرى زي ما ابو الفتوح هارينا اعلانات عن العربية بتاعتوا اللي للأسف شايفوا عارف يحقق ليها نجاح غير مسبوف انا مرحتش معرض واسألته على الإسبيرانزا A113 والله يا جماعة ولقيتها كلو بيقول من اسبوعين لـ 3 عشان تستلم لكن عز العرب مطلوب منو دعاية اكتر والأهم فكرة قطع الغيار اللي الإخوة في المنتدى بيتكلموا انها عاملة جناية في مصر هنا !!!!!!!!!!! ولكن ربنا يستر وان شاء الله ها ابقى احكيلكم على اللي ها يحصل معايا حتى استلم الساجا ونبدأ رحلة الكفاح المسلح !!!
ومعلش تعبتكوا فعلا معايا ولكن فعلا العربية دي تستاهل اكتر من كده بكتير على اللي انا شايفوا ولكن لتخليص الذمة والضمير انا لسى لا سقتها ولا حتى جربتها ولكن قلبي بيقولي انو العربية ها تطلع حاجة تستاهل ان شاء الله واي حد يا جماعة عندوا اي معلومات يثريني بها او يزود تصميمي على العربية دي فعلا انا كلي آذان صاغية لأني فعلا متشوق للعربية دي جدا ....
ملاحظة: لو وجدت أخطاء املائية كثيرة فده راجع لأنو النضارة مكسورة وانا مش شايف الـ س من الـ ش ولكن ربنا ساترها :Oc_sun1[1]: